ദുബായ്: ഇറാനുമായുള്ള എല്ലാവിധ വാണിജ്യ, സാമ്പത്തിക ഇടപാടുകളും യുഎഇ ഇനിയൊരു അറിയിപ്പുണ്ടാകുന്നത് വരെ പൂർണ്ണമായി നിർത്തിവെച്ചു. മേഖലയിൽ വർദ്ധിച്ചുവരുന്ന മിസൈൽ ഭീഷണികളെയും സമുദ്രഗതാഗതത്തിന് നേരെയുള്ള ആക്രമണങ്ങളെയും തുടർന്നാണ് യുഎഇ ഈ അടിയന്തര നടപടി സ്വീകരിച്ചത്. മറ്റൊരു ഉത്തരവ് ഉണ്ടാകുന്നത് വരെ ഈ തീരുമാനം പ്രാബല്യത്തിലുണ്ടാകുമെന്ന് യുഎഇ വിദേശകാര്യ മന്ത്രാലയം അറിയിച്ചു.
ഇറാനിൽ നിന്ന് തങ്ങൾക്ക് നേരെ രണ്ട് ബാലിസ്റ്റിക് മിസൈലുകൾ വിക്ഷേപിച്ചതായി യുഎഇ പ്രതിരോധ മന്ത്രാലയം കണ്ടെത്തി. ഇതിൽ ഒരെണ്ണം യുഎഇയുടെ സമുദ്രാതിർത്തിക്കുള്ളിലാണ് പതിച്ചത്. ഹോർമുസ് കടലിടുക്കിലൂടെയുള്ള സമുദ്രഗതാഗതത്തെയും യുഎഇയുടെ ADNOC കപ്പലുകളെയും ലക്ഷ്യം വെച്ചായിരുന്നു ഈ ആക്രമണങ്ങളെന്ന് യുഎഇ വിലയിരുത്തുന്നു. മിസൈൽ ഭീഷണിയെ തുടർന്ന് താമസക്കാർക്ക് ആദ്യം ജാഗ്രതാ നിർദ്ദേശം നൽകിയിരുന്നെങ്കിലും, നിലവിൽ രാജ്യത്തെ സാഹചര്യം പൂർണ്ണമായും സുരക്ഷിതമാണെന്നും ജനങ്ങൾ സാധാരണ ജീവിതത്തിലേക്ക് മടങ്ങണമെന്നും അധികൃതർ അറിയിച്ചിട്ടുണ്ട്.
സാമ്പത്തിക താൽപര്യങ്ങൾ സംരക്ഷിക്കുന്നതിനും മേഖലയിലെ സമാധാനവും സുസ്ഥിരതയും ഉറപ്പു വരുത്തുന്നതിനുമാണ് ഈ നടപടിയെന്ന് യുഎഇ വ്യക്തമാക്കി. പ്രാദേശികവും അന്തർദ്ദേശീയവുമായ സമാധാനത്തിന് ഭീഷണിയാകുന്ന തരത്തിലുള്ള വെല്ലുവിളികളെ നേരിടാൻ തങ്ങൾ പൂർണ സജ്ജരാണെന്ന് യുഎഇ പ്രതിരോധ മന്ത്രാലയം ആവർത്തിച്ചു.
യുഎസും ഇറാനും തമ്മിൽ മുൻപ് ഉണ്ടാക്കിയിരുന്ന 60 ദിവസത്തെ താൽക്കാലിക വെടിനിർത്തൽ ധാരണാപത്രത്തിന്റെ (MoU) കാലാവധി കഴിഞ്ഞ ദിവസം അവസാനിച്ചിരുന്നു. ഇത് പുതുക്കാൻ ഇരുപക്ഷവും തയ്യാറായിട്ടില്ല. ഇറാനുമായി നിലവിൽ യാതൊരുവിധ ചർച്ചകളും നടക്കുന്നില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കിയിട്ടുണ്ട്. ചർച്ചകൾ സ്തംഭിച്ചതോടെ ഇറാന്റെ സൈന്യം പൂർണ്ണമായും ‘ആക്രമണോത്സുക’ നിലപാടിലേക്ക് മാറുമെന്ന് ഇറാൻ ഔദ്യോഗികമായി അറിയിച്ചു.
അതേസമയം ഹോർമുസ് കടലിടുക്കിലൂടെ സഞ്ചരിക്കുകയായിരുന്ന ഒരു വാണിജ്യ കപ്പലിന് നേരെ അജ്ഞാത വിക്ഷേപണി ഉപയോഗിച്ച് ആക്രമണമുണ്ടായി. ആക്രമണത്തിൽ കപ്പലിന്റെ എൻജിൻ റൂമിന് കേടുപാടുകൾ സംഭവിക്കുകയും ഒരു ജീവനക്കാരൻ മരണപ്പെടുകയും ചെയ്തു. ഇറാന്റെ സമ്മർദ്ദ തന്ത്രങ്ങളുടെ ഭാഗമായാണ് ഈ ആക്രമണമെന്നാണ് അന്താരാഷ്ട്ര ഏജൻസികൾ വിലയിരുത്തുന്നത്. മേഖലയിലെ സുരക്ഷാ സാഹചര്യങ്ങൾ അതിവേഗം മാറിക്കൊണ്ടിരിക്കുകയാണ്. സമാധാന ചർച്ചകൾ പൂർണ്ണമായും പരാജയപ്പെട്ടതോടെ മേഖല വീണ്ടും ഒരു യുദ്ധഭീതിയിലാണ്.
ഹോർമുസ് കടലിടുക്കിൽ ഇറാനുമായി ഒമാൻ സഹകരിച്ചാൽ കനത്ത തിരിച്ചടി നേരിടേണ്ടിവരുമെന്ന് ട്രംപ്
