ടെഹ്‌റാൻ: ഇറാൻ മുന്നോട്ടുവയ്ക്കുന്ന ഏഴ് നിബന്ധനകൾ അംഗീകരിക്കുന്നത് വരെ ഹോർമുസ് കടലിടുക്ക് തുറക്കില്ലെന്നും അമേരിക്കയുമായി നേരിട്ടുള്ള ചർച്ചകൾ പുനരാരംഭിക്കില്ലെന്നും ഇറാൻ. ഇറാൻ പാർലമെന്റ് സ്പീക്കറും മുഖ്യ മധ്യസ്ഥനുമായ മുഹമ്മദ് ബാഖർ ഗാലിബാഫ്, സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്‌സെൻ റെസായി എന്നിവർ ബുധൻ, വ്യാഴം ദിവസങ്ങളിലായി നൽകിയ അഭിമുഖങ്ങളിലാണ് ഏഴ് നിബന്ധനകളുടെ കാര്യം വീണ്ടും വ്യക്തമാക്കിയത്.
നിബന്ധനകൾ അംഗീകരിച്ചാൽ ഹോർമുസ് കടലിടുക്ക് തുറന്നു നൽകാമെന്നും തുടർന്ന് അന്തിമ കരാറിനായുള്ള ചർച്ചകൾ ആരംഭിക്കാമെന്നും ഇറാൻ വ്യക്തമാക്കുന്നു. അമേരിക്കയുമായി നിലവിൽ യാതൊരു ചർച്ചകളും നടക്കുന്നില്ലെന്ന് മൊഹ്‌സെൻ റെസായി പറഞ്ഞു. പശ്ചിമേഷ്യയ്ക്ക് പുറത്തുള്ള അമേരിക്കൻ സൈനിക താവളങ്ങൾ ഇറാനെ ആക്രമിക്കാൻ ഉപയോഗിച്ചാൽ അവയെയും ലക്ഷ്യമിടുമെന്ന് അദ്ദേഹം മുന്നറിയിപ്പ് നൽകി.
ഖത്തർ വഴി തങ്ങളുടെ നിബന്ധനകൾ അമേരിക്കയ്ക്ക് കൈമാറിയിട്ടുണ്ടെന്നും, വാഷിംഗ്ടണിന്റെ ഔദ്യോഗിക മറുപടിക്കായി കാത്തിരിക്കുകയാണെന്നും ഇറാൻ അറിയിച്ചു. അമേരിക്കയുമായി നിലവിൽ യാതൊരു ചർച്ചകളും നടക്കുന്നില്ലെന്ന് മൊഹ്‌സെൻ റെസായി വ്യക്തമാക്കി. എണ്ണവില കുറയ്ക്കാനും സാമ്പത്തിക സമ്മർദ്ദം ലഘൂകരിക്കാനുമായി ചർച്ചകൾ നടക്കുന്നുവെന്ന് അമേരിക്ക വ്യാജപ്രചാരണം നടത്തുകയാണെന്നാണ് ഇറാന്റെ ആരോപണം.
ഔദ്യോഗിക രേഖ പൂർണ്ണമായി പുറത്തുവിട്ടിട്ടില്ലെങ്കിലും, ഇറാൻ നേതാക്കളുടെ പ്രസ്താവനകൾ പ്രകാരം പ്രധാന ആവശ്യങ്ങൾ താഴെ പറയുന്നവയാണ്:
- യുദ്ധവും സൈനിക നീക്കങ്ങളും അവസാനിപ്പിക്കുക. ലെബനൻ ഉൾപ്പെടെയുള്ള മേഖലയിലെ എല്ലാ യുദ്ധമുന്നണികളിലും സൈനിക ആക്രമണങ്ങൾ പൂർണ്ണമായി നിർത്തലാക്കണം.
- നാവിക ഉപരോധം പിൻവലിക്കുക. ഇറാനിയൻ തുറമുഖങ്ങൾക്ക് മേൽ അമേരിക്ക ഏർപ്പെടുത്തിയിട്ടുള്ള നാവിക ഉപരോധം അവസാനിപ്പിക്കണം.
- സാമ്പത്തിക ഉപരോധങ്ങൾ നീക്കുക. ഇറാനെതിരായ സാമ്പത്തിക ഉപരോധങ്ങളും എണ്ണ കയറ്റുമതിയിലുള്ള നിയന്ത്രണങ്ങളും പിൻവലിക്കണം.
- മരവിപ്പിച്ച ആസ്തികൾ വിട്ടുനൽകുക. വിദേശ ബാങ്കുകളിൽ മരവിപ്പിച്ചിട്ടുള്ള ഇറാന്റെ സാമ്പത്തിക ആസ്തികൾ നിരുപാധികം വിട്ടുനൽകണം.
- യുദ്ധനഷ്ടപരിഹാരം നൽകുക. സംഘർഷത്തിലൂടെ ഇറാനുണ്ടായ നാശനഷ്ടങ്ങൾക്ക് അമേരിക്ക നഷ്ടപരിഹാരം നൽകണം.
- കടലിടുക്കിലൂടെയുള്ള സുരക്ഷിത ഗതാഗതം. ഹോർമുസ് കടലിടുക്കിലൂടെ വാണിജ്യ കപ്പലുകൾക്കും എണ്ണ ടാങ്കറുകൾക്കും സുരക്ഷിതമായ യാത്ര ഉറപ്പാക്കണം.
- ആണവ നിലപാടുകൾ അംഗീകരിക്കുക. ആണവ വസ്തുക്കളുമായി ബന്ധപ്പെട്ട ഇറാന്റെ നിലപാടുകൾ അംഗീകരിക്കണം
തിങ്കളാഴ്ച ഖത്തർ പ്രധാനമന്ത്രി വൈറ്റ് ഹൗസിൽ യുഎസ് പ്രസിഡന്റ് ഡൊണാൾഡ് ട്രംപുമായി കൂടിക്കാഴ്ച നടത്തിയിരുന്നു. കൂടാതെ, ഇറാനുമായി നേരിട്ടുള്ള ചർച്ചകൾ പുനരാരംഭിക്കാൻ യുഎസ് വൈസ് പ്രസിഡന്റ് ജെ.ഡി. വാൻസ് ശ്രമിക്കുന്നതായും, റഷ്യൻ പ്രസിഡന്റ് വ്ലാഡിമിർ പുടിന്റെ സഹായം അമേരിക്ക തേടിയതായും റിപ്പോർട്ടുകളുണ്ട്. ഇറാന്റെ നിബന്ധനകൾ അപ്രായോഗികമാണെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ പ്രതികരിച്ചു. എങ്കിലും സൈനിക നീക്കത്തേക്കാൾ നയതന്ത്രത്തിനും സാമ്പത്തിക സമ്മർദ്ദത്തിനുമാണ് മുൻഗണന നൽകുന്നതെന്ന് ട്രംപും റൂബിയോയും വ്യക്തമാക്കിയിട്ടുണ്ട്.
