ആലപ്പുഴ: മിസ് യൂണിവേഴ്സ് ഇന്ത്യ 2026 കിരീടം സ്വന്തമാക്കി ആലപ്പുഴ മാവേലിക്കരയുടെ കെസിയ ലിസ് മെജോ. ഈ അപൂർവ നേട്ടം കൈവരിക്കുന്ന ആദ്യ മലയാളി വനിതയാണ് കെസിയ. ജയ്പൂരിൽ നടന്ന ഫൈനൽ മത്സരത്തിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള 53 മത്സരാർത്ഥികളെ പിന്തള്ളിയാണ് ഈ 19-കാരി വിശ്വസുന്ദരിപ്പട്ടം സ്വന്തമാക്കിയത്. സുസ്മിത സെൻ ഉൾപ്പെടെയുള്ള പ്രമുഖർ അടങ്ങിയ ജൂറിയാണ് വിജയിയെ തിരഞ്ഞെടുത്തത്.
തമിഴ്നാട്ടിൽ നിന്നുള്ള വൈഷ്ണവി ഗണേഷ് ഫസ്റ്റ് റണ്ണറപ്പായി. ഗുജറാത്തിൽ നിന്നുള്ള അനുശ്രീ സതവ്ലേക്കറാണ് സെക്കന്റ് റണ്ണറപ്പ്. നവംബറിൽ പ്യൂർട്ടോ റിക്കോയിൽ നടക്കുന്ന 75-ാമത് മിസ്സ് യൂണിവേഴ്സ് മത്സരത്തിൽ മെജോ ഇന്ത്യയെ പ്രതിനിധീകരിക്കും. നിയമവിദ്യാർഥിയും മോഡലുമായ കെസിയ, നേരത്തെ ‘മിസ് ടീൻ ഇന്റർനാഷണൽ’ മത്സരത്തിൽ ഇന്ത്യയെ പ്രതിനിധീകരിക്കുകയും ‘ഫസ്റ്റ് റണ്ണറപ്പാവുകയും ചെയ്തു. 2024- ൽ സൗന്ദര്യമത്സര രംഗത്തേക്ക് കടന്നുവന്ന കെസിയ, ഈ വർഷം ആദ്യം മിസ് യൂണിവേഴ്സ് കേരള 2026 കിരീടവും സ്വന്തമാക്കി. ആലപ്പുഴ മാവേലിക്കര സ്വദേശികളായ മെജോ ഏബ്രഹാമിന്റെയും സുജാ മെജോയുടെയും മകളാണ് കെസിയ. മമ്മൂട്ടി ചിത്രമായ ‘ഷൈലോക്കി’ലൂടെ അഭിനയരംഗത്തും കെസിയ മുഖം കാണിച്ചിട്ടുണ്ട്.
