അൾജീരിയ യുണൈറ്റഡ് അറബ് എമിറേറ്റ്സുമായുള്ള (യുഎഇ) നയതന്ത്ര ബന്ധം പൂർണ്ണമായും വിച്ഛേദിച്ചു. തുടർച്ചയായ മുന്നറിയിപ്പുകൾ അവഗണിച്ചുകൊണ്ട് അബുദാബി സ്വീകരിച്ച “പ്രകോപനപരവും ശത്രുതാപരവുമായ” നടപടികളാണ് ഈ തീരുമാനത്തിന് കാരണമെന്ന് അൾജീരിയൻ വിദേശകാര്യ മന്ത്രാലയം അറിയിച്ചു.
അൾജീരിയയിലെ യുഎഇ അംബാസഡറെ വിദേശകാര്യ മന്ത്രാലയത്തിലേക്ക് വിളിച്ചുവരുത്തി 48 മണിക്കൂറിനുള്ളിൽ രാജ്യം വിടാൻ നിർദ്ദേശം നൽകി. മാത്രമല്ല യുഎഇ രജിസ്ട്രേഷനിലുള്ള സൈനിക, സിവിലിയൻ വിമാനങ്ങൾക്ക് അൾജീരിയൻ വ്യോമപാതയിൽ വിലക്കേർപ്പെടുത്തി. എന്നാൽ നിലവിലെ കരാർ പ്രകാരം വാണിജ്യ വിമാനങ്ങൾക്ക് 2026 അവസാനം വരെ ഇളവ് അനുവദിച്ചിട്ടുണ്ട്.
അൾജീരിയയുടെ ഈ തീരുമാനം താത്ക്കാലികം മാത്രമാണെന്ന് കരുതുന്നതായി യുഎഇ വിദേശകാര്യ മന്ത്രാലയം പ്രതികരിച്ചു. ലോകരാജ്യങ്ങളുമായി സഹകരണവും സൗഹൃദവും വളർത്തുന്ന നയമാണ് തങ്ങളുടേതെന്നും, യുഎഇയിലുള്ള മുപ്പതിനായിരത്തോളം വരുന്ന അൾജീരിയൻ പ്രവാസികളുമായുള്ള ശക്തമായ സൗഹൃദം തുടരുമെന്നും യുഎഇ വ്യക്തമാക്കി. നയതന്ത്രം എന്നത് അവ്യക്തമായ സൂചനകൾക്ക് പകരം യുക്തിയിലും ആശയവിനിമയത്തിലും അധിഷ്ഠിതമായിരിക്കണമെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് അൻവർ ഗർഗാഷ് പരോക്ഷമായി വിമർശിച്ചു.
2020-ൽ യുഎഇ ഇസ്രായേലുമായി നയതന്ത്ര ബന്ധം സ്ഥാപിച്ചതിനെ (അബ്രഹാം അക്കോർഡ്) അൾജീരിയ ശക്തമായി എതിർത്തിരുന്നു. പലസ്തീൻ ജനതയുടെ അവകാശങ്ങളെ ഹനിക്കുന്ന ഇസ്രായേലുമായുള്ള ഏതൊരു നയതന്ത്ര നീക്കത്തെയും അൾജീരിയ ശക്തമായി എതിർക്കുന്നു. ഉത്തര ആഫ്രിക്കൻ മേഖലയിൽ യുഎഇയും മൊറോക്കോയും വഴി ഇസ്രായേലിന്റെ സ്വാധീനം വർദ്ധിക്കുന്നത് തങ്ങൾക്ക് ഭീഷണിയാണെന്ന് അൾജീരിയ കരുതുന്നു. മൊറോക്കോയുമായി യുഎഇയുടെ അടുത്ത ബന്ധവും അൾജീരിയയെ പ്രകോപിപ്പിച്ചതായും വിലയിരുത്തുന്നുണ്ട്. 2021-ൽ മൊറോക്കോയുമായുള്ള ബന്ധം വിച്ഛേദിച്ചതിന് ശേഷം, അൾജീരിയ നയതന്ത്ര ബന്ധം അവസാനിപ്പിക്കുന്ന രണ്ടാമത്തെ അറബ് രാജ്യമാണ് യുഎഇ.
അൾജീരിയയുടെ പ്രധാന പ്രാദേശിക എതിരാളിയാണ് മൊറോക്കോ. തർക്കപ്രദേശമായ പടിഞ്ഞാറൻ സഹാറയുടെ മേൽ മൊറോക്കോ ഉന്നയിക്കുന്ന പരമാധികാരത്തെ യുഎഇ ശക്തമായി പിന്തുണയ്ക്കുന്നു. ഇതിന്റെ ഭാഗമായി യുഎഇ അവിടെ ഒരു കോൺസുലേറ്റ് വരെ തുറന്നിട്ടുണ്ട്. പടിഞ്ഞാറൻ സഹാറയുടെ സ്വാതന്ത്ര്യത്തിനായി പോരാടുന്ന ‘പോളിസാരിയോ ഫ്രണ്ട്’ (Polisario Front) എന്ന സായുധ ഗ്രൂപ്പിനെ പിന്തുണയ്ക്കുന്നത് അൾജീരിയയാണ്. തങ്ങളുടെ ദേശീയ സുരക്ഷയ്ക്ക് ഭീഷണിയായ മൊറോക്കോയ്ക്ക് യുഎഇ നൽകുന്ന പിന്തുണ അൾജീരിയയെ പ്രകോപിപ്പിച്ചു.
ഉത്തര ആഫ്രിക്കയിലും സഹേൽ (Sahel) മേഖലയിലുമുള്ള ലിബിയ, മാലി, സുഡാൻ, നൈജർ തുടങ്ങിയ രാജ്യങ്ങളിൽ യുഎഇ നടത്തുന്ന ഇടപെടലുകൾ ആ രാജ്യങ്ങളെ അസ്ഥിരപ്പെടുത്തുന്നുവെന്ന് അൾജീരിയ ആരോപിക്കുന്നു. ലിബിയയിൽ ഖലീഫ ഹഫ്താറിന്റെ വിമത സേനയ്ക്കും, സുഡാനിലെ ആഭ്യന്തര യുദ്ധത്തിൽ ആർ.എസ്.എഫ് (RSF) പാരാമിലിട്ടറി ഗ്രൂപ്പിനും യുഎഇ നൽകുന്ന പിന്തുണ അൾജീരിയയെ അസ്വസ്ഥമാക്കിയിരുന്നു. “യുഎഇ എവിടെയൊക്കെ കാലുകുത്തുന്നുവോ അവിടെയൊക്കെ രക്തച്ചൊരിച്ചിൽ ഉണ്ടാകുന്നു” എന്ന് അൾജീരിയൻ പ്രസിഡന്റ് അബ്ദെൽമദ്ജിദ് തെബൂൻ പരസ്യമായി വിമർശിച്ചിരുന്നു.
അൾജീരിയ ഭീകര സംഘടനയായി പ്രഖ്യാപിച്ച, പാരീസ് ആസ്ഥാനമായി പ്രവർത്തിക്കുന്ന ‘എം.എ.കെ’ (MAK – Movement for the Self-Determination of Kabylie) എന്ന വിഘടനവാദി ഗ്രൂപ്പിന് യുഎഇ സാമ്പത്തികവും യുദ്ധതന്ത്രപരവുമായ പിന്തുണ നൽകുന്നുവെന്ന് അൾജീരിയൻ സുരക്ഷാ ഏജൻസികൾ ആരോപിക്കുന്നു. അൾജീരിയയുടെ ദേശീയ ഐക്യം തകർക്കാൻ ഇസ്രായേലും മൊറോക്കോയുമായി ചേർന്ന് യുഎഇ ഗൂഢാലോചന നടത്തുന്നുവെന്നാണ് അൾജീരിയയുടെ ആക്ഷേപം. തങ്ങളുടെ അയൽപക്കത്ത് യുഎഇ നടത്തുന്ന രാഷ്ട്രീയ-സൈനിക ഇടപെടലുകൾ സ്വന്തം ദേശീയ സുരക്ഷയ്ക്ക് നേരിട്ടുള്ള ഭീഷണിയാണെന്ന് അൾജീരിയ വിലയിരുത്തിയതാണ് നയതന്ത്ര ബന്ധങ്ങൾ പൂർണ്ണമായി അവസാനിപ്പിക്കാൻ കാരണമായത്.
