പുട്ടപർത്തി: ഇന്ത്യയുടെ അഞ്ചാം തലമുറ സ്റ്റെൽത്ത് യുദ്ധവിമാന പദ്ധതിയായ അഡ്വാന്സ്ഡ് മീഡിയം കോംബാറ്റ് എയര്ക്രാഫ്റ്റ് (AMCA) അടിസ്ഥാന സൗകര്യ വികസനത്തിന് ഔദ്യോഗികമായി തുടക്കമായി. 15,803 കോടി രൂപ (ഏകദേശം 16,000 കോടി) ചെലവ് പ്രതീക്ഷിക്കുന്ന ഈ നിർണ്ണായക പദ്ധതിയുടെ തറക്കല്ലിടൽ കർമ്മം 2026 മേയ് 15-ന് ആന്ധ്രാപ്രദേശിൽ വെച്ച് നടന്നു.
ആന്ധ്രാപ്രദേശിലെ ശ്രീ സത്യസായി ജില്ലയിലെ പുട്ടപര്ത്തിയില് നടന്ന ചടങ്ങില് കേന്ദ്ര പ്രതിരോധ മന്ത്രി രാജ്നാഥ് സിംഗും മുഖ്യമന്ത്രി എന്. ചന്ദ്രബാബു നായിഡുവും ചേര്ന്നാണ് തറക്കല്ലിട്ടത്. ഇന്ത്യയുടെ സ്വന്തം അത്യാധുനിക സ്റ്റെല്ത്ത് യുദ്ധവിമാനങ്ങള് നിര്മ്മിക്കുന്നതിനുള്ള നിര്ണ്ണായക ചുവടുവെപ്പാണിത്. വ്യോമസേനയുടെ കരുത്ത് വര്ദ്ധിപ്പിക്കുക എന്ന ലക്ഷ്യത്തോടെ ആരംഭിച്ച ഈ പദ്ധതിയോടൊപ്പം ഡ്രോണ് നിര്മ്മാണം ഉള്പ്പെടെയുള്ള മറ്റ് പ്രതിരോധ അനുബന്ധ പദ്ധതികള്ക്കും തുടക്കം കുറിച്ചിട്ടുണ്ട്.
പുട്ടപർത്തിയിലെ 650 ഏക്കർ സ്ഥലത്താണ് കോർ ഇൻ്റഗ്രേഷൻ, ഫ്ലൈറ്റ് ടെസ്റ്റിംഗ് സെന്റർ അടക്കമുള്ള പ്രതിരോധ വ്യാവസായിക സമുച്ചയം ഉയരുന്നത്. ഇന്ത്യൻ പ്രതിരോധ മേഖലയിൽ വലിയ വിപ്ലവം ലക്ഷ്യമിടുന്ന ഈ പദ്ധതി പൂർണ്ണമായും തദ്ദേശീയമായാണ് (Aatmanirbhar Bharat) നടപ്പിലാക്കുന്നത്. ഇതിലൂടെ വിദേശ രാജ്യങ്ങളിൽ നിന്നുള്ള ആയുധ ഇറക്കുമതി കുറയ്ക്കാൻ സാധിക്കും. ഈ വൻകിട പദ്ധതിയിലൂടെ നേരിട്ടും അല്ലാതെയും ഏകദേശം 7,500 പേർക്ക് പുതിയ തൊഴിലവസരങ്ങൾ ലഭിക്കുമെന്ന് പ്രതീക്ഷിക്കുന്നു. ഇതോടെ പ്രതിരോധ ഉല്പ്പാദന രംഗത്തെ പ്രധാന ഹബ്ബായി പുട്ടപര്ത്തി മാറും.
ഇതോടൊപ്പം കർണൂലിൽ നിർമ്മിക്കുന്ന ‘ഡ്രോൺ സിറ്റി’ (Drone City), ഒരു നേവൽ സിസ്റ്റം മാനുഫാക്ചറിംഗ് യൂണിറ്റ് എന്നിവയുടെ നിർമ്മാണത്തിനും തുടക്കമിട്ടിട്ടുണ്ട്. ഈ പദ്ധതികൾ യാഥാർത്ഥ്യമാകുന്നതോടെ യുഎസ്എ, റഷ്യ, ചൈന തുടങ്ങിയ വൻശക്തികൾക്കൊപ്പം സ്വന്തമായി അഞ്ചാം തലമുറ യുദ്ധവിമാനങ്ങൾ വികസിപ്പിക്കുന്ന എലൈറ്റ് രാജ്യങ്ങളുടെ പട്ടികയിലേക്ക് ഇന്ത്യയും ഔദ്യോഗികമായി കടക്കും
