കാലിഫോർണിയ: അമേരിക്കൻ വ്യോമസേനയുടെ ബി-52 സ്ട്രാറ്റോഫോർട്രെസ് (B-52 Stratofortress) ഹെവി ബോംബർ വിമാനം തകർന്നുവീണ് എട്ട് പേർ കൊല്ലപ്പെട്ടു. ജൂൺ 15 തിങ്കളാഴ്ച പ്രാദേശിക സമയം രാവിലെ 11:20 ഓടെ, സതേൺ കാലിഫോർണിയയിലെ മൊജാവേ മരുഭൂമിയിലുള്ള എഡ്വേർഡ്സ് എയർഫോഴ്സ് ബേസിലാണ് ഈ ദരുണമായ അപകടം സംഭവിച്ചത്.
വ്യോമതാവളത്തിൽവെച്ച് പതിവ് പരീക്ഷണ പറക്കലിനായി ടേക്ക് ഓഫ് ചെയ്ത ഉടൻ വിമാനത്തിന് തീപിടിക്കുകയായിരുന്നു. വ്യോമസേനാ ഉദ്യോഗസ്ഥർ, ഗവൺമെന്റ് സിവിലിയന്മാർ, വിമാന നിർമ്മാതാക്കളായ ‘ബോയിങ്’ (Boeing) കമ്പനിയുടെ രണ്ട് ജീവനക്കാർ എന്നിവരടങ്ങുന്ന ഒരു സംഘമാണ് വിമാനത്തിലുണ്ടായിരുന്നത്. വിമാനത്തിലുണ്ടായിരുന്ന എട്ടുപേരും അപകടസ്ഥലത്തുതന്നെ മരണപ്പെട്ടു. ആരും രക്ഷപ്പെടാൻ സാധ്യതയില്ലാത്ത വിധം വിമാനം പൂർണ്ണമായി കത്തിയമർന്നു എന്ന് വ്യോമസേനാ ഉദ്യോഗസ്ഥർ സ്ഥിരീകരിച്ചു.
ആണവായുധങ്ങൾ വഹിക്കാൻ ശേഷിയുള്ളതും ദശകങ്ങളായി യു.എസ് സേനയുടെ കരുത്തുമായ ബി-52 വിമാനത്തിന്റെ റഡാർ നവീകരണവുമായി ബന്ധപ്പെട്ട ടെസ്റ്റിങ്ങിനിടെയാണ് അപകടം. സംഭവത്തിൽ യു.എസ് സൈന്യം ഉന്നതതല അന്വേഷണം പ്രഖ്യാപിച്ചിട്ടുണ്ട്.
