ബംഗളൂരു: ഇന്ത്യൻ ചലച്ചിത്ര സംഗീതലോകത്തെ ഇതിഹാസ ഗായികയും “തെന്നിന്ത്യയുടെ വാനമ്പാടി”യുമായ എസ്. ജാനകി (88) അന്തരിച്ചു. മൈസൂരുവിലെ സ്വകാര്യ ആശുപത്രിയിലായിരുന്നു അന്ത്യം. വാർധക്യ സഹജമായ അസുഖങ്ങളെ തുടർന്ന് ഏറെ നാളായി ചികിത്സയിലായിരുന്നു. പതിനായിരത്തിലധികം ഗാനങ്ങളിലൂടെ തലമുറകളെ സംഗീത സാന്ദ്രമാക്കിയ വിസ്മയ ഗായികയുടെ വേർപാടിൽ ചലച്ചിത്ര-സംഗീത ലോകം ഒന്നടങ്കം ആദരാഞ്ജലികൾ അർപ്പിക്കുകയാണ്.
ആന്ധ്രപ്രദേശിലെ ഗുണ്ടൂർ ജില്ലയിൽ 1938 ഏപ്രിൽ 23നായിരുന്നു എസ്. ജാനകിയുടെ ജനനം. പിതാവ് ശിസ്തില രാമമൂർത്തി ആയുർവേദ ഡോക്ടറായിരുന്നു. മാതാപിതാക്കൾ ചെറുപ്പത്തിലേ മരിച്ചു. അമ്മാവനായ ഡോ. ചന്ദ്രശേഖറിൻ്റെ സംരക്ഷണയിലാണ് ജാനകി പിന്നീട് വളർന്നത്. ചെറുപ്പം മുതലേ സംഗീതവാസനയുണ്ടായിരുന്നെങ്കിലും ചില ഹൃസ്വകാല പഠനങ്ങളൊഴികെ ശാസ്ത്രീയസംഗീതം ആഴത്തിൽ പഠിക്കാനുള്ള അവസരങ്ങളൊന്നും ലഭിച്ചില്ല. 1956-ൽ ആകാശവാണി നടത്തിയ അഖിലേന്ത്യാ സംഗീതമത്സരത്തിൽ പങ്കെടുത്ത് രണ്ടാം സ്ഥാനത്തിന് അർഹയായതാണ് ജാനകിക്ക് സംഗീതലോകത്തേക്കു വഴിതുറന്നത്.
1957-ൽ ‘വിധിയിൻ വിളൈയാട്ട്’ എന്ന തമിഴ് ചിത്രത്തിൽ പാടിയാണ് ജാനകി ചലച്ചിത്ര സംഗീതലോകത്തേക്ക് കടന്നുവരുന്നത്. 1957-ൽ പുറത്തിറങ്ങിയ മിന്നുന്നതെല്ലാം പൊന്നല്ല എന്ന ചിത്രത്തിലെ ഇരുൾ മൂടുകയോ എൻ വഴിയിൽ എന്ന ഗാനമാണ് മലയാളത്തിൽ ആദ്യമായി പാടിയത്. കേരള സർക്കാരിന്റെ മികച്ച ഗായികയ്ക്കുള്ള അവാർഡ് 14 തവണ ഉൾപ്പെടെ വിവിധ സംസ്ഥാനങ്ങളിൽ നിന്നായി 33-ലധികം പുരസ്കാരങ്ങൾ നേടി. കൂടാതെ മികച്ച പിന്നണി ഗായികയ്ക്കായി 4 തവണ ദേശീയ പുരസ്കാരവും നേടി. 2013-ൽ രാജ്യം പത്മഭൂഷൺ പ്രഖ്യാപിച്ചെങ്കിലും, ദക്ഷിണേന്ത്യൻ കലാകാരന്മാരോടുള്ള അവഗണനയിൽ പ്രതിഷേധിച്ച് അവർ അത് നിരസിച്ചു.
കൊച്ചു കുട്ടികളുടെ ശബ്ദത്തിൽ മുതൽ ഭാവസാന്ദ്രമായ പ്രണയഗാനങ്ങളിലും താരാട്ടുപാട്ടുകളിലും വരെ ഒരു പോലെ തിളങ്ങിയ അത്ഭുത പ്രതിഭയായിരുന്നു എസ്. ജാനകി. മലയാളത്തിൽ എം.എസ് ബാബുരാജ്, ദേവരാജൻ മാസ്റ്റർ, ദക്ഷിണാമൂർത്തി, രാഘവൻ മാസ്റ്റർ, കെ. രാഘവൻ തുടങ്ങി പ്രമുഖ സംഗീത സംവിധായകരുടെയെല്ലാം അവിസ്മരണീയ ഗാനങ്ങൾക്ക് ശബ്ദം നൽകി. കെ.ജെ യേശുദാസ്, എസ്.പി ബാലസുബ്രഹ്മണ്യം എന്നിവർക്കൊപ്പം ജാനകി പാടിയ ഗാനങ്ങൾ ഇന്നും സംഗീതാസ്വാദകരുടെ മനസിൽ ചിരപ്രതിഷ്ഠ നേടിയവയാണ്.
