ആ പ്രഭാതത്തിൽ മുറ്റത്ത് നിലാവിന്റെ വെള്ളിനക്ഷത്രങ്ങൾ ബാക്കിവെച്ച മഞ്ഞുതുള്ളികൾ പറ്റിപ്പിടിച്ചിരുന്നു. പുലരിയുടെ ആദ്യകിരണങ്ങൾ ഗ്രീഷ്മയുടെ മുഖത്ത് സ്പർശിച്ചപ്പോൾ അതൊരു ദീപശിഖയെന്നോണം തെളിഞ്ഞുനിന്നു. ഒരു കവിതയുടെ ഈരടി പോലെ ചന്തമുള്ളവളായിരുന്നു അവൾ.
ഗ്രീഷ്മയുടെ വീട് ഒരു പുരാതനമായ നാലുകെട്ടാണ്. അച്ഛൻ വൈശാഖും അമ്മ നയനയും അടങ്ങുന്ന അവരുടെ ലോകം. കാലത്തിന്റെ സാക്ഷിയായി നിൽക്കുന്ന ആ വലിയ വീടിന് ഗതകാല സ്മരണകളുടെ ഗാംഭീര്യമുണ്ടായിരുന്നു.
മനസ്സിൽ വിടർന്ന നേർത്ത നൊമ്പരങ്ങളുമായി അവൾ ക്ഷേത്രനടയിലേക്ക് നടന്നു. കഴിഞ്ഞ തവണ കൂടെയുണ്ടായിരുന്ന കസിൻ ഹർഷയുടെ ഓർമ്മകൾ മുംബൈയിലെ തിരക്കുകളിലേക്ക് മടങ്ങിപ്പോയിരുന്നു. ഏകാന്തതയുടെ മൂടുപടത്തിനുള്ളിൽ ആരോടെന്നില്ലാതെ മന്ത്രിക്കുന്ന പേടമാൻ കണ്ണുകളുമായി അവൾ ശ്രീകോവിലിന് മുന്നിൽ നിന്നു.
പ്രാർത്ഥന കഴിഞ്ഞ് തിരുമേനി നൽകിയ പ്രസാദവും വാങ്ങി തിരിയുമ്പോൾ അവളുടെ ശ്വാസം ഒരു നിമിഷം നിലച്ചു.
മുന്നിൽ അർജ്ജുൻ.
ആ നിമിഷം ഗ്രീഷ്മയുടെ മുഖം ആയിരം പൂർണ്ണചന്ദ്രന്മാർ ഒരേസമയം ഉദിച്ചതുപോലെ പ്രകാശിച്ചു. അവർ ഒരേ സ്കൂളിലെ അധ്യാപകരാണ്.
അവൾ കണക്ക് പഠിപ്പിക്കുന്നു, അവൻ ഹെഡ്മാസ്റ്ററും. നാല് വർഷമായി ഹൃദയത്തിൽ കാത്തുസൂക്ഷിച്ച അവരുടെ പ്രണയം പുറംലോകമറിയാതെ ഒളിഞ്ഞിരിക്കുകയായിരുന്നു. ഗ്രാമീണ സൗന്ദര്യം തുളുമ്പുന്ന പാതയിലൂടെ അവർ ഒന്നിച്ച് നടന്നു. കാറ്റിൽ ഇളകിയാടിയ അവളുടെ കുറുനിരകൾ അവൻ വാത്സല്യത്തോടെ മാടിയൊതുക്കിയപ്പോൾ ലജ്ജയാൽ അവളുടെ കവിളുകൾ തുടുത്തു.
ചക്രവാളത്തിലേക്ക് നീളുന്ന റെയിൽപാളങ്ങൾക്കപ്പുറത്തെ തന്റെ വീട്ടിലേക്ക് അർജ്ജുൻ മറയുന്നത് നോക്കി അവൾ നിന്നു.
വൈകുന്നേരം ചായ കുടിച്ച ശേഷം വൈശാഖ് തന്റെ പതിവ് സവാരിക്കിറങ്ങി. അസ്തമയ സൂര്യന്റെ ചുവപ്പ് രാശി മലമുകളിലേക്ക് അണയാൻ വെമ്പുന്ന നേരം. ക്ഷേത്രമുറ്റത്തെ ആൽമരച്ചുവട്ടിൽ ഇരിക്കുമ്പോൾ അദ്ദേഹത്തിന്റെ കണ്ണുകളിൽ അജ്ഞാതമായൊരു വേദന പടർന്നു.
വർഷങ്ങൾക്കപ്പുറത്തെ ഓർമ്മകൾ കടൽത്തിരമാലകൾ പോലെ അദ്ദേഹത്തിന്റെ മനസ്സിൽ ആഞ്ഞടിച്ചു. സ്വന്തം മുറപ്പെണ്ണായ മാളു…
അദ്ദേഹത്തിന്റെ സർവ്വസ്വവുമായിരുന്നു അവൾ. ബിരുദപരീക്ഷ കഴിഞ്ഞാൽ വിവാഹം നിശ്ചയിച്ചിരുന്ന പ്രണയിനി. നളചരിതത്തിലെ ദമയന്തിയെപ്പോലെ സുന്ദരിയും സാഹിത്യകാരിയുമായ മാളു വൈശാഖിന്റെ സ്വപ്നമായിരുന്നു.
മലയടിവാരങ്ങളിലിരുന്ന് അവർ പങ്കുവെച്ച രഹസ്യങ്ങൾ കാട്ടുപൂക്കൾ പോലും അറിഞ്ഞിരുന്നു.
പക്ഷേ, വിധി ക്രൂരമായിരുന്നു. മദ്യപിച്ച് ലക്കുകെട്ടവർ ഓടിച്ച ലോറി അവരുടെ സ്വപ്നങ്ങളെ തകർത്തെറിഞ്ഞു.
മാളുവും കുടുംബവും സഞ്ചരിച്ച കാർ തകർന്നു തരിപ്പണമായപ്പോൾ വൈശാഖിന് നഷ്ടമായത് സ്വന്തം ജീവനായിരുന്നു. ആഘാതത്തിൽ മനോനില തെറ്റിയ അദ്ദേഹം ചികിത്സകൾക്കൊടുവിലാണ് ജീവിതത്തിലേക്ക് മടങ്ങി വന്നത്.
എങ്കിലും ആ മുറിവ് മായാതെ നിന്നു.
പിന്നീട് ബന്ധുക്കളുടെ നിർബന്ധത്താൽ നയനയെ വിവാഹം കഴിച്ചു. ആദ്യരാത്രിയിൽ തന്നെ തന്റെ തകർന്ന ഹൃദയകഥ അദ്ദേഹം നയനയോട് തുറന്നു പറഞ്ഞു. സഹാനുഭൂതിയോടെയും സ്നേഹത്തോടെയും അത് കേട്ട നയന അദ്ദേഹത്തിന് താങ്ങായി നിന്നു.
ആ ബന്ധത്തിൽ പിറന്ന കിലുക്കാംപെട്ടിയായിരുന്നു ഗ്രീഷ്മ. അവളുടെ ചിരിയിൽ വൈശാഖ് തന്റെ സങ്കടങ്ങളെല്ലാം മറന്നു.
അന്ന് രാത്രി ഗ്രീഷ്മ ഒരു തീരുമാനമെടുത്തു. അവൾ തന്റെ പ്രണയം അച്ഛനമ്മമാരോട് തുറന്നു പറഞ്ഞു. പ്രണയത്തിന്റെ ആഴവും വിരഹത്തിന്റെ നോവും നേരിട്ടറിഞ്ഞ വൈശാഖിന് മകളുടെ ആഗ്രഹം തള്ളിക്കളയാനായില്ല. അവർ സന്തോഷത്തോടെ അർജ്ജുന്റെ വീട്ടിലെത്തി വിവാഹം ഉറപ്പിച്ചു.
പുതിയ പ്രതീക്ഷകളുടെ പുലരിയുദിച്ചു. മംഗളവാദ്യങ്ങളുടെ അകമ്പടിയോടെ അർജ്ജുനും ഗ്രീഷ്മയും ഒന്നായി. വൈശാഖിന്റെ പൂവണിയാത്ത പ്രണയസ്വപ്നങ്ങൾ മകളിലൂടെ പുനർജനിക്കുകയായിരുന്നു.
വിവാഹപ്പന്തലിലെ സന്തോഷങ്ങൾക്കിടയിൽ അങ്ങ് ദൂരെ ആകാശത്ത് ഒരു വെള്ളിനക്ഷത്രം തിളങ്ങുന്നുണ്ടായിരുന്നു. അത് മറ്റാരുമായിരുന്നില്ല സ്വർഗ്ഗത്തിലിരുന്ന് അവരെ അനുഗ്രഹിക്കുന്ന മാളുവിന്റെ സ്നേഹസാന്നിധ്യമായിരുന്നു അത്.
ശ്യാമള ഹരിദാസ്, പാലക്കാട്, കോങ്ങാട്.
syamalaharidas3680@gmail.com
