അറബിക്കടലിൽ സൊമാലിയൻ കടൽക്കൊള്ളക്കാർ തട്ടിയെടുത്ത ‘അസിനി’ (Azini) എന്ന ഇറാനിയൻ മത്സ്യബന്ധന കപ്പലും അതിലെ 20 ജീവനക്കാരെയും ഇന്ത്യൻ നാവികസേന അതിസാഹസികമായി മോചിപ്പിച്ചു. മുംബൈയിൽ നിന്ന് ഏകദേശം 3,000 കിലോമീറ്റർ അകലെ ആഴക്കടലിൽ 48 മണിക്കൂർ നീണ്ടുനിന്ന അതിനിർണായകമായ സംയുക്ത സൈനിക ദൗത്യത്തിലൂടെയാണ് നാവികസേന ഈ വിജയം കൈവരിച്ചത്.
ഒക്ടോബർ 29-നാണ് വടക്കുകിഴക്കൻ സൊമാലിയയിലെ ബന്ദർ ബെയ്‌ല, ഹഫൂൺ തീരദേശ പട്ടണങ്ങൾക്കിടയിൽവച്ച് അസിനി കടൽക്കൊള്ളക്കാർ തട്ടിയെടുത്തത്. സായുധരായ സംഘം കപ്പൽ നിയന്ത്രണത്തിലാക്കിയതോടെ ജീവനക്കാർ അപകടത്തിലാവുകയായിരുന്നു. തുടർന്ന് ഇന്ത്യൻ നാവികസേന നടത്തിയ ഇടപെടലാണ് 20 പേരുടെയും മോചനത്തിന് വഴിയൊരുക്കിയത്. ഇന്നലെ (നവംബർ 2) ആയിരുന്നു ഓപ്പറേഷൻ പൂർത്തിയാക്കിയത്.
ഇന്ത്യൻ നാവികസേനയുടെ ഏകോപിത നീക്കവും വ്യോമസേനയുടെ സമയോചിതമായ പിന്തുണയുമാണ് ദൗത്യം വിജയത്തിലെത്തിച്ചത്. വിവരം ലഭിച്ച ഉടൻ തന്നെ നാവികസേന തങ്ങളുടെ യുദ്ധക്കപ്പലായ ഐ.എൻ.എസ് കൊൽക്കത്ത (INS Kolkata) കപ്പലിനെ പിന്തുടരാൻ നിയോഗിച്ചു. നിരീക്ഷണത്തിനായി പി-8ഐ (P-8I) വിമാനങ്ങളും എംക്യു-9 (MQ-9) ഡ്രോണുകളും ഉപയോഗിച്ചു. ഇന്ത്യൻ വ്യോമസേനയുടെ സി-17 (C-17) തന്ത്രപ്രധാന വിമാനത്തിൽ നിന്ന് കടലിലേക്ക് പാരഡ്രോപ്പ് ചെയ്താണ് നാവികസേനയുടെ പ്രമുഖ കമാൻഡോ വിഭാഗമായ മാർക്കോസ് (MARCOS) കപ്പലിലേക്ക് ഇറങ്ങിയത്. കമാൻഡോകൾ കൊള്ളക്കാരുടെ തടസ്സങ്ങളെ മറികടന്ന് കപ്പൽ പൂർണ്ണ നിയന്ത്രണത്തിലാക്കുകയും, ജീവനക്കാർക്ക് യാതൊരുവിധ പരിക്കുകളുമേൽക്കാതെ സുരക്ഷിതമായി മോചിപ്പിക്കുകയും ചെയ്തു.
വിജയകരമായ ഈ ദൗത്യത്തിന് പിന്നാലെ ന്യൂഡൽഹിയിലെ ഇറാനിയൻ എംബസി ഇന്ത്യൻ സർക്കാരിനും നാവികസേനയ്ക്കും വ്യോമസേനയ്ക്കും ഔദ്യോഗികമായി നന്ദി അറിയിച്ചു. ഇന്ത്യയുടെ ഈ മാനുഷിക ഇടപെടൽ ഇരുരാജ്യങ്ങളും തമ്മിലുള്ള ശക്തമായ സൗഹൃദത്തിൻ്റെയും സഹകരണത്തിൻ്റെയും തെളിവാണെന്ന് ഇറാൻ വ്യക്തമാക്കി.
കേന്ദ്ര പ്രതിരോധ മന്ത്രി രാജ്‌നാഥ് സിങ്ങും നാവികസേനയുടെ മികച്ച ഏകോപനത്തെയും ധീരതയെയും അഭിനന്ദിച്ചു. 48 മണിക്കൂർ നീണ്ട ഏകോപിത പ്രവർത്തനത്തിലൂടെ 20 ജീവനക്കാരെയും രക്ഷപ്പെടുത്തിയത് സേനയുടെ ഉയർന്ന പ്രവർത്തനസജ്ജതയുടെ തെളിവാണെന്ന് അദ്ദേഹം എക്‌സിൽ കുറിച്ചു. ഇന്ത്യൻ മഹാസമുദ്ര മേഖലയിലെ കടൽസുരക്ഷ ഉറപ്പാക്കുന്നതിലും സമുദ്രപാതകളിലെ ഭീഷണികൾ നേരിടുന്നതിലും ഇന്ത്യയുടെ പ്രതിബദ്ധതയാണ് ദൗത്യം വ്യക്തമാക്കുന്നതെന്ന് രാജ്‌നാഥ് സിങ് പറഞ്ഞു. സുരക്ഷിതവും സ്വതന്ത്രവും തുറന്നതുമായ ഇന്ത്യൻ മഹാസമുദ്ര മേഖല ഉറപ്പാക്കാൻ ഇന്ത്യ പ്രതിജ്ഞാബദ്ധമാണെന്നും അദ്ദേഹം വ്യക്തമാക്കി.
Photo: X/Rajnathsingh
