ദുബായ്: യുഎഇയിൽ മുസ്‌ലിം ഇതര ആരാധനാലയങ്ങളുടെ പ്രവർത്തനങ്ങൾക്ക് കടുത്ത നിയന്ത്രണങ്ങളും പിഴകളും ഏർപ്പെടുത്തി ഭരണകൂടം പുതിയ നിയമലംഘന നിർവചന വിജ്ഞാപനം പുറപ്പെടുവിച്ചു. 24 വിഭാഗം നിയമലംഘനങ്ങൾ നിർവചിക്കുന്ന പുതിയ വ്യവസ്ഥകളിൽ 5,000 ദിർഹം മുതൽ 750,000 ദിർഹം വരെ പിഴയും ആവർത്തിച്ചുള്ള നിയമലംഘനങ്ങൾക്ക് മൂന്ന് മാസം വരെ പ്രവർത്തന വിലക്കും ഉൾപ്പെടുത്തിയിട്ടുണ്ട്. രാജ്യത്തെ മുസ്‌ലിം ഇതര ആരാധനാലയങ്ങളുടെ പ്രവർത്തനം കൂടുതൽ സുതാര്യമാക്കുന്നതിന്റെ ഭാഗമായി ഒക്ടോബർ 14 മുതൽ പ്രാബല്യത്തിൽ വന്ന പുതിയ മന്ത്രിസഭാ പ്രമേയ പ്രകാരമാണ് ഈ നടപടി.
ആരാധനാലയങ്ങളുടെ ലൈസൻസ്, അംഗീകൃത സൂപ്പർവൈസറുടെ നിയമനം, ഭരണസംവിധാനം, സാമ്പത്തിക ഇടപാടുകൾ, സംഭാവനകൾ എന്നിവയുമായി ബന്ധപ്പെട്ടാണ് പ്രധാന നിയന്ത്രണങ്ങൾ. ലൈസൻസ് പുതുക്കാതെ പ്രവർത്തിക്കുക, അംഗീകാരമില്ലാത്ത രീതിയിൽ സ്ഥാപനങ്ങൾ നടത്തുക തുടങ്ങിയവയ്ക്ക് മുന്നറിയിപ്പിനും തുടർന്നുള്ള പിഴകൾക്കും വ്യവസ്ഥയുണ്ട്.
വിദേശത്തുനിന്നുള്ള സംഭാവനകൾ സ്വീകരിക്കുന്നതിനും യുഎഇയ്ക്ക് പുറത്തേക്ക് പണം കൈമാറുന്നതിനും കർശനമായ വ്യവസ്ഥകൾ ഏർപ്പെടുത്തിയിട്ടുണ്ട്. അനുമതിയില്ലാതെ വിദേശ സംഘടനകളുമായി ഔദ്യോഗിക ബന്ധം സ്ഥാപിക്കുക, അംഗീകൃത ആരാധനാലയത്തിന് പുറത്തു മതപരമായ ചടങ്ങുകൾ സംഘടിപ്പിക്കുക, മാധ്യമങ്ങളിലൂടെ അനുമതിയില്ലാതെ സംഭാവന പിരിക്കുക തുടങ്ങിയവയ്ക്കും ഉയർന്ന പിഴ ചുമത്താം. ഗുരുതരമായ ചില നിയമലംഘനങ്ങൾക്ക് 750,000 ദിർഹം വരെ പിഴയും ആവർത്തിച്ചുള്ള ലംഘനങ്ങൾക്ക് മൂന്ന് മാസം വരെ പ്രവർത്തന വിലക്കും ഏർപ്പെടുത്താം. ഭരണപരമായ നടപടികളിൽ എതിർപ്പുള്ള ആരാധനാലയങ്ങൾക്ക് അറിയിപ്പ് ലഭിച്ച് 15 ദിവസത്തിനകം അപ്പീൽ നൽകാനും അവസരമുണ്ട്.
2023-ലെ ഫെഡറൽ നിയമം നമ്പർ 9-ൻ്റെ അടിസ്ഥാനത്തിൽ കൊണ്ടുവന്ന പുതിയ വ്യവസ്ഥകൾ യുഎഇയിലെ മുസ്‌ലിം ഇതര ആരാധനാലയങ്ങളുടെ ഭരണപരവും സാമ്പത്തികവുമായ ഉത്തരവാദിത്വങ്ങൾ കൂടുതൽ കർശനമാക്കുന്നതാണ്. സാധാരണ മതപരമായ ആരാധനകൾക്ക് പൊതുവായ നിരോധനം ഏർപ്പെടുത്തിയെന്നല്ല ഇതിൻ്റെ അർത്ഥം; സ്ഥാപനങ്ങൾ നിയമപരമായ വ്യവസ്ഥകൾ പാലിച്ചാണ് പ്രവർത്തിക്കേണ്ടത്. കോടതി നടപടികളില്ലാതെ തന്നെ നേരിട്ട് മുന്നറിയിപ്പ് നൽകാനും, പിഴ ചുമത്താനും, പ്രവർത്തനങ്ങൾ താൽക്കാലികമായി നിർത്തിവെയ്പ്പിക്കാനും ഉദ്യോഗസ്ഥർക്ക് പുതിയ നിയമം അധികാരം നൽകുന്നു. നിലവിലുള്ള നിയമങ്ങളിൽ വലിയ മാറ്റങ്ങൾ വരുത്തുന്നില്ലെങ്കിലും, നിയമങ്ങൾ ലംഘിക്കുന്നവർക്കെതിരെ അതിവേഗത്തിൽ നടപടിയെടുക്കാൻ അധികൃതർക്ക് പൂർണ്ണ അധികാരം നൽകുന്നതാണ് പുതിയ ക്രമീകരണം.
