മക്ക: സൗദി അറേബ്യ, തുർക്കി, പാക്കിസ്ഥാൻ എന്നീ രാജ്യങ്ങൾ ചരിത്രപരമായ ഒരു സംയുക്ത ത്രിരാഷ്ട്ര പ്രതിരോധ കരാറിൽ ഒപ്പുവെച്ചു. ‘മക്ക സംയുക്ത പ്രതിരോധ കരാർ’ (Mecca Joint Defense Agreement) എന്ന് പേരിട്ടിരിക്കുന്ന ഈ ഉടമ്പടി പ്രകാരം, ഈ മൂന്ന് രാജ്യങ്ങളിൽ ഏതെങ്കിലും ഒന്നിന് നേരെ ഉണ്ടാകുന്ന സായുധ ആക്രമണം മറ്റ് രണ്ട് രാജ്യങ്ങൾക്ക് നേരെയും ഉണ്ടായ ആക്രമണമായി കണക്കാക്കും.
ഏതെങ്കിലും ഒരു രാജ്യത്തിന് നേരെയുള്ള അധിനിവേശത്തെ മൂന്ന് രാജ്യങ്ങളും ചേർന്ന് പ്രതിരോധിക്കും. സൈനിക പരിശീലനം, സാങ്കേതികവിദ്യ കൈമാറ്റം, സംയുക്ത സൈനികാഭ്യാസം എന്നിവ ശക്തിപ്പെടുത്തും. പശ്ചിമേഷ്യയിലെയും ഗൾഫ് മേഖലയിലെയും സുരക്ഷയും സമാധാനവും ഉറപ്പാക്കും എന്നിവയാണ് കരാറിന്റെ പ്രധാന ലക്ഷ്യങ്ങൾ.
സൗദി അറേബ്യയിലെ മക്കയിൽ വെച്ച് നടന്ന ഉച്ചകോടിയിലാണ് ഈ ചരിത്ര കരാർ ഒപ്പുവെച്ചത്. സൗദി കിരീടാവകാശിയും പ്രധാനമന്ത്രിയുമായ അമീർ മുഹമ്മദ് ബിൻ സൽമാൻ, തുർക്കി പ്രസിഡന്റ് റെസെപ് തയ്യിപ് എർദോഗൻ, പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് എന്നിവർ ചേർന്നാണ് കരാറിൽ ഒപ്പുവെച്ചത്.
മിഡിൽ ഈസ്റ്റിൽ വർദ്ധിച്ചുവരുന്ന പ്രാദേശിക സംഘർഷങ്ങളുടെയും യുദ്ധസമാനമായ സാഹചര്യങ്ങളുടെയും പശ്ചാത്തലത്തിലാണ് ഈ മൂന്ന് പ്രമുഖ മുസ്ലീം ശക്തികൾ ഒന്നിച്ച് ഒരു സഖ്യം രൂപീകരിച്ചിരിക്കുന്നത്. 2025-ൽ സൗദിയും പാക്കിസ്ഥാനും തമ്മിൽ ഒപ്പുവെച്ചിരുന്ന ഉഭയകക്ഷി പ്രതിരോധ കരാറിന്റെ തുടർച്ചയായാണ് ഇപ്പോൾ തുർക്കിയെക്കൂടി ഉൾപ്പെടുത്തി ഇത് വിശാലമായ ത്രിരാഷ്ട്ര സഖ്യമാക്കി മാറ്റിയിരിക്കുന്നത്.
