കീവ്: യുക്രെയ്നിലെ ചെർണോബിൽ ആണവനിലയത്തിന് സമീപമുള്ള ആണവ ഇന്ധനം കൈകാര്യം ചെയ്യുന്ന കേന്ദ്രത്തിന് നേരെ റഷ്യൻ ഡ്രോൺ ആക്രമണം. ഞായറാഴ്ച പുലർച്ചെ 2:10 നാണ് ലോകത്തെ ഏറ്റവും വലിയ ആണവ ദുരന്തത്തിന് സാക്ഷ്യം വഹിച്ച ചെർണോബിൽ പവർ പ്ലാൻ്റിന് 15 കിലോമീറ്റർ അകലെയുള്ള സെൻട്രലൈസ്ഡ് സ്പെൻ്റ് ഫ്യൂവൽ സ്റ്റോറേജ് ഫെസിലിറ്റിക്ക് നേരെ റഷ്യൻ ഷഹീദ് ഡ്രോൺ പതിച്ചത്.
ആണവ അവശിഷ്ടങ്ങൾ അടങ്ങിയ കണ്ടെയ്നറുകൾ സ്വീകരിക്കുന്ന കെട്ടിടത്തിന്റെ ഒരു ഭാഗം ആക്രമണത്തിൽ ഭാഗികമായി തകർന്നു. ഡ്രോൺ പതിച്ചതിനെത്തുടർന്ന് കെട്ടിടത്തിൽ തീപിടിത്തമുണ്ടായെങ്കിലും, അഗ്നിശമനസേനാംഗങ്ങൾ ഒരു മണിക്കൂറിനുള്ളിൽ അത് പൂർണ്ണമായി അണച്ചു. ആക്രമണം നടക്കുന്ന സമയത്ത് ഭാഗികമായി തകർന്ന ആ കെട്ടിടത്തിനുള്ളിൽ ഉപയോഗിച്ച ആണവ ഇന്ധനങ്ങൾ സൂക്ഷിച്ചിരുന്നില്ല എന്നത് വലിയൊരു ദുരന്തം ഒഴിവാക്കി.
മേഖലയിലെ റേഡിയേഷൻ അളവ് നിലവിൽ സാധാരണ നിലയിലാണെന്ന് യുക്രെയ്ൻ ആണവ ഏജൻസിയും അന്താരാഷ്ട്ര ആണവോർജ ഏജൻസിയും ഔദ്യോഗികമായി സ്ഥിരീകരിച്ചിട്ടുണ്ട്. റഷ്യ ബോധപൂർവമാണ് അതിപ്രധാനമായ ഈ ആണവ അടിസ്ഥാന സൗകര്യത്തിന് നേരെ ആക്രമണം നടത്തിയത്. മോസ്കോയുടെ ഈ ധിക്കാരപരമായ നടപടി അന്താരാഷ്ട്ര നിയമങ്ങളെ കാറ്റിൽപ്പറത്തുന്നതും ആണവ സുരക്ഷയെ പൂർണമായും തകിടം മറിക്കുന്നതുമാണെന്ന് യുക്രെയ്ൻ പ്രസിഡൻ്റ് വൊളോഡിമിർ സെലൻസ്കി വ്യക്തമാക്കി.
റഷ്യ-യുക്രെയ്ൻ യുദ്ധം ആരംഭിച്ചിട്ട് 565 ദിവസങ്ങൾ ആയിട്ടും ഇരുരാജ്യങ്ങളും തമ്മിലുള്ള സംഘർഷം അതിരൂക്ഷമായി തുടരുകയാണ്. ഇരുരാജ്യങ്ങളും പരസ്പരം വ്യോമാക്രമണങ്ങളും ദീർഘദൂര ഡ്രോൺ ആക്രമണങ്ങളും ശക്തമാക്കിയിരിക്കുന്ന സാഹചര്യമാണ് നിലവിലുള്ളത്. യുക്രെയ്ൻ നഗരങ്ങളെയും ഊർജ്ജ-അടിസ്ഥാന സൗകര്യങ്ങളെയും ലക്ഷ്യമിട്ട് റഷ്യ അത്യാധുനിക മിസൈലുകളും നൂറുകണക്കിന് ഡ്രോണുകളും ഉപയോഗിച്ച് വലിയ രീതിയിലുള്ള ബോംബാക്രമണങ്ങൾ നടത്തുന്നുണ്ട്.
റഷ്യയുടെ രണ്ടാമത്തെ വലിയ നഗരമായ സെന്റ് പീറ്റേഴ്സ്ബർഗിലെ സൈനിക താവളങ്ങൾ, ഓയിൽ ടെർമിനലുകൾ എന്നിവയ്ക്ക് നേരെ യുക്രെയ്ൻ കഴിഞ്ഞ ദിവസങ്ങളിൽ ഡ്രോണുകൾ ഉപയോഗിച്ച് ശക്തമായ ആക്രമണം നടത്തിയിരുന്നു. കൂടാതെ റഷ്യയിലെ ക്രാസ്നോദർ മേഖലയിലെ ഓയിൽ ഡിപ്പോകൾക്ക് നേരെയും യുക്രെയ്ൻ ആക്രമണം അഴിച്ചുവിട്ടു.
2022 ഫെബ്രുവരി 24-നാണ് റഷ്യ യുക്രെയ്ന് നേരെ പൂർണ്ണതോതിലുള്ള അധിനിവേശം ആരംഭിച്ചത്. യുക്രെയ്ൻ ഭൂപ്രദേശത്തിന്റെ ഏകദേശം 20 ശതമാനത്തോളം ഭാഗം ഇപ്പോഴും റഷ്യൻ അധിനിവേശത്തിലാണ്. എങ്കിലും, യുദ്ധമുന്നണിയിൽ വൻ മുന്നേറ്റങ്ങൾ നടത്താൻ റഷ്യൻ സൈന്യത്തിന് സാധിക്കുന്നില്ലെന്ന് നയതന്ത്ര വിദഗ്ദ്ധർ വിലയിരുത്തുന്നു.
അതിനിടെ സമാധാന ചർച്ചകൾക്കും വെടിനിർത്തലിനും തയ്യാറാണെന്ന് കാണിച്ച് യുക്രെയ്ൻ പ്രസിഡന്റ് വൊളോഡിമിർ സെലൻസ്കി റഷ്യൻ പ്രസിഡന്റ് വ്ലാഡിമിർ പുടിന് തുറന്ന കത്തയച്ചിരുന്നു. എന്നാൽ, യുക്രെയ്നുമായി മുഖാമുഖം ചർച്ച നടത്തുന്നതിൽ നിലവിൽ യാതൊരു കാര്യവുമില്ലെന്ന് പറഞ്ഞ് പുടിൻ ഈ ചർച്ചാ ക്ഷണം പരസ്യമായി നിരസിച്ചു. റഷ്യ ഉദ്ദേശിച്ച ലക്ഷ്യങ്ങൾ നേടാതെ സൈനിക നടപടി അവസാനിപ്പിക്കില്ലെന്നാണ് പുടിന്റെ നിലപാട്.
