കോട്ടയം: കേരളത്തിലെ റബർ വില ചരിത്രത്തിലാദ്യമായി കിലോയ്ക്ക് 300 രൂപ കടന്ന് റെക്കോർഡ് ഇട്ടു. കോട്ടയം, കൊച്ചി തുടങ്ങിയ പ്രമുഖ വിപണികളിൽ ഉയർന്ന ഗ്രേഡ് റബർ (RSS 4) ആണ് ഒക്ടോബർ – നവംബർ മാസങ്ങളോടെ ഈ ചരിത്ര നേട്ടം കൈവരിച്ചത്. ഇന്നലെ കോട്ടയം, കൊച്ചി മാർക്കറ്റിൽ ആർഎസ്എസ് 4ന്റെ വില കിലോഗ്രാമിനു 300 രൂപ എന്ന സർവകാല റെക്കോർഡിൽ എത്തി.
ഓപ്പൺ മാർക്കറ്റിൽ കഴി‍ഞ്ഞയാഴ്ച 300 രൂപയ്ക്കു കച്ചവടം നടന്നിരുന്നെങ്കിലും റബർ ബോർഡ് വില 300-ൽ എത്തിയത് ഇന്നലെയാണ്. കേരളത്തിൽ റബർ ഉത്പാദനം തുടങ്ങിയതിനു ശേഷം ഇതുവരെ ലഭിച്ചിട്ടുള്ളതിൽ വച്ച് ഏറ്റവും ഉയർന്ന നിരക്കാണിത്.
ഇതിനു മുൻപ് കേരളത്തിൽ ഏറ്റവും ഉയർന്ന വില രേഖപ്പെടുത്തിയത് 2011-ൽ ആയിരുന്നു (കിലോയ്ക്ക് 248 രൂപ). അതിനുശേഷം നീണ്ട വർഷങ്ങളായി കർഷകർ കടുത്ത വിലത്തകർച്ച നേരിടുകയായിരുന്നു. ഈ വർഷം ജനുവരിയിൽ കിലോയ്ക്ക് 192 രൂപ ആയിരുന്ന റബർ വിലയാണ് വെറും ഒൻപത് മാസം കൊണ്ട് 100 രൂപയിലധികം വർധിച്ച് 300-ൽ എത്തിയത്.
അന്താരാഷ്ട്ര തലത്തിൽ റബർ ഉത്പാദിപ്പിക്കുന്ന പ്രധാന രാജ്യങ്ങളായ തായ്‌ലൻഡ്, മലേഷ്യ, ഇന്തോനേഷ്യ എന്നിവിടങ്ങളിലും ഉത്പാദനം കുറഞ്ഞതും, പശ്ചിമേഷ്യൻ യുദ്ധങ്ങളും ക്രൂഡ് ഓയിൽ വിലവർധനവും കാരണം വിദേശത്തുനിന്ന് റബർ ഇറക്കുമതി ചെയ്യുന്നത് ചെലവേറിയതായി മാറിയതും ആഭ്യന്തര റബറിന് ഡിമാൻഡ് കൂട്ടി. അസംസ്‌കൃത എണ്ണവില കൂടിയതോടെ സ്വാഭാവിക റബറിന് പകരമുള്ള സിന്തറ്റിക് റബറിന്റെ വിലയും ഉയർന്നതാണ് വിലകയറാനുള്ള മറ്റൊരു കാരണം.
