കീവ്: യുക്രെയ്നിലെ ഒഡേസ തീരത്ത് ചരക്കുകപ്പലിനു നേരെ റഷ്യ നടത്തിയ ക്രൂസ് മിസൈൽ ആക്രമണത്തിൽ കാസർകോട് സ്വദേശിയായ മലയാളി നാവികൻ ഉൾപ്പെടെ നാല് ഇന്ത്യക്കാരടക്കം 10 പേർ കൊല്ലപ്പെട്ടു. കാസർകോട് വെള്ളരിക്കുണ്ട് എകെജി നഗർ സ്വദേശി അഖിൽ ജോയൻ (26) ആണ് കൊല്ലപ്പെട്ട മലയാളി. ഇന്ത്യൻ, സിറിയൻ നാവികരാണ് കപ്പലിലുണ്ടായിരുന്നത്. ധാന്യങ്ങളുമായി ഒഡേസ തുറമുഖത്തുനിന്ന് പുറപ്പെട്ട ഗിനിയ-ബിസാവു പതാകയുള്ള ‘എം.വി ഗോൾഡൻ ലിയോ’ എന്ന ചരക്കുകപ്പലിന് നേരെയാണ് മൂന്ന് റഷ്യൻ ക്രൂയിസ് മിസൈലുകൾ പതിച്ചത്.
ഗുർപ്രീത് സിംഗ് ഭട്ട്, ജഗൻ സിംഗ്, അഭിഷേക് നിഷാദ് എന്നിവരാണ് അഖിലിനെ കൂടാതെ ജീവൻ നഷ്ടപ്പെട്ട മറ്റ് മൂന്ന് ഇന്ത്യക്കാർ. കപ്പലിലുണ്ടായിരുന്ന മറ്റൊരു ഇന്ത്യക്കാരനായ സെബാസ്റ്റ്യൻ ബ്ലെസന് ഗുരുതരമായി പരിക്കേറ്റ് ഒഡേസയിലെ ആശുപത്രിയിൽ ചികിത്സയിലാണ്. നാല് ഇന്ത്യക്കാരടക്കം 10 പേർ കൊല്ലപ്പെട്ട വിവരം ഇന്ത്യൻ വിദേശകാര്യ മന്ത്രാലയവും (MEA) യുക്രെയ്ൻ അധികൃതരും സ്ഥിരീകരിച്ചിട്ടുണ്ട്. സിവിലിയൻ ചരക്കുകപ്പലുകൾക്ക് നേരെയുള്ള റഷ്യയുടെ ഈ ആക്രമണത്തെ ഇന്ത്യൻ വിദേശകാര്യ മന്ത്രാലയം ശക്തമായി അപലപിക്കുകയും ഇത് അങ്ങേയറ്റം ഖേദകരമാണെന്ന് പ്രസ്താവിക്കുകയും ചെയ്തു. അഖിലിന്റെ ഭൗതികശരീരം നാട്ടിലെത്തിക്കുന്നതിനായി കേരള മുഖ്യമന്ത്രിയുടെ ഓഫീസും നോർക്ക റൂട്സും (NORKA Roots) വിദേശകാര്യ മന്ത്രാലയവുമായി ബന്ധപ്പെട്ട് ആവശ്യമായ നടപടികൾ ഏകോപിപ്പിച്ചു വരികയാണ്.
കഴിഞ്ഞ ഏതാനും ആഴ്ചകളായി ഒഡേസ മേഖലയിൽ റഷ്യൻ ആക്രമണങ്ങൾ രൂക്ഷമായി തുടരുകയാണ്. ജൂലൈയിൽ മാത്രം ഈ മേഖലയിൽ റഷ്യൻ ആക്രമണങ്ങളിൽ 28 പേർ കൊല്ലപ്പെട്ടതായി ഗവർണർ ഒലെ കിപ്പർ വ്യക്തമാക്കി. കരിങ്കടൽ വഴിയുള്ള ചരക്കു കപ്പലുകൾക്ക് നേരെ റഷ്യ നടത്തുന്ന ആക്രമണങ്ങളും വ്യാപകമായിട്ടുണ്ട്. യുക്രെയ്ൻ്റെ കാർഷിക കയറ്റുമതിയുടെ വലിയൊരു ഭാഗവും ഈ പാതയിലൂടെയാണ് നടക്കുന്നത്.
യുക്രെയ്ൻ തലസ്ഥാനമായ കീവ് (Kyiv), ഒഡേസ, ഹാർകീവ് തുടങ്ങിയ നഗരങ്ങളെ ലക്ഷ്യമിട്ട് റഷ്യ ബാലിസ്റ്റിക് മിസൈലുകളും നൂറുകണക്കിന് ഡ്രോണുകളും ഉപയോഗിച്ച് കനത്ത ആക്രമണം തുടരുകയാണ്. അടുത്തിടെ കീവിൽ നടന്ന ആക്രമണങ്ങളിൽ വ്യാപക നാശനഷ്ടങ്ങൾ റിപ്പോർട്ട് ചെയ്യപ്പെട്ടു. മറുഭാഗത്ത് റഷ്യയ്ക്കെതിരെ യുക്രെയ്നും ആക്രമണങ്ങൾ ശക്തമാക്കിയിട്ടുണ്ട്. റഷ്യയുടെ സാമ്പത്തിക സ്രോതസ്സുകൾ തകർക്കുക എന്ന ലക്ഷ്യത്തോടെ അവരുടെ ഓയിൽ ടാങ്കറുകൾക്കും ഇന്ധന ഡിപ്പോകൾക്കും നേരെ യുക്രെയ്ൻ സീ-ഡ്രോൺ (Sea Drone) ആക്രമണങ്ങൾ ശക്തമാക്കിയിട്ടുണ്ട്. ജൂലൈ മാസത്തിൽ മാത്രം 183 റഷ്യൻ കപ്പലുകൾ ലക്ഷ്യമിട്ടതായി യുക്രെയ്ൻ്റെ ഡ്രോൺ സൈനിക കമാൻഡർ റോബർട്ട് ബ്രോവ്ഡി അറിയിച്ചു. മോസ്കോ മേഖലയിലെ വിവിധ കേന്ദ്രങ്ങൾ ലക്ഷ്യമിട്ട് യുക്രെയ്ൻ നടത്തുന്ന ഡ്രോൺ ആക്രമണങ്ങളെത്തുടർന്ന് നാനൂറോളം ഡ്രോണുകൾ വെടിവച്ചിട്ടതായി റഷ്യൻ അധികൃതരും വ്യക്തമാക്കി. ആക്രമണങ്ങളിൽ നിരവധി പേർക്ക് പരിക്കേറ്റിട്ടുണ്ട്.
റഷ്യയുടെ 15 കപ്പലുകൾക്ക് നേരെ യുക്രെയ്ൻ ആക്രമണം; കീവിൽ ആക്രമണം തുടർന്ന് റഷ്യ
