ജോധ്പുർ: ഇന്ത്യൻ വ്യോമസേന (IAF) നടത്തുന്ന ഏറ്റവും വലിയ ബഹുരാഷ്ട്ര വ്യോമാഭ്യാസ പ്രകടനമായ ‘തരംഗ് ശക്തി 2026’-ന്റെ (Tarang Shakti-26) രണ്ടാം പതിപ്പ് രാജസ്ഥാനിലെ ജോധ്പുർ വ്യോമസേനാ താവളത്തിൽ ആരംഭിച്ചു. 2026 സെപ്റ്റംബർ 26 മുതൽ ഒക്ടോബർ 12 വരെയാണ് ഈ മെഗാ വ്യോമാഭ്യാസം നടക്കുന്നത്. അമേരിക്ക (US), ഫ്രാൻസ്, ജർമ്മനി, ഓസ്ട്രേലിയ, ബംഗ്ലാദേശ്, ശ്രീലങ്ക, യു.എ.ഇ എന്നീ രാജ്യങ്ങൾ തങ്ങളുടെ അത്യാധുനിക യുദ്ധവിമാനങ്ങളുമായി ഇതിൽ നേരിട്ട് പങ്കുചേരുന്നു. ഇതുകൂടാതെ മുപ്പതിലധികം രാജ്യങ്ങൾ നിരീക്ഷകരായും (Observers) ഈ വ്യോമാഭ്യാസത്തിൽ പങ്കെടുക്കുന്നുണ്ട്.
വിവിധ രാജ്യങ്ങളിലെ വ്യോമസേനകൾ തമ്മിലുള്ള ഏകോപനം മെച്ചപ്പെടുത്തുക, ആധുനിക വ്യോമയുദ്ധ തന്ത്രങ്ങൾ പരസ്പരം പങ്കുവെക്കുക, സംയുക്ത പോരാട്ട വീര്യം വർദ്ധിപ്പിക്കുക എന്നിവയാണ് ഈ പരിശീലനത്തിലൂടെ ലക്ഷ്യമിടുന്നത്. ചരിത്രത്തിലാദ്യമായി അമേരിക്കയുടെ അഞ്ചാം തലമുറ സ്റ്റെൽത്ത് യുദ്ധവിമാനമായ F-35 ലൈറ്റ്നിംഗ് II ഇന്ത്യയിൽ നടക്കുന്ന ഒരു വ്യോമാഭ്യാസത്തിൽ പങ്കാളിയാകുന്നു എന്ന പ്രത്യേകതയും ഇത്തവണയുണ്ട്. ഇന്ത്യൻ വ്യോമസേനയുടെ മുൻനിര വിമാനങ്ങളായ റഫാൽ (Rafale), സുഖോയ് (Su-30MKI), തദ്ദേശീയമായി നിർമ്മിച്ച തേജസ് (Tejas), മിറാഷ്-2000, ജാഗ്വാർ തുടങ്ങിയവയും അണിനിരക്കുന്നു.
ഫ്രാന്സ് ഏഴ് റഫാല് യുദ്ധവിമാനങ്ങള്, മൂന്ന് എ400എം ട്രാന്സ്പോര്ട്ട് വിമാനങ്ങള്, രണ്ട് എംആര്ടിടി വിമാനങ്ങള് എന്നിവയുമായി പങ്കെടുക്കും. യുഎഇ ആറ് എഫ്-16 വിമാനങ്ങളും ഒരു ഗ്ലോബല് 6000 വിമാനവും വിന്യസിക്കും. ജര്മനി രണ്ട് എ400എം വിമാനങ്ങളുമായി എത്തും. ഓസ്ട്രേലിയയും ബംഗ്ലാദേശും ഓരോ സി-130 വിമാനവുമായി പങ്കെടുക്കുമ്പോള് ശ്രീലങ്ക കിംഗ് എയര് 350 വിമാനത്തെ വിന്യസിക്കും.
