ഹോർമുസ് കടലിടുക്കിന്റെ പേര് ‘ട്രംപ് കടലിടുക്ക്’ എന്നാക്കണമെന്ന നിർദേശവുമായി ട്രംപ്

വാഷിങ്ടൺ: ഹോർമുസ് കടലിടുക്കിന്റെ പേര് ‘ട്രംപ് കടലിടുക്ക്’ എന്നാക്കണമെന്ന നിർദേശവുമായി യുഎസ് പ്രസിഡന്റ് ഡോണൾഡ് ട്രംപ്. ഹോർമുസ് കടലിടുക്ക് നിലവിൽ അമേരിക്കയുടെ നിയന്ത്രണത്തിലാണെന്നും ട്രംപ് ട്രൂത്ത് സോഷ്യലിലെ പോസ്റ്റിൽ അവകാശപ്പെട്ടു.

‘ഇപ്പോൾ ഹോർമുസ് കടലിടുക്ക് അമേരിക്കയുടെ നിയന്ത്രണത്തിലായതിനാൽ, അതിന്റെ പേര് ട്രംപ് കടലിടുക്ക് എന്ന് മാറ്റണോ?’ എന്നായിരുന്നു ട്രംപിന്റെ ചോദ്യം. ഇതോടെ കടലിടുക്ക് എന്നത്തേക്കാളും ‘ചൂടേറിയതായിരിക്കുമെന്നും’ അദ്ദേഹം അവകാശപ്പെട്ടു. ഹോർമുസിന്റെ നിയന്ത്രണത്തെച്ചൊല്ലി ഇറാനും യുഎസും തമ്മിലുള്ള തർക്കം രൂക്ഷമാകുന്നതിനിടെയാണ് ട്രംപിന്റെ പുതിയ പരാമർശം. ഹോർമുസിനെ അമേരിക്കൻ ടെറിട്ടറിയാക്കുമെന്നും യുദ്ധത്തിൽ ഇറാൻ പരാജയപ്പെടുമെന്നും ട്രംപ് നേരത്തെ പറഞ്ഞിരുന്നു. അന്ന് ഹോർമുസിന്റെ പേര് ‘അമേരിക്കൻ കടലിടുക്ക്’ എന്നാക്കുമെന്നായിരുന്നു ട്രംപിന്റെ പരാമർശം.

ഭൂമിശാസ്ത്രപരമായ പ്രദേശങ്ങൾക്ക് പേരുമാറ്റാൻ ട്രംപ് ശ്രമിക്കുന്നത് ഇതാദ്യമായല്ല. കാനഡയുമായുള്ള വ്യാപാര തർക്കങ്ങളെ തുടർന്ന് ഒന്റാറിയോ തടാകത്തെ (Lake Ontario) ‘ലേക്ക് അമേരിക്ക’ എന്ന് പുനർനാമകരണം ചെയ്യാൻ ട്രംപ് ഉത്തരവിട്ടിരുന്നു. 2025 ജനുവരിയിൽ അധികാരമേറ്റയുടൻ മെക്സിക്കോ ഉൾക്കടലിന്റെ (Gulf of Mexico) പേര് ‘ഗൾഫ് ഓഫ് അമേരിക്ക’ എന്നും അദ്ദേഹം മാറ്റിയിരുന്നു. കൂടാതെ വടക്കേ അമേരിക്കയിലെ ഏറ്റവും ഉയർന്ന കൊടുമുടിയായ ‘ഡെനാലി’യുടെ (Denali) പേര് മാറ്റി പണ്ടത്തെ പേരായ മൗണ്ട് മക്കിൻലി (Mt. McKinley) എന്നാക്കി ട്രംപ് ഉത്തരവിറക്കിയിരുന്നു.

എന്നാൽ ട്രംപിന്റെ ഈ അവകാശവാദങ്ങളെ ഇറാൻ പൂർണ്ണമായി തള്ളിക്കളയുന്നു. ഒരു ട്വീറ്റ് വഴിയോ ഭീഷണി വഴിയോ ഹോർമുസ് കടലിടുക്ക് പിടിച്ചെടുക്കാൻ അമേരിക്കയ്ക്ക് കഴിയില്ലെന്നും ഈ ജലപാത ഇറാന്റേതാണെന്നും അത് അങ്ങനെ തന്നെ തുടരുമെന്നും ഇറാന്റെ വിദേശകാര്യ മന്ത്രാലയം വ്യക്തമാക്കിയിട്ടുണ്ട്.

ഒരു മാസത്തെ താൽക്കാലിക വെടിനിർത്തലിന് ശേഷം കഴിഞ്ഞ രണ്ട് മൂന്ന് ദിവസങ്ങളായി യു എസും ഇറാനും അതീവ ഗുരുതരമായ ആക്രമണ – പ്രത്യാക്രമണങ്ങളാണ് നടത്തുന്നത്. കഴിഞ്ഞ ദിവസത്തെ കടുത്ത ആക്രമണത്തിന് ഇറാൻ തിരിച്ചടി നൽകിയാൽ, അവർ ഇതുവരെ കാണാത്ത വിധം വളരെ ശക്തമായ പ്രത്യാക്രമണം അമേരിക്കയുടെ ഭാഗത്തുനിന്നുണ്ടാകുമെന്ന് പ്രസിഡന്റ് ഡൊണാൾഡ് ട്രംപ് ഇന്ന് മാധ്യമങ്ങളോട് വ്യക്തമാക്കിയിട്ടുണ്ട്. കഴിഞ്ഞ രാത്രി ഇറാൻ തൊടുത്തുവിട്ട മിസൈലുകളും ഡ്രോണുകളും ഉണ്ടാക്കിയ ഭീതിയെത്തുടർന്ന് കുവൈറ്റ്, ജോർദാൻ, യു.എ.ഇ തുടങ്ങിയ രാജ്യങ്ങൾ തങ്ങളുടെ വ്യോമപ്രതിരോധ സംവിധാനങ്ങൾ അതീവ ജാഗ്രതയിലാക്കിയിരിക്കുകയാണ്.

ഈ പുതിയ യുദ്ധസാഹചര്യം കാരണം ആഗോള വിപണിയിൽ അസംസ്‌കൃത എണ്ണവില (Crude Oil) വീണ്ടും കുതിച്ചുയരുകയാണ്. ബ്രെന്റ് ക്രൂഡ് വില ബാരലിന് 95 ഡോളർ കടന്നു. യുഎസ് ഉപരോധവും തുടർച്ചയായ യുദ്ധവും കാരണം ഇറാൻ്റെ കറൻസിയായ റിയാലിന്റെ മൂല്യം ചരിത്രത്തിലെ ഏറ്റവും താഴ്ന്ന നിരക്കിലേക്ക് പതിച്ചു.

1.8 കോടി ബാരൽ എണ്ണയുമായി 40 കപ്പലുകൾ സുരക്ഷിതമായി കടലിടുക്ക് കടത്തി വിട്ട് യു എസ്.

കഴിഞ്ഞ ചൊവ്വാഴ്ച (സെപ്റ്റംബർ 1) യുഎസ്-ഇറാൻ യുദ്ധം ആരംഭിച്ച് ആറുമാസത്തിനിടയിലെ ഏറ്റവും വലിയ കപ്പൽ അകമ്പടി ദൗത്യം (Escort Operation) അമേരിക്കൻ സൈന്യം ഹോർമുസ് കടലിടുക്കിൽ വിജയകരമായി പൂർത്തിയാക്കി. ഏകദേശം 1.8 കോടി ബാരൽ എണ്ണയുമായി 40 വാണിജ്യ കപ്പലുകൾക്ക് അമേരിക്കൻ സൈന്യം സുരക്ഷയൊരുക്കി കടലിടുക്ക് കടത്തിവിട്ടു. യുദ്ധം തുടങ്ങുന്നതിന് മുമ്പ് ഒരു ദിവസം സാധാരണയായി കടന്നുപോകാറുള്ള എണ്ണയുടെ 90 ശതമാനത്തോളമാണിത്.

കപ്പലുകൾ കടന്നുപോകുന്നതിനിടയിൽ ഇറാൻ്റെ ഭാഗത്തുനിന്ന് കടുത്ത മിസൈൽ-ഡ്രോൺ ആക്രമണങ്ങൾ ഉണ്ടായി. എന്നാൽ അമേരിക്കയുടെ അത്യാധുനിക വ്യോമ, നാവിക, ബഹിരാകാശ പ്രതിരോധ സംവിധാനങ്ങൾ ഉപയോഗിച്ച് ഇറാൻ്റെ ഡ്രോൺ കൂട്ടങ്ങളെയും ആന്റി-ഷിപ്പ് ക്രൂയിസ് മിസൈലുകളെയും യുഎസ് സേന തകർത്തു. ഈ കപ്പൽ ദൗത്യത്തിന് സുരക്ഷയൊരുക്കുന്നതിനൊപ്പം തന്നെ, കടലിടുക്കിന് ചുറ്റുമുള്ള ഇറാൻ്റെ വ്യോമപ്രതിരോധ സംവിധാനങ്ങൾ, റഡാറുകൾ, മിസൈൽ ലോഞ്ചറുകൾ എന്നിവയുൾപ്പെടെയുള്ള 60 ഓളം സൈനിക ലക്ഷ്യങ്ങളിൽ യു.എസ് ഒരേസമയം ശക്തമായ ബോംബാക്രമണം നടത്തി തകർക്കുകയും ചെയ്തു. ഇറാൻ്റെ ആക്രമണങ്ങളിൽ നിന്നും നിരീക്ഷണങ്ങളിൽ നിന്നും രക്ഷപ്പെടാനായി ഈ 40 കപ്പലുകളിൽ ഭൂരിഭാഗവും തങ്ങളുടെ ട്രാൻസ്‌പോണ്ടറുകൾ ഓഫ് ചെയ്താണ് കടലിടുക്ക് കടന്നത്.