തിരുവനന്തപുരം: കൊല്ലം-തേനി ദേശീയപാത (NH-183) വികസനത്തിന്റെ ആദ്യഘട്ടത്തിനായി കേന്ദ്ര ഉപരിതല ഗതാഗത മന്ത്രാലയം 1,663.15 കോടി രൂപയുടെ ഭരണ-സാങ്കേതിക അനുമതി നൽകി. കൊല്ലം ബൈപ്പാസ് ജങ്ഷൻ (കടവൂർ) മുതൽ ആലപ്പുഴ ജില്ലയിലെ ചെങ്ങന്നൂരിനടുത്തുള്ള അഞ്ചിലിമൂട് വരെയുള്ള 54.37 കിലോമീറ്റർ ഭാഗമാണ് ഇതോടെ നാലുവരിയാക്കി മാറ്റുന്നത്. കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിയാണ് ഇക്കാര്യം സമൂഹമാധ്യമങ്ങളിലൂടെ അറിയിച്ചത്.
നിതിൻ ഗഡ്കരി പങ്കുവച്ച കുറിപ്പ്
ഇന്ത്യയുടെ കശുവണ്ടി തലസ്ഥാനമെന്നും 600-ലധികം സംസ്കരണ യൂണിറ്റുകളുടെ ആസ്ഥാനമെന്നും അറിയപ്പെടുന്ന കൊല്ലത്തിന് ഈ അടിസ്ഥാന സൗകര്യ നവീകരണത്തിന് പദ്ധതി പ്രയോജനം ചെയ്യുമെന്ന് നിതിൻ ഗഡ്കരി പറഞ്ഞു. കശുവണ്ടി, കയർ, സെറാമിക്സ്, അപൂർവ്വ ധാതുക്കൾ, മത്സ്യബന്ധനം എന്നിവയുൾപ്പെടെയുള്ള പ്രധാന വ്യാവസായിക ക്ലസ്റ്ററുകൾക്ക് ഇത് ഗുണം ചെയ്യും. ഇതിലൂടെ 1.5 ലക്ഷത്തിലധികം തൊഴിലാളികൾക്ക് ജോലി ലഭിക്കും.
കൊല്ലം തുറമുഖത്തിലേക്കുള്ള വർദ്ധിച്ച കണക്റ്റിവിറ്റി ചരക്കുനീക്ക ചെലവ് കുറയ്ക്കുകയും ഗതാഗത സമയം കുറയ്ക്കുകയും തടസ്സമില്ലാത്ത ചരക്ക് നീക്കം സുഗമമാക്കുകയും അതുവഴി പ്രാദേശിക സമ്പദ്വ്യവസ്ഥയെ ശക്തിപ്പെടുത്തുകയും ചെയ്യും. നാലുവരി ഇടനാഴി റോഡ് സുരക്ഷ മെച്ചപ്പെടുത്തുകയും നിലവിലുള്ള ഭാഗങ്ങളിൽ തിരക്ക് കുറയ്ക്കുകയും ചെയ്യും. ദേശീയപാത-183ന്റെ ഭാഗമായി, പദ്ധതി അന്തർസംസ്ഥാന, പ്രാദേശിക സമ്പർക്കസൗകര്യങ്ങൾ വർധിപ്പിക്കുന്നതിനൊപ്പം, പ്രധാന വിനോദസഞ്ചാര കേന്ദ്രങ്ങളായ പെരിയാർ കടുവാ സങ്കേതം, തേക്കടി എന്നിവയിലേക്കുള്ള പ്രവേശനം മെച്ചപ്പെടുത്തുകയും വിനോദസഞ്ചാരത്തിനും മേഖലയിലെ മൊത്തത്തിലുള്ള സാമ്പത്തിക വളർച്ചയ്ക്കും കൂടുതൽ ഉത്തേജനം നൽകുകയും ചെയ്യും.
