മെൽബൺ: ഓസ്ട്രേലിയയിലെ മലയാളി സമൂഹത്തിന് ആവേശത്തിന്റെയും ആഘോഷത്തിന്റെയും പുതിയ അനുഭവം സമ്മാനിക്കാൻ മെൽബൺ മലയാളി ഫെഡറേഷൻ്റെ (MMF) നേതൃത്വത്തിൽ, ഓസ്ട്രേലിയൻ വടംവലി അസോസിയേഷൻ്റെ (Australian Vadamvali Association) പിന്തുണയോടെ സംഘടിപ്പിക്കുന്ന രാജ്യാന്തര വടംവലി മത്സരം ‘പോർക്കളം 2026’ നവംബർ 14-ന് മെൽബണിലെ സ്കോർസ്ബിയിലുള്ള കരീബിയൻ മാർക്കറ്റിൽ അരങ്ങേറും. V Care Dental, Phoenix Home Loans എന്നിവരാണ് പരിപാടിയുടെ സ്പോൺസർമാർ.
കേരളത്തിന്റെ പരമ്പരാഗത കായികവിനോദമായ വടംവലിയെ രാജ്യാന്തര നിലവാരത്തിൽ അവതരിപ്പിക്കുന്ന ഈ കായികമാമാങ്കത്തിൽ കാനഡ, ന്യൂസിലൻഡ് തുടങ്ങിയ രാജ്യങ്ങളിൽ നിന്നുള്ള ടീമുകൾ പങ്കെടുക്കും. ശക്തിയും ഐക്യവും കൂട്ടായ്‌മയും ഒത്തുചേരുന്ന മത്സരത്തിൽ മികച്ച ടീമുകൾ മാറ്റുരയ്ക്കുമ്പോൾ കാണികൾക്ക് ആവേശകരമായ പോരാട്ടങ്ങൾക്കാണ് വേദിയൊരുങ്ങുന്നത്.
വിജയികളെ കാത്തിരിക്കുന്നത് ആകർഷകമായ സമ്മാനത്തുകയാണ്. ഒന്നാം സമ്മാനമായി 10,001 ഡോളറും രണ്ടാം സമ്മാനമായി 5,001 ഡോളറും മൂന്നാം സമ്മാനമായി 3,001 ഡോളറും നാലാം സമ്മാനമായി 2,001 ഡോളറും ലഭിക്കും. അഞ്ചു മുതൽ എട്ടു വരെ സ്‌ഥാനങ്ങളിലെത്തുന്ന ടീമുകൾക്ക് 1,000 ഡോളർ വീതവും സമ്മാനമായി നൽകും.
വടംവലി മത്സരങ്ങൾക്കൊപ്പം കുടുംബങ്ങൾക്കും കുട്ടികൾക്കും ഒരുപോലെ ആസ്വദിക്കാവുന്ന വിപുലമായ ആഘോഷമേളയായിരിക്കും പോർക്കളം 2026. വിവിധ വ്യാപാര സ്‌റ്റാളുകൾ, ഭക്ഷണശാലകൾ, കുട്ടികൾക്കായുള്ള റൈഡുകൾ, വിനോദപരിപാടികൾ തുടങ്ങി എല്ലാവർക്കും ആസ്വദിക്കാവുന്ന നിരവധി ആകർഷണങ്ങൾ പരിപാടിയുടെ ഭാഗമായി ഒരുക്കും. കായികപ്രേമികൾക്കും കുടുംബങ്ങൾക്കും സുഹൃത്തുക്കൾക്കും ഒരുമിച്ചെത്തി ഒരു ദിവസം മുഴുവൻ ആഘോഷിക്കാനും ആസ്വദിക്കാനും കഴിയുന്ന രീതിയിലാണ് സംഘാടകർ പരിപാടി ആസൂത്രണം ചെയ്യുന്നത്.
മെൽബണിലെ മലയാളി സമൂഹത്തെ ഒരുമിപ്പിക്കുന്നതോടൊപ്പം കേരളത്തിന്റെ കായിക പാരമ്പര്യവും സാംസ്‌കാരിക ഐക്യവും ആഗോളതലത്തിൽ ഉയർത്തിക്കാട്ടുക എന്ന ലക്ഷ്യത്തോടെയാണ് പോർക്കളം 2026 സംഘടിപ്പിക്കുന്നത്. ഓസ്ട്രേലിയൻ വടംവലി അസോസിയേഷന്റെ പിന്തുണയോടെ നടക്കുന്ന ഈ മത്സരം വടംവലി കായികരംഗത്തിന്റെ വളർച്ചയ്ക്കും വിവിധ രാജ്യങ്ങളിൽ നിന്നുള്ള ടീമുകൾ തമ്മിലുള്ള സൗഹൃദബന്ധം ശക്തിപ്പെടുത്തുന്നതിനും സഹായകമാകുമെന്ന് സംഘാടകർ പ്രതീക്ഷിക്കുന്നു.
രാജ്യാന്തര ടീമുകളുടെ പങ്കാളിത്തം, വൻ സമ്മാനത്തുക, ഭക്ഷണവൈവിധ്യങ്ങൾ, വ്യാപാര സ്‌റ്റാളുകൾ, കുട്ടികൾക്കായുള്ള റൈഡുകൾ എന്നിവയിലൂടെ പോർക്കളം 2026 മെൽബണിലെ മലയാളി സമൂഹത്തിന് അവിസ്‌മരണീയമായ അനുഭവം സമ്മാനിക്കുമെന്നാണ് സംഘാടകരുടെ പ്രതീക്ഷ. മെൽബണിലെയും സമീപ പ്രദേശങ്ങളിലെയും എല്ലാ മലയാളികളെയും കുടുംബസമേതം പരിപാടിയിൽ പങ്കുചേർന്ന് ഈ കായിക-വിനോദ മേള വിജയിപ്പിക്കണമെന്ന് മെൽബൺ മലയാളി ഫെഡറേഷൻ അഭ്യർഥിച്ചു.
