സെവൂട്ട: മൊറോക്കോയിൽനിന്ന് ആയിരക്കണക്കിന് അഭയാർഥികൾ സ്പെയിൻ്റെ അധീനതയിലുള്ള വടക്കേ ആഫ്രിക്കൻ അതിർത്തി നഗരമായ സെവൂട്ടയിലേക്ക് (Ceuta) കൂട്ടത്തോടെ കടന്നുകയറിയതിനെത്തുടർന്നുണ്ടായ സംഘർഷത്തിലും അപകടങ്ങളിലും 18 പേർ മരിച്ചു. കടൽമാർഗവും അതിർത്തിവേലി തകർത്തും യൂറോപ്പിലേക്ക് പ്രവേശിക്കാൻ ശ്രമിച്ചവരാണ് മരണപ്പെട്ടത്.
മൊറോക്കോയുമായി അതിർത്തി പങ്കിടുന്ന സെവൂട്ടയിലെ താരാഹൽ (Tarajal) അതിർത്തി പൂർണ്ണമായും തകർത്തുകൊണ്ട് ആയിരക്കണക്കിന് അഭയാർഥികൾ ഒരേസമയം ഇരച്ചുകയറുകയായിരുന്നു. അതിർത്തിയിലെ സ്ഥിതിഗതികൾ നിയന്ത്രണാതീതമായതോടെ ക്രമസമാധാനം വീണ്ടെടുക്കാൻ സ്പാനിഷ് സർക്കാർ അതിർത്തിയിൽ സൈന്യത്തെ വിന്യസിച്ചു. സെവൂട്ടയിലെ പ്രാദേശിക ഭരണകൂടം കൂടുതൽ സേനയെ വിന്യസിക്കാൻ ആവശ്യപ്പെട്ടതിനു പിന്നാലെയാണ് നടപടി.
കടൽമാർഗം എത്തുന്ന അഭയാർഥികളെ നിയമപരമായ നടപടിക്രമങ്ങൾ പാലിക്കാതെ ഉടനടി തിരിച്ചയക്കുന്നത് സ്പാനിഷ് സുപ്രീം കോടതി വിലക്കിയിരുന്നു. മനുഷ്യക്കടത്ത് സംഘങ്ങൾ ഈ വിധി ചൂഷണം ചെയ്തതാണ് അഭയാർഥികളുടെ പെട്ടെന്നുള്ള കുത്തൊഴുക്കിന് കാരണമായി അധികൃതർ ചൂണ്ടിക്കാണിക്കുന്നത്. മെച്ചപ്പെട്ട സാമ്പത്തിക അവസരങ്ങൾ തേടി യൂറോപ്പിലേക്കു കടക്കാൻ ശ്രമിക്കുന്ന അഭയാർഥികളുടെ പ്രധാന പ്രവേശന കവാടമാണ് സ്പെയിൻ.
ഈ അഭയാർഥി പ്രവാഹം യൂറോപ്യൻ രാജ്യങ്ങൾക്കിടയിലും രാഷ്ട്രീയ തർക്കങ്ങൾക്ക് കാരണമായിട്ടുണ്ട്. സ്പെയിനുമായുള്ള തുറന്ന അതിർത്തി കരാർ (Schengen Area) താൽക്കാലികമായി റദ്ദാക്കണമെന്ന് ഇറ്റലി ഉൾപ്പെടെയുള്ള രാജ്യങ്ങൾ ആവശ്യപ്പെട്ടു.
