സന: ചെങ്കടലിലെ തന്ത്രപ്രധാനമായ ഗ്രേറ്റർ ഹനിഷ് (Greater Hanish), ലെസർ ഹനിഷ് (Lesser Hanish) ദ്വീപുകൾ യമനിലെ ഹൂതി വിമതർ പിടിച്ചെടുത്തു. ചെങ്കടലിനെയും ഏദൻ ഉൾക്കടലിനെയും ബന്ധിപ്പിക്കുന്ന പ്രധാന കപ്പൽപാതയായ ബാബ് അൽ മന്ദേബ് (Bab al-Mandeb) മേഖലയിൽ തങ്ങളുടെ സ്വാധീനം ശക്തമാക്കുന്നതിന്റെ ഭാഗമായാണ് ഹൂതികളുടെ ഈ പുതിയ സൈനിക മുന്നേറ്റം. ഇതോടെ പ്രധാന അന്താരാഷ്ട്ര കപ്പൽപാതയായ ബാബ് അൽ മന്ദേബ് മേഖലയിൽ ഹൂതികളുടെ നിയന്ത്രണം കൂടുതൽ ശക്തമായി.
വിമതരുടെ പടിഞ്ഞാറൻ തീരത്തെ അതിവേഗ മുന്നേറ്റം ചെറുക്കാൻ ശ്രമിക്കുന്നതിനിടെയാണ് യമൻ സർക്കാർ സേനയുടെ അധീനതയിലുണ്ടായിരുന്ന കൂടുതൽ ദ്വീപുകൾ നഷ്ടമായിരിക്കുന്നത്. ഇതിനു തൊട്ടുമുമ്പ് തന്ത്രപ്രധാനമായ മോക്കാ (Mocha) തുറമുഖ നഗരവും, ബാബ് അൽ മന്ദേബ് കടലിടുക്കിലെ പ്രധാനപ്പെട്ട മയ്യുൻ (Perim) ദ്വീപും ഹൂതികൾ പിടിച്ചെടുത്തിരുന്നു. ഇതോടെ യമന്റെ ചെങ്കടൽ തീരപ്രദേശം പൂർണ്ണമായും ഹൂതികളുടെ നിയന്ത്രണത്തിലായിരിക്കുകയാണ്.
അതിനിടെ സൗദി അറേബ്യയിലെ തെക്കൻ നഗരമായ ഖമീസ് മുശൈത്തിലെ കിങ് ഖാലിദ് വ്യോമതാവളത്തിന് നേരെ മിസൈൽ, ഡ്രോൺ ആക്രമണം നടത്തിയതായി ഹൂതികൾ അവകാശപ്പെട്ടു. ബാലിസ്റ്റിക് മിസൈലുകളും ഡ്രോണുകളും ഉപയോഗിച്ചാണ് വ്യോമതാവളം ലക്ഷ്യമിട്ടതെന്ന് ഹൂതി സൈനിക വക്താവ് യഹ്യ സരി പ്രസ്താവനയിൽ അറിയിച്ചു. യമനിൽ സൗദി നടത്തിയ വ്യോമാക്രമണങ്ങൾക്ക് മറുപടിയായാണ് ആക്രമണമെന്നാണ് ഹൂതികളുടെ വിശദീകരണം. കഴിഞ്ഞ അഞ്ച് ദിവസത്തിനിടെ യെമനിലെ വിവിധ പ്രവിശ്യകളിലായി സൗദി എഫ്-15, ടൈഫൂൺ യുദ്ധവിമാനങ്ങൾ എന്നിവ ഉപയോഗിച്ച് മുന്നൂറിലേറെ ആക്രമണങ്ങൾ നടത്തിയതായും ഹൂതികൾ ആരോപിച്ചു.
അതേസമയം, ചെങ്കടലിലെ കപ്പലുകൾക്കെതിരെയും സൗദിയിലെ എണ്ണ അടിസ്ഥാന സൗകര്യങ്ങൾക്കെതിരെയും നടക്കുന്ന ആക്രമണങ്ങളും മേഖലയിൽ സംഘർഷം രൂക്ഷമാക്കുകയാണ്. ചെങ്കടൽ വഴിയുള്ള കപ്പൽഗതാഗതം തടസപ്പെടുന്നത് ആഗോള എണ്ണ വിതരണത്തെയും വിലയെയും പ്രതികൂലമായി ബാധിക്കും. ഇറാൻ ഹോർമുസ് കടലിടുക്ക് അടച്ചതിനെത്തുടർന്ന്, സൗദി തങ്ങളുടെ എണ്ണ കയറ്റുമതിക്കായി ആശ്രയിച്ചിരുന്നത് ബാബ് അൽ മന്ദേബ് ചെങ്കടൽ പാതയെയായിരുന്നു. എന്നാൽ ഈ തീരം ഹൂതികൾ പിടിച്ചെടുത്തതോടെ സൗദിയുടെ എണ്ണക്കപ്പൽ നീക്കം പൂർണ്ണമായി പ്രതിസന്ധിയിലായി. സുരക്ഷാ മുൻകരുതലിന്റെ ഭാഗമായി സൗദി തങ്ങളുടെ പ്രധാന ഈസ്റ്റ്-വെസ്റ്റ് ഓയിൽ പൈപ്പ്ലൈൻ താൽക്കാലികമായി അടച്ചുപൂട്ടിയിരിക്കുകയാണ്.
ഹൂതികളുടെ അപ്രതീക്ഷിത മുന്നേറ്റത്തിൽ ആശങ്കയിലായ സൗദി കിരീടാവകാശി മുഹമ്മദ് ബിൻ സൽമാൻ യു എസ് സെൻട്രൽ കമാൻഡ് (CENTCOM) മേധാവിയുമായി അടിയന്തര കൂടിക്കാഴ്ച നടത്തി. ഇതിനെത്തുടർന്ന് യു എസ് സൈന്യവും സൗദിയും ചേർന്ന് സംയുക്ത സൈനിക കമാൻഡ് രൂപീകരിച്ചു.
ഹൂതികളുടെ ഈ പുതിയ മുന്നേറ്റം ജിബൂട്ടിയിലുള്ള അമേരിക്കയുടെ പ്രധാന സൈനിക താവളത്തിൽ നിന്നും വെറും 32 കിലോമീറ്റർ മാത്രം അകലെയാണ്. അമേരിക്കൻ പ്രസിഡന്റ് ഡൊണാൾഡ് ട്രംപ് ഈ വിഷയത്തിൽ ഒരു നിർണ്ണായക വെളിപ്പെടുത്തൽ നടത്തിയിട്ടുണ്ട്. അമേരിക്ക തങ്ങൾക്കെതിരെ സൈനികമായി ഇടപെടരുതെന്നും, തങ്ങൾക്ക് അമേരിക്കയുമായി യുദ്ധം ചെയ്യാൻ താല്പര്യമില്ലെന്നും കാണിച്ച് ഹൂതി വിമതർ വാഷിംഗ്ടണെ നേരിട്ട് ബന്ധപ്പെട്ടതായി ട്രംപ് അറിയിച്ചു. സൗദി കപ്പലുകൾ ഒഴികെയുള്ള മറ്റ് അന്താരാഷ്ട്ര ചരക്കുകപ്പലുകളെ സുരക്ഷിതമായി കടന്നുപോകാൻ അനുവദിക്കാമെന്ന് ഹൂതികൾ അമേരിക്കയ്ക്ക് ഉറപ്പുനൽകിയിട്ടുണ്ട്.
യെമനിലെ ഹൂതികളുടെ ഈ പെട്ടെന്നുള്ള മുന്നേറ്റങ്ങൾക്ക് പിന്നിൽ തങ്ങളാണെന്ന വാദങ്ങളെ ഇറാൻ ഔദ്യോഗികമായി നിഷേധിച്ചു. തങ്ങൾക്ക് ഇതിൽ പങ്കില്ലെന്നും ഇത് ഹൂതികളുടെ സ്വന്തം പോരാട്ടമാണെന്നുമാണ് ഇറാന്റെ നിലപാട്. ഈ പുതിയ സംഘർഷങ്ങളെ തുടർന്ന് ഗൾഫ് രാജ്യങ്ങളും ഇറാനും തമ്മിൽ ഒമാനിൽ വെച്ച് നടത്താനിരുന്ന സുപ്രധാന ചർച്ചകൾ സൗദി അറേബ്യയും മറ്റ് ഗൾഫ് രാജ്യങ്ങളും ചേർന്ന് റദ്ദാക്കി.
ഈ വൻ സംഘർഷത്തെ തുടർന്ന് അന്താരാഷ്ട്ര വിപണിയിൽ അസംസ്കൃത എണ്ണവില കുതിച്ചുയരുകയാണ്. ബ്രെന്റ് ക്രൂഡ് ഓയിൽ വില ബാരലിന് 107 ഡോളറിന് മുകളിലേക്ക് എത്തിയിട്ടുണ്ട്. ബാബ് അൽ മന്ദേബിലൂടെയുള്ള ആഗോള വ്യാപാരം തടസ്സപ്പെടുമെന്ന ഭീതി നിലനിൽക്കുന്നതിനാൽ വരും ദിവസങ്ങളിൽ ഇന്ധനവില ഇനിയും വർദ്ധിച്ചേക്കാം.
