ഗ്യാസ് ട്രബിൾ

‘ഗ്യാസ്ട്രബിളാ’ലെ വലഞ്ഞു രാജ്യം
നാട്ടുകാർ നെട്ടോട്ടമോടുകയായ്
പാചക വാതക ക്ഷാമമായി
ആളുകളാശങ്ക തൻ തീയിലായ്
അഗ്നിയാളുന്നതടുപ്പിലല്ല
ആളുകൾ തൻ ഹൃത്തടത്തിലല്ലോ!
സൂര്യതാപത്തിൽ നാം ‘വേവു’ മെന്നാൽ
ആഹാരമാവിധം വെന്തിടുമോ ?
ആരോടു ചൊല്ലുവാൻ ആവലാതി
‘എജൻസികൾ’ കൈമലർത്തിടുന്നു
ഹോട്ടലും തട്ടുകടേം ഹോസ്റ്റലും
ക്യാൻ്റീനുമൊക്കയും പൂട്ടുകയായ്
ഭക്ഷണമില്ലാതെ ജീവിക്കുവാൻ
ഇക്ഷിതിയിൽ ശാസ്ത്രമെത്തിടുമോ?
ഇസ്ഥിതിയിൽ നമ്മളെന്തു ചെയ്യും
സ്വസ്ഥത കൈവിട്ടു പോയിടുമോ?
കായ്കനി തിന്നിനി ജീവിക്കണോ ?@
കാന്താര വാസമാവർത്തിക്കണോ?

ഹേന പ്രസാദ്