ന്യൂ ഡൽഹി: ഇന്ത്യയുടെ ആഭ്യന്തര രഹസ്യാന്വേഷണ ഏജൻസിയായ ഇന്റലിജൻസ് ബ്യൂറോയുടെ (IB) പുതിയ ഡയറക്ടറായി മുതിർന്ന ഐപിഎസ് ഉദ്യോഗസ്ഥൻ മഹേഷ് ദീക്ഷിതിനെ കേന്ദ്ര സർക്കാർ നിയമിച്ചു. പ്രധാനമന്ത്രി നരേന്ദ്ര മോദി അധ്യക്ഷനായ കാബിനറ്റ് നിയമന സമിതിയാണ് ഈ നിയമനത്തിന് അംഗീകാരം നൽകിയത്. നിലവിലെ ഐബി മേധാവി തപൻ കുമാർ ഡേകയുടെ കാലാവധി ജൂൺ 30-ന് അവസാനിക്കുന്നതിനെ തുടർന്നാണ് മഹേഷ് ദീക്ഷിത് ചുമതലയേൽക്കുന്നത്.
1993 ബാച്ചിലെ ആന്ധ്രാപ്രദേശ് കേഡർ ഐപിഎസ് ഉദ്യോഗസ്ഥനായ മഹേഷ് ദീക്ഷിത് നിലവിൽ ഐബിയുടെ സ്പെഷ്യൽ ഡയറക്ടറായിരുന്നു. ചുമതലയേറ്റ തീയതി മുതൽ രണ്ട് വർഷത്തേക്കാണ് നിയമനം. കേന്ദ്ര സർക്കാർ പുറത്തിറക്കിയ ഉത്തരവ് പ്രകാരം, സർവീസ് കാലാവധി നീട്ടിയാണ് അദ്ദേഹത്തെ ഡയറക്ടർ സ്ഥാനത്തേക്ക് നിയമിച്ചിരിക്കുന്നത്. പൂനെയിൽ നിന്ന് മെഡിസിനിൽ ബിരുദാനന്തര ബിരുദം നേടിയ അദ്ദേഹം, ഇന്ത്യയുടെ ചരിത്രത്തിൽ ആദ്യമായാണ് ഒരു മെഡിക്കൽ ബിരുദധാരി ഈ ചാരസംഘടനയുടെ തലപ്പത്തെത്തുന്നത് എന്ന റെക്കോർഡും സ്വന്തമാക്കി. സിവിൽ സർവീസ് പരീക്ഷയിൽ 35-ാം റാങ്ക് നേടിയാണ് അദ്ദേഹം ഐപിഎസിലേക്ക് എത്തിയത്.
ജമ്മു കശ്മീരിലെ ശ്രീനഗറിലുള്ള സബ്സിഡിയറി ഇന്റലിജൻസ് ബ്യൂറോയുടെ (SIB) മേധാവിയായി അദ്ദേഹം ദീർഘകാലം പ്രവർത്തിച്ചിട്ടുണ്ട്. ജമ്മു കശ്മീരിന്റെ പ്രത്യേക പദവി റദ്ദാക്കിയതിന് (ആർട്ടിക്കിൾ 370) ശേഷമുള്ള സുരക്ഷാ ക്രമീകരണങ്ങളിലും ആഭ്യന്തര സ്ഥിരത നിലനിർത്തുന്നതിലും അദ്ദേഹം നിർണായക പങ്ക് വഹിച്ചു. ഭീകരവിരുദ്ധ പ്രവർത്തനങ്ങൾ, കശ്മീർ തീവ്രവാദം, അതിർത്തി കടന്നുള്ള നുഴഞ്ഞുകയറ്റം, വടക്കുകിഴക്കൻ സംസ്ഥാനങ്ങളിലെ ആഭ്യന്തര സുരക്ഷാ പ്രശ്നങ്ങൾ എന്നിവ കൈകാര്യം ചെയ്യുന്നതിൽ മികച്ച അനുഭവസമ്പത്തുള്ള ഉദ്യോഗസ്ഥനാണ് അദ്ദേഹം. ആഭ്യന്തര സുരക്ഷയുമായി ബന്ധപ്പെട്ട അതീവ രഹസ്യമായ ചുമതലകള് വിജയകരമായി നിര്വഹിച്ച ഉദ്യോഗസ്ഥനെന്ന പേരും അദ്ദേഹത്തിനുണ്ട്.
രാജ്യത്തിനകത്തെ സുരക്ഷാ ഭീഷണികളെക്കുറിച്ചുള്ള വിവരശേഖരണവും വിശകലനവും നടത്തുന്ന ഇന്ത്യയുടെ പ്രധാന ആഭ്യന്തര രഹസ്യാന്വേഷണ ഏജൻസിയാണ് ഇൻറലിജൻസ് ബ്യൂറോ. ഭീകരവിരുദ്ധ പ്രവർത്തനങ്ങൾ, ആഭ്യന്തര സുരക്ഷ, കൗണ്ടർ ഇൻ്റലിജൻസ് എന്നിവയിൽ നിർണായക പങ്ക് വഹിക്കുന്ന ഈ ഏജൻസി കേന്ദ്ര ആഭ്യന്തര മന്ത്രാലയത്തിൻ്റെ കീഴിലാണ് പ്രവർത്തിക്കുന്നത്. കേന്ദ്ര-സംസ്ഥാന സുരക്ഷാ ഏജൻസികളുമായി ചേർന്നാണ് ഐബി രാജ്യസുരക്ഷ ഉറപ്പാക്കുന്നതിനുള്ള പ്രവർത്തനങ്ങൾ ഏകോപിപ്പിക്കുന്നത്.
