കാരക്കാസ്: വെനസ്വേലയിലുണ്ടായ ഇരട്ട ഭൂചലനത്തിൽ മരിച്ചവരുടെ എണ്ണം 1,430 കടന്നതായി ഔദ്യോഗിക വൃത്തങ്ങൾ സ്ഥിരീകരിച്ചു. നിലവിൽ 1,430 പേർ മരണപ്പെട്ടതായി വെനിസ്വേലൻ നാഷണൽ അസംബ്ലി പ്രസിഡന്റ് ജോർജ് റോഡ്രിഗസ് അറിയിച്ചു. 3,200-ലധികം ആളുകൾക്ക് ഗുരുതരമായി പരിക്കേറ്റിട്ടുണ്ട്. 50,000-ത്തിലധികം ആളുകളെ കാണാതായതായി ഐക്യരാഷ്ട്ര സംഘടനയും പ്രാദേശിക മാധ്യമങ്ങളും റിപ്പോർട്ട് ചെയ്യുന്നു.
പ്രധാന ഭൂകമ്പങ്ങൾക്ക് ശേഷം രാജ്യത്ത് തുടർചലനങ്ങൾ രേഖപ്പെടുത്തിയിട്ടുണ്ട്. ഇതിന് പുറമെ ഇന്ന് വെനസ്വേലൻ തീരത്ത് 4.8 തീവ്രതയുള്ള പുതിയൊരു ഭൂചലനം കൂടി റിപ്പോർട്ട് ചെയ്യപ്പെട്ടത് രക്ഷാപ്രവർത്തനത്തെ കൂടുതൽ പ്രതിസന്ധിയിലാക്കുന്നുണ്ട്. തകർന്നുവീഴാൻ നിൽക്കുന്ന കെട്ടിടങ്ങൾ വീണ്ടും കുലുങ്ങുന്നത് അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ പുറത്തെടുക്കാനുള്ള ശ്രമങ്ങൾക്ക് വലിയ ഭീഷണിയാണ് ഉയർത്തുന്നത്. അവശിഷ്ടങ്ങൾക്കിടയിൽ ജീവന്റെ അംശങ്ങൾ കണ്ടെത്താനുള്ള 72 മണിക്കൂറുകളുടെ ഗോൾഡൻ വിൻഡോ അവസാനിക്കാറായതിനാൽ സമയം വൈകുംതോറും മരണസംഖ്യ ഇനിയും ഉയരാൻ സാധ്യതയുണ്ടെന്നാണ് ദുരന്തനിവാരണ സേന നൽകുന്ന മുന്നറിയിപ്പ്.
തലസ്ഥാനമായ കാരക്കാസ്, തീരദേശ മേഖലയായ ലാ ഗ്വൈറ എന്നിവിടങ്ങളിലാണ് ദുരന്തം ഏറ്റവും കൂടുതൽ നാശം വിതച്ചത്. ആയിരക്കണക്കിന് കെട്ടിടങ്ങൾ തകർന്നതോടെ 3,100-ലധികം കുടുംബങ്ങൾ പൂർണ്ണമായും ഭവനരഹിതരായി. കഴിഞ്ഞ ബുധനാഴ്ച വെനസ്വേലയിൽ വെറും 39 സെക്കൻഡുകളുടെ ഇടവേളയിലാണ് 7.2, 7.5 തീവ്രത രേഖപ്പെടുത്തിയ രണ്ട് ശക്തമായ ഭൂചലനങ്ങൾ ഉണ്ടായത്. രാജ്യത്തിന്റെ ചരിത്രത്തിൽ ഒരു നൂറ്റാണ്ടിനിടയിലെ ഏറ്റവും ശക്തമായ ഭൂചലനങ്ങളാണിത്.
ദുരന്തത്തിന്റെ വ്യാപ്തി കണക്കിലെടുത്ത് ഇന്ത്യ ഉൾപ്പെടെയുള്ള 17 രാജ്യങ്ങളിൽ നിന്നുള്ള 1,600-ഓളം അന്താരാഷ്ട്ര രക്ഷാപ്രവർത്തകർ നിലവിൽ വെനിസ്വേലയിൽ എത്തിച്ചേർന്നിട്ടുണ്ട്. സ്പാനിഷ് ഭാഷയിൽ ‘സൗഹൃദം’ എന്നർത്ഥം വരുന്ന ‘ഓപ്പറേഷൻ അമിസ്താദ്’ (Operation Amistad) എന്ന പേരിൽ ഇന്ത്യ അടിയന്തര സഹായം എത്തിച്ചു കഴിഞ്ഞു. ഇന്ത്യൻ വ്യോമസേനയുടെ രണ്ട് വിമാനങ്ങളിലായി 41 അംഗ മെഡിക്കൽ സംഘവും, 60 ഫീൽഡ് ഹോസ്പിറ്റലുകളും, 6 ടൺ മരുന്നുകളും ഭക്ഷണപദാർത്ഥങ്ങളും കാരക്കാസിലേക്ക് അയച്ചിട്ടുണ്ട്.
യു.എസ്.എ, ബ്രസീൽ, അർജന്റീന, ജർമ്മനി, ഫ്രാൻസ് ഉൾപ്പെടെയുള്ള 21 വിദേശ രാജ്യങ്ങളിൽ നിന്നായി 2,200-ലധികം വിദഗ്ദ്ധ രക്ഷാപ്രവർത്തകരും പ്രത്യേക പരിശീലനം ലഭിച്ച ഡോഗ് സ്ക്വാഡുകളും വെനസ്വേലയിൽ തിരച്ചിൽ നടത്തുന്നുണ്ട്. പ്രാരംഭ വിലയിരുത്തലുകൾ പ്രകാരം വെനസ്വേലയ്ക്ക് ഏകദേശം 6.7 ബില്യൺ ഡോളറിന്റെ നേരിട്ടുള്ള ഭൗതിക നഷ്ടം സംഭവിച്ചതായി യുണൈറ്റഡ് നേഷൻസ് ഡെവലപ്മെന്റ് പ്രോഗ്രാം (UNDP) കണക്കാക്കുന്നു.
