ഔലി: ഇന്ത്യയും അമേരിക്കയും തമ്മിലുള്ള വാർഷിക സംയുക്ത സൈനിക അഭ്യാസമായ ‘യുദ്ധ് അഭ്യാസ് 2026’ (Yudh Abhyas 2026) ഉത്തരാഖണ്ഡിൽ വിജയകരമായി തുടരുകയാണ്. ഇരു രാജ്യങ്ങളും തമ്മിലുള്ള പ്രതിരോധ സഹകരണം ശക്തമാക്കുന്നതിൻ്റെ ഭാഗമായി നടക്കുന്ന ഈ സൈനിക അഭ്യാസത്തിൻ്റെ 22-ാമത് പതിപ്പാണിത്. സെപ്റ്റംബർ 9 മുതൽ 28 വരെയാണ് ഈ വർഷത്തെ അഭ്യാസം ക്രമീകരിച്ചിരിക്കുന്നത്.
ചരിത്രത്തിലാദ്യമായി ഇത്തവണ ഒരേസമയം രണ്ട് കേന്ദ്രങ്ങളിലായാണ് പരിശീലനം ക്രമീകരിച്ചിരിക്കുന്നത്. ചൈനയുമായുള്ള യഥാർത്ഥ നിയന്ത്രണ രേഖയ്ക്ക് (Line of Actual Control – LAC) ഏകദേശം 100 കിലോമീറ്റർ മാത്രം അകലെയുള്ള ഉത്തരാഖണ്ഡിലെ ഔലി മലയോര മേഖലയാണൊന്ന്. ചൈന അതിർത്തിയോട് ചേർന്നുള്ള പർവത യുദ്ധമുറകൾ (Mountain Warfare) പരിശീലിക്കാനാണ് ഈ സ്ഥലം തിരഞ്ഞെടുത്തത്. മറ്റൊന്ന് പാക്കിസ്ഥാൻ അതിർത്തിയോട് ചേർന്നുള്ള രാജസ്ഥാനിലെ മഹാജൻ ഫീൽഡ് ഫയറിങ് റേഞ്ച് മരുഭൂമി പ്രദേശമാണ്. കടുത്ത ചൂടും വരണ്ട ഭൂപ്രകൃതിയും ഉള്ള ഇവിടെയാണ് കൗണ്ടർ-ഡ്രോൺ സംവിധാനങ്ങളും ലൈവ് ഫയറിങ്ങും ഉൾപ്പെടെയുള്ള അത്യാധുനിക യുദ്ധപരിശീലനം നടക്കുന്നത്.
ഇരുവശത്തുനിന്നും 600-ഓളം സൈനികർ വീതം ഈ അഭ്യാസത്തിൽ പങ്കുചേരുന്നുണ്ട്. യു.എസ്. ആർമിയുടെ അലാസ്ക ആസ്ഥാനമായുള്ള 11-ാം എയർബോൺ ഡിവിഷനിലെ സൈനികരാണ് ഇതിനായി ഇന്ത്യയിലെത്തിയിരിക്കുന്നത്. മലയോര മേഖലകളിലെയും ദുർഘടമായ ഭൂപ്രകൃതിയിലെയും സംയുക്ത സൈനിക ശേഷി വർദ്ധിപ്പിക്കുക, അത്യാധുനിക യുദ്ധതന്ത്രങ്ങളും സാങ്കേതികവിദ്യകളും പരസ്പരം പങ്കുവെക്കുക എന്നിവയാണ് പ്രധാന ലക്ഷ്യങ്ങൾ.
ഇതാദ്യമായി അത്യാധുനിക കൗണ്ടർ-ഡ്രോൺ സംവിധാനങ്ങൾ (MLIDS) ഈ അഭ്യാസത്തിൻ്റെ ഭാഗമായി ഇന്ത്യയിൽ വിന്യസിച്ച് ഇരു സൈന്യങ്ങളും പരിശീലനം നടത്തുന്നുണ്ട്. ഡ്രോൺ ഭീഷണികളെ നേരിടാൻ ഇത് സഹായിക്കും. അത്യാധുനിക ലോങ്-റേഞ്ച് റോക്കറ്റ് സംവിധാനങ്ങളും മിസൈലുകളും ഉപയോഗിച്ചുള്ള സംയുക്ത ലൈവ്-ഫയറിങ് പ്രകടനത്തോടെ സെപ്റ്റംബർ 28-ന് ഈ സൈനിക അഭ്യാസം സമാപിക്കും.
Photos: FB/US Army pacific, Yudha Abyas Exercise
