നോർവേ തലസ്ഥാനമായ ഒസ്ലോയിൽ നടന്ന മൂന്നാമത് ഇന്ത്യ-നോർഡിക് ഉച്ചകോടി വിജയകരമായി പൂർത്തിയായി. ഉച്ചകോടിയിൽ ആഗോള ഭീകരവാദത്തിനെതിരെ കടുത്ത നിലപാട് വ്യക്തമാക്കിയ പ്രധാനമന്ത്രി നരേന്ദ്ര മോദി, ഭീകരവാദത്തിന്റെ കാര്യത്തിൽ ഒരു തരത്തിലുള്ള ഇരട്ടത്താപ്പും വിട്ടുവീഴ്ചയും അനുവദിക്കില്ല എന്ന് പ്രഖ്യാപിച്ചു. ഭീകരവാദമെന്ന ആഗോള വിപത്തിനെ നേരിടാൻ അന്താരാഷ്ട്ര സമൂഹം യാതൊരുവിധ വിട്ടുവീഴ്ചയുമില്ലാതെ ഒന്നിച്ച് നിൽക്കണമെന്ന് പ്രധാനമന്ത്രി ആവശ്യപ്പെട്ടു. നോർവേ, ഡെന്മാർക്ക്, ഫിൻലൻഡ്, ഐസ്ലൻഡ്, സ്വീഡൻ എന്നീ അഞ്ച് വടക്കൻ യൂറോപ്യൻ രാജ്യങ്ങളിലെ ഭരണത്തലവന്മാരാണ് ഈ തന്ത്രപ്രധാന ഉച്ചകോടിയിൽ പങ്കെടുത്തത്.
ഭീകരവാദത്തോടുള്ള സമീപനത്തിൽ ഇന്ത്യക്കും നോർഡിക് രാജ്യങ്ങൾക്കും ഒരേ സ്വരമാണുള്ളതെന്ന് ഉച്ചകോടിക്ക് ശേഷമുള്ള സംയുക്ത വാർത്താസമ്മേളനത്തിൽ മോദി വ്യക്തമാക്കി. ഈ വിഷയത്തില് ഒരു തരത്തിലുള്ള ഇരട്ടത്താപ്പും വെച്ചുപൊറുപ്പിക്കാനാകില്ലെന്ന് അദ്ദേഹം കൂട്ടിച്ചേര്ത്തു. ഇതിനൊപ്പം, ഐക്യരാഷ്ട്രസഭ ഉള്പ്പെടെയുള്ള ആഗോള സംഘടനകളില് കാലോചിതമായ പരിഷ്കാരങ്ങള് കൊണ്ടുവരേണ്ടത് ലോകസമാധാനത്തിന് അത്യന്താപേക്ഷിതമാണെന്ന് ഉച്ചകോടിയില് പങ്കെടുത്ത നേതാക്കള് ഐകകണ്ഠ്യേന വിലയിരുത്തി. ഇരുപക്ഷവും തമ്മിലുള്ള ബന്ധത്തെ വിശ്വസനീയമായ ‘ഗ്രീൻ ടെക്നോളജി ആൻഡ് ഇന്നൊവേഷൻ സ്ട്രാറ്റജിക് പാർട്ണർഷിപ്പ്’ (Trusted Green Technology and Innovation Strategic Partnership) ആയി ഉയർത്താൻ ഉച്ചകോടിയിൽ തീരുമാനമായി.
പ്രതിരോധ ചർച്ചകൾക്ക് പുറമെ, ഇരുവിഭാഗങ്ങളും തമ്മിലുള്ള സാമ്പത്തിക-വ്യാപാര സഹകരണം കൂടുതൽ വിപുലമാക്കാനും ഉച്ചകോടിയിൽ തീരുമാനമായി. കഴിഞ്ഞ ഒരു ദശാബ്ദത്തിനിടെ ഇന്ത്യയും നോർഡിക് മേഖലയും തമ്മിലുള്ള ഉഭയകക്ഷി വ്യാപാരത്തിൽ നാലിരട്ടി വർദ്ധനവാണ് രേഖപ്പെടുത്തിയിട്ടുള്ളതെന്ന് പ്രധാനമന്ത്രി ചൂണ്ടിക്കാട്ടി. ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദി വിവിധ രാജ്യങ്ങളിലെ ഭരണത്തലവന്മാരുമായി വ്യക്തിപരമായി കൂടിക്കാഴ്ച നടത്തി.
43 വർഷങ്ങൾക്ക് ശേഷം ഒരു ഇന്ത്യൻ പ്രധാനമന്ത്രി നോർവേ സന്ദർശിക്കുന്നു എന്ന പ്രത്യേകതയും ഈ ഉച്ചകോടിയുമായി ബന്ധപ്പെട്ട ഔദ്യോഗിക പര്യടനത്തിനുണ്ടായിരുന്നു. ഉച്ചകോടി പൂർത്തിയാക്കിയ പ്രധാനമന്ത്രി നരേന്ദ്ര മോദി തന്റെ അടുത്ത വിദേശ സന്ദർശനത്തിനായി ഇറ്റലിയിലേക്ക് തിരിച്ചു.
