യെമനിൽ ഹൂത്തി വിമതരും സൗദി അനുകൂല സർക്കാർ സൈന്യവും തമ്മിലുള്ള ആഭ്യന്തരയുദ്ധം പൂർണ്ണതോതിലുള്ള യുദ്ധത്തിലേക്ക് നീങ്ങുന്നു. സെപ്റ്റംബർ ആദ്യവാരം ആരംഭിച്ച അതിശക്തമായ കര-വ്യോമ ആക്രമണങ്ങളെ തുടർന്ന് ഇരുപക്ഷത്തുമായി ഇതിനകം 300-ലധികം പേർ കൊല്ലപ്പെട്ടതായാണ് ഏറ്റവും പുതിയ അന്താരാഷ്ട്ര മാധ്യമ റിപ്പോർട്ടുകൾ വ്യക്തമാക്കുന്നത്.
തായ്സ് (Taiz), ഹൊദെയ്ദ (Al-Hodeidah) പ്രവിശ്യകളിലാണ് ഏറ്റവും രൂക്ഷമായ പോരാട്ടം നടക്കുന്നത്. തന്ത്രപ്രധാനമായ ബാബ് അൽ-മന്ദബ് കടലിടുക്ക് ലക്ഷ്യമിട്ട് ഹൂത്തികൾ വലിയ തോതിലുള്ള മിസൈൽ-ഡ്രോൺ ആക്രമണങ്ങൾ നടത്തിയതോടെ യെമൻ സർക്കാർ തങ്ങളുടെ സ്വന്തം വ്യോമസേനയെ ഉപയോഗിച്ച് ഹൂത്തി കേന്ദ്രങ്ങൾക്ക് നേരെ വൻ തിരിച്ചടി ആരംഭിച്ചിട്ടുണ്ട്. കഴിഞ്ഞ കുറച്ചു ദിവസങ്ങളായി നടക്കുന്ന പോരാട്ടങ്ങളിൽ ഇരുഭാഗത്തുനിന്നുമായി നിരവധി പേർ കൊല്ലപ്പെട്ടതായാണ് സൈനിക വൃത്തങ്ങൾ വിശദമാക്കുന്നത്. കനത്ത ഷെല്ലിംഗും റോക്കറ്റ് ആക്രമണങ്ങളുമാണ് ഹൂത്തി വിമതരുടെ ഭാഗത്തുനിന്നുണ്ടാകുന്നത്.
യെമനിലെ യുഎൻ പ്രത്യേക പ്രതിനിധി ഹാൻസ് ഗ്രണ്ട്ബെർഗ് (Hans Grundberg) ഇരുവിഭാഗത്തോടും ഉടനടി വെടിനിർത്തലിന് ആഹ്വാനം ചെയ്തു. നിലവിലെ സാഹചര്യം ഒരു ദശകത്തിലേറെയായി തുടരുന്ന ഈ യുദ്ധത്തെ ഏറ്റവും വഷളായ അവസ്ഥയിലേക്ക് എത്തിക്കുമെന്നും അദ്ദേഹം ആശങ്ക പ്രകടിപ്പിച്ചു. പുതിയ പോരാട്ടങ്ങൾ ആയിരക്കണക്കിന് സാധാരണക്കാരായ ജനങ്ങളെ വീണ്ടും തങ്ങളുടെ വാസസ്ഥലങ്ങളിൽ നിന്ന് പലായനം ചെയ്യാൻ നിർബന്ധിതരായിട്ടുണ്ട്. വെറും 72 മണിക്കൂറിനുള്ളിൽ സംഘർഷ മേഖലകളിൽ നിന്ന് 18,500-ലധികം ആളുകൾ (ഏകദേശം 2,000 കുടുംബങ്ങൾ) ഭവനരഹിതരായി പലായനം ചെയ്തതായി അന്താരാഷ്ട്ര കുടിയേറ്റ സംഘടന (IOM) അറിയിച്ചു.
ഇറാന്റെ പിന്തുണയുള്ള ഹൂത്തികളും യു.എസ്-സൗദി സഖ്യവും തമ്മിലുള്ള ഈ പോരാട്ടം മിഡിൽ ഈസ്റ്റിൽ പുതിയൊരു യുദ്ധമുഖം തുറന്നിരിക്കുകയാണ്. ഹോർമുസ് കടലിടുക്ക് ഭാഗികമായി അടഞ്ഞുകിടക്കുന്നതിനാൽ, ആഗോള എണ്ണവ്യാപാരത്തിന് ബാബ് അൽ-മന്ദബ് കടലിടുക്കിലെ സുരക്ഷ വളരെ നിർണായകമാണ്. ഇവിടെ കപ്പൽ ഗതാഗതം തടസ്സപ്പെടുന്നത് ലോകമെമ്പാടുമുള്ള ചരക്കുകൂലി വർദ്ധിക്കാൻ കാരണമായേക്കുമെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു
