ന്യൂ ഡൽഹി: ഇന്ത്യയെ നടുക്കിയ പഹൽഗാം ഭീകരാക്രമണം നടന്നിട്ട് ഇന്ന് (2026 ഏപ്രിൽ 22) ഒരു വർഷം തികയുന്നു. 2025 ഏപ്രിൽ 22-നായിരുന്നു ദക്ഷിണ കശ്മീരിലെ അനന്ത്നാഗ് ജില്ലയിലുള്ള ബൈസരൺ താഴ്വരയിൽ വിനോദസഞ്ചാരികൾക്കു നേരെ ഭീകരാക്രമണം ഉണ്ടായത്. കുടുംബത്തോടൊപ്പം അവധിക്കാലം ആഘോഷിക്കാനെത്തിയ വിനോദസഞ്ചാരികളെ മതത്തിന്റെ പേരിൽ തിരഞ്ഞുപിടിച്ച് കൊലപ്പെടുത്തിയ ആ സംഭവം പരിഷ്കൃത സമൂഹത്തിന് എന്നും ഒരു തീരാക്കലങ്കമാണ്. അന്ന് മലയാളി രാമചന്ദ്രൻ ഉൾപ്പെടെ 26 നിരപരാധികളായ മനുഷ്യരാണ് ഭീകരരുടെ വെടിയുണ്ടകൾക്ക് ഇരയായത്.
പാക് ഭീകര സംഘടനയായ ലഷ്കറെ തൊയ്ബയുടെ (LeT) പോഷക സംഘടനയായ ‘ദ റെസിസ്റ്റൻസ് ഫ്രണ്ട്’ (TRF) ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. അതിർത്തി കടന്നെത്തിയ ഭീകരരും അവർക്ക് ഒത്താശ ചെയ്ത പ്രാദേശിക വിഭാഗങ്ങളും ചേർന്നാണ് വിനോദസഞ്ചാരികളെ ആക്രമിച്ചത്. ഇരകളുടെ മതം ചോദിച്ചറിയുകയും, വസ്ത്രമഴിച്ചുൾപ്പെടെയുള്ള പരിശോധനകൾ നടത്തി തങ്ങളുടെ മതക്കാരല്ലെന്ന് ഉറപ്പുവരുത്തിയ ശേഷവുമാണ് കുടുംബാംഗങ്ങളുടെ മുന്നിലിട്ട് പുരുഷന്മാരെ വെടിവെച്ചുകൊന്നത്. മതപരമായ അസഹിഷ്ണുതയുടെ ഏറ്റവും ഭീകരമായ മുഖമാണ് അന്ന് പഹൽഗാമിൽ ലോകം കണ്ടത്.
ആക്രമണത്തിന് മറുപടിയായി ഇന്ത്യ ‘ഓപ്പറേഷൻ സിന്ദൂർ’ എന്ന പേരിൽ പാക്കിസ്ഥാനിലെയും പാക് അധീന കശ്മീരിലെയും ഭീകര കേന്ദ്രങ്ങൾ തകർത്ത് തിരിച്ചടി നൽകി. ഇന്ത്യൻ വ്യോമസേന പാക്കിസ്ഥാനിലെ ഭീകരതാവളങ്ങളിൽ നടത്തിയ മിന്നലാക്രമണത്തിൽ ലഷ്കർ തലവൻ മസൂദ് അസ്ഹറിന്റെ കുടുംബാംഗങ്ങൾ ഉൾപ്പെടെയുള്ള പ്രമുഖ ഭീകരർ കൊല്ലപ്പെട്ടു. ഇന്ത്യയുടെ ശക്തമായ തിരിച്ചടിയിൽ പതറിയ പാക്കിസ്ഥാൻ ഒടുവിൽ വെടിനിർത്തലിനായി അപേക്ഷിക്കുന്ന കാഴ്ചയാണ് കണ്ടത്. തുടർന്ന് നടന്ന ‘ഓപ്പറേഷൻ മഹാദേവ്’ എന്ന തിരച്ചിൽ നടപടിയിലൂടെ ജൂലൈ 28-ന് ആക്രമണത്തിന്റെ മുഖ്യസൂത്രധാരൻ ഹാഷിം മൂസ ഉൾപ്പെടെയുള്ള മൂന്ന് ഭീകരരെ സുരക്ഷാസേന വധിക്കുകയും ചെയ്തു.
പഹൽഗാം ആക്രമണത്തിന്റെ വാർഷികത്തിൽ പാക്കിസ്ഥാന് കർശന മുന്നറിയിപ്പുമായി ഇന്ത്യൻ സൈന്യം രംഗത്തെത്തിയിട്ടുണ്ട്. ചില അതിർത്തികൾ ഒരിക്കലും മുറിച്ചുകടക്കാനുള്ളതല്ലെന്നും, ഇന്ത്യയുടെ സമാധാനം തകർക്കാൻ ശ്രമിക്കുന്നവർക്ക് ഇനിയും കനത്ത വില നൽകേണ്ടി വരുമെന്നും സൈന്യം വ്യക്തമാക്കി. വാർഷികത്തോടനുബന്ധിച്ച് പഹൽഗാം മേഖലയിൽ കനത്ത സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്. കൊല്ലപ്പെട്ടവരുടെ ഓർമ്മയ്ക്കായി അനന്ത്നാഗിലെ ലിഡ്ഡർ നദിക്കരയിൽ അവരുടെ പേരുകൾ ആലേഖനം ചെയ്ത ശിലാഫലകം സ്ഥാപിച്ചിട്ടുണ്ട്.
പഹൽഗാം ഭീകരാക്രമണത്തിന്റെ ഒന്നാം വാർഷികത്തിൽ പ്രധാനമന്ത്രി നരേന്ദ്രമോദി രാജ്യത്തിന് വേണ്ടി ജീവൻ അർപ്പിച്ച ബലിദാനികൾക്ക് ആദരാഞ്ജലികൾ അർപ്പിച്ചു. ഇന്ത്യ ഒരിക്കലും തലകുനിക്കില്ലെന്നും ഭീകരരുടെ ഹീനമായ ലക്ഷ്യങ്ങൾ ഒരിക്കലും വിജയിക്കില്ലെന്നും ഭീകരതയ്ക്കെതിരെ രാജ്യം ഒറ്റക്കെട്ടായി നിലകൊള്ളുമെന്നും പ്രധാനമന്ത്രി വ്യക്തമാക്കി.
