മസ്‌ക്കറ്റ്: ഒമാൻ വടക്കൻ തീരത്തെ സോഹാർ (Sohar) തുറമുഖത്തിന് സമീപം വാണിജ്യ എണ്ണക്കപ്പലിന് നേരെ ഉണ്ടായ ഡ്രോൺ ആക്രമണത്തെ തുടർന്ന് രണ്ട് ഇന്ത്യൻ നാവികരെ കാണാതായി. ‘പെട്രോ ഡോൾഫിൻ’ (MT Petro Dolphin) എന്ന എണ്ണക്കപ്പലിന് നേരെയാണ് ഞായറാഴ്ച ആക്രമണം ഉണ്ടായത്.
കപ്പലിൽ ആകെ 11 ഇന്ത്യൻ നാവികരാണ് ഉണ്ടായിരുന്നത്. ഇതിൽ ഒമ്പതു പേരെ സുരക്ഷിതമായി രക്ഷപ്പെടുത്തിയിട്ടുണ്ട്. കാണാതായ ബാക്കി രണ്ട് പേർക്കായി ഒമാൻ കോസ്റ്റ് ഗാർഡിന്റെ നേതൃത്വത്തിൽ തിരച്ചിൽ തുടരുകയാണ്. ആക്രമണ വിവരം കേന്ദ്ര തുറമുഖ ഷിപ്പിങ് വകുപ്പ് മന്ത്രി സർബാനന്ദ സോനോവാൾ സ്ഥിരീകരിച്ചു. സംഭവത്തിൽ അന്വേഷണം തുടരുന്നതായി ഒമാനിലെ ഇന്ത്യൻ എംബസി അറിയിച്ചു. പശ്ചിമേഷ്യയിൽ സാഹചര്യം സങ്കീർണമാകുന്നതിനിടെ ആണ് ഏറ്റവും പുതിയ ആക്രമണം ഉണ്ടായിരിക്കുന്നത്.
ആക്രമണത്തെ കേന്ദ്ര വിദേശകാര്യ മന്ത്രാലയം അപലപിച്ചു. ഇന്ത്യൻ നാവികരുടെ സുരക്ഷയ്ക്കാണ് സർക്കാർ പ്രഥമ പരിഗണന നൽകുന്നതെന്നും മേഖലയിലെ വാണിജ്യ കപ്പലുകൾക്ക് നേരെ ആവർത്തിച്ചുണ്ടാകുന്ന ആക്രമണങ്ങൾ അതീവ ആശങ്കാജനകമാണെന്നും വിദേശകാര്യ മന്ത്രാലയം പ്രസ്താവനയിൽ അറിയിച്ചു.
ഇതിനുപുറമേ, ഞായറാഴ്ച ഹോർമുസ് കടലിടുക്കിലും അറേബ്യൻ ഗൾഫിലും മറ്റ് രണ്ട് കപ്പലുകൾക്ക് നേരെയും സമാനമായ ആക്രമണങ്ങളും തീപിടിത്തവും റിപ്പോർട്ട് ചെയ്തിട്ടുണ്ട്. എന്നാൽ അവയിലെ ജീവനക്കാരെയെല്ലാം സുരക്ഷിതമായി രക്ഷപ്പെടുത്തിയതായാണ് വിവരം.
റിയാദ് വിമാനത്താവള ആക്രമണത്തിൽ പരുക്കേറ്റവരിൽ 11 ഇന്ത്യക്കാരും; ഒരാൾ മരിച്ചു
സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിന് (King Khalid International Airport) നേരെയുണ്ടായ ഹൂതികളുടെ മിസൈൽ ആക്രമണത്തിൽ പരിക്കേറ്റവരിൽ 11 ഇന്ത്യക്കാരും ഉൾപ്പെടുന്നു. പരുക്കേറ്റ് ചികിത്സയിലായിരുന്ന ഹൈദരാബാദ് സ്വദേശിയായ മുഹമ്മദ് യൂസുഫ് അലി എന്ന ഇന്ത്യൻ പൗരൻ മരണപ്പെട്ടതായി റിയാദിലെ ഇന്ത്യൻ എംബസി സ്ഥിരീകരിച്ചിട്ടുണ്ട്. വിമാനത്താവളത്തിന് നേരെയുണ്ടായ വൻ ആക്രമണത്തിൽ 12 പേർ കൊല്ലപ്പെടുകയും മുന്നൂറിലധികം (309) പേർക്ക് പരിക്കേൽക്കുകയും ചെയ്‌തിരുന്നു.
പരിക്കേറ്റ ഇന്ത്യക്കാരുടെ ആരോഗ്യനില റിയാദിലെ ഇന്ത്യൻ എംബസി നിരന്തരമായി നിരീക്ഷിച്ചുവരികയാണ്. സൗദി അധികൃതരുമായും ആശുപത്രി അധികൃതരുമായും ബന്ധപ്പെട്ട് ഇവർക്ക് ആവശ്യമായ എല്ലാ സഹായങ്ങളും ഉറപ്പാക്കുന്നുണ്ട്. കൂടാതെ, സൗദിയിലെ ഇന്ത്യൻ പൗരന്മാരോട് ജാഗ്രത പാലിക്കാനും എംബസി നിർദ്ദേശിച്ചിട്ടുണ്ട്.
യെമനിലെ ഹൂതി വിമതരാണ് വിമാനത്താവളത്തിന് നേരെ ആക്രമണം നടത്തിയത്. റിയാദ് വിമാനത്താവള ആക്രമണത്തിന് പിന്നാലെ യെമനിലെ ഹൂതി കേന്ദ്രങ്ങൾ ലക്ഷ്യമാക്കി സൗദി സഖ്യസേന ശക്തമായ സൈനിക തിരിച്ചടി തുടരുകയാണ്. കഴിഞ്ഞ മണിക്കൂറുകളിൽ വലിയ തോതിലുള്ള വ്യോമാക്രമണങ്ങളാണ് യെമനിലെ വിവിധ ഹൂതി കോട്ടകളിൽ സഖ്യസേന നടത്തിയത്. ഹൂതികൾ മിസൈൽ തൊടുക്കാൻ ഉപയോഗിച്ച മൂന്ന് പ്രധാന മിസൈൽ ലോഞ്ചറുകൾ, ആയുധപ്പുരകൾ, പീരങ്കി കേന്ദ്രങ്ങൾ, അവരുടെ കമാൻഡ് ആൻഡ് കൺട്രോൾ സെന്ററുകൾ എന്നിവ വ്യോമാക്രമണത്തിൽ തകർക്കപ്പെട്ടിട്ടുണ്ട്. കൂടാതെ 250-ലധികം സൈനിക വാഹനങ്ങളും നശിപ്പിച്ചു.
ആക്രമണത്തെ കടുത്ത ഭാഷയിൽ അപലപിച്ച അമേരിക്കൻ പ്രസിഡന്റ് ഡൊണാൾഡ് ട്രംപ്, ഹൂതികൾക്കെതിരെയുള്ള സൗദിയുടെ നീക്കത്തിൽ അമേരിക്കയും പങ്കാളിയാകുന്നതിനെക്കുറിച്ച് ആലോചിക്കുന്നുണ്ടെന്ന് വ്യക്തമാക്കിയിട്ടുണ്ട്. അതിനിടെ, റിയാദിലെ കിംഗ് ഖാലിദ് വിമാനത്താവളത്തിന് നേരെ വീണ്ടും ഡ്രോൺ/മിസൈൽ ആക്രമണ ശ്രമങ്ങൾ ഉണ്ടായതായും സൗദി വ്യോമ പ്രതിരോധ സേന അവ പ്രതിരോധിച്ചതായും റിപ്പോർട്ടുകളുണ്ട്. മേഖലയിലെ സുരക്ഷാ സാഹചര്യം കണക്കിലെടുത്ത് സൗദിയിൽ കടുത്ത ജാഗ്രതാ നിർദ്ദേശം തുടരുകയാണ്.
റിയാദ് വിമാനത്താവളത്തിന് നേരെ വീണ്ടും ഹൂതി ആക്രമണം; 12 പേർ കൊല്ലപ്പെട്ടു; പ്രവർത്തനം നിർത്തിവെച്ചു.
