ഇസ്ലാമാബാദ്: പാക്കിസ്ഥാനിൽ പ്രമുഖ ടിക് ടോക് താരം ഷംസോ ബീബി (28) വെടിയേറ്റ് കൊല്ലപ്പെട്ടു. സോഷ്യൽ മീഡിയയിൽ ‘ഐഷ ഗിലാമന’ എന്ന പേരിൽ അറിയപ്പെടുന്ന ഇവർക്ക് 13 ലക്ഷത്തിലധികം ഫോളോവേഴ്സ് ഉണ്ട്. പാക്കിസ്ഥാന്റെ സ്വാതന്ത്ര്യദിനമായ ഓഗസ്റ്റ് 14-ന് ഇസ്ലാമാബാദിനടുത്തുള്ള ടാക്സില നഗരത്തിൽ വെച്ചാണ് ഇവർ ആക്രമിക്കപ്പെട്ടത്.
സഹോദരങ്ങൾക്കൊപ്പം കാറിൽ യാത്ര ചെയ്യുന്നതിനിടെ ബൈക്കിലെത്തിയ രണ്ട് അജ്ഞാതർ വണ്ടി തടഞ്ഞുനിർത്തി വെടിയുതിർക്കുകയായിരുന്നു. കഴുത്തിന് വെടിയേറ്റ ഷംസോ ബീബി സംഭവ സ്ഥലത്തുതന്നെ മരണപ്പെട്ടു. വെടിവെയ്പിനെ തുടർന്ന് കാറിന്റെ നിയന്ത്രണം നഷ്ടപ്പെടുകയും മറ്റൊരു വാഹനത്തിൽ ഇടിച്ചു കയറുകയും ചെയ്തതോടെ ഷംസോയുടെ 15 വയസ്സുള്ള സഹോദരി അസീമയ്ക്ക് ഗുരുതരമായി പരിക്കേറ്റിട്ടുണ്ട്. സാമ്പത്തിക തർക്കമാണ് കൊലപാതകത്തിന് പിന്നിലെന്ന് കുടുംബം ആരോപിക്കുന്നത്. സംഭവത്തിൽ ഇതുവരെയും ആരെയും അറസ്റ്റ് ചെയ്യാൻ പോലീസിന് സാധിച്ചിട്ടില്ല.
പാക്കിസ്ഥാനിൽ വനിതാ ഇൻഫ്ലുവൻസർമാർക്ക് നേരെ ഉണ്ടാകുന്ന അക്രമങ്ങൾ വർദ്ധിച്ചു വരുന്ന സാഹചര്യത്തിലാണ് ഈ കൊലപാതകവും നടന്നിട്ടുള്ളത്. കഴിഞ്ഞ ഒരു വർഷത്തിനിടെ പാക്കിസ്ഥാനിൽ കൊല്ലപ്പെടുന്ന അഞ്ചാമത്തെ വനിതാ ടിക് ടോക് താരമാണ് ഷംസോ ബീബി. അടുത്തിടെ സനാ ജാവേദ്, സനാ യൂസഫ്, മെഹക് ഷെഹ്സാദി, സുമീറ രാജ്പുത് എന്നീ സാമൂഹ്യ മാധ്യമ താരങ്ങളും സമാനമായ രീതിയിൽ കൊല്ലപ്പെട്ടിരുന്നു. 2026 മാർച്ചിലാണ് ടിക് ടോക് ക്രിയേറ്റർ സന ജാവേദ് ഇസ്ലാമാബാദിൽ വെടിയേറ്റ് മരിച്ചത്. 2026 മേയിൽ 17 വയസ്സുള്ള പ്രമുഖ ഇൻഫ്ലുവൻസർ സന യൂസഫും സമാനമായ രീതിയിൽ കൊല്ലപ്പെട്ടിരുന്നു. 2025 ജൂലൈയിലാണ് 16 വയസ്സുള്ള ടിക് ടോക് താരം മെഹക് ഷെഹ്സാദി റാവൽപിണ്ടിയിൽ കൊല്ലപ്പെട്ടത്.
