അങ്കമാലി, കൊച്ചി: സിറോ മലബാർ സഭയുടെ സെന്റ് മേരീസ് കത്തീഡ്രൽ ബസലിക്കയിലെ കുർബാന തർക്കവുമായി ബന്ധപ്പെട്ട കേസിൽ കേരള ഹൈക്കോടതി നിർണ്ണായക ഉത്തരവ് പുറപ്പെടുവിച്ചു. മധ്യസ്ഥ ചർച്ചകൾ പൂർത്തിയാകുന്നത് വരെ ബസലിക്കയിലോ അനുബന്ധ ചാപ്പലിലോ യാതൊരുവിധത്തിലുള്ള വിശുദ്ധ കുർബാനയും നടത്തരുതെന്ന് ഹൈക്കോടതി ഉത്തരവിട്ടു. ബസലിക്കയ്ക്ക് പൊലീസ് സംരക്ഷണം ആവശ്യപ്പെട്ട് മേജർ ആർച്ച് ബിഷപ്പിൻ്റെ വികാരി മാർ ജോസഫ് പാംപ്ലാനി നൽകിയ ഹർജിയിലാണ് ഇടക്കാല ഉത്തരവ്.
ബസലിക്കയിലെ കുർബാന അർപ്പണവുമായി ബന്ധപ്പെട്ട തർക്കം പരിഹരിക്കാൻ റിട്ടയേർഡ് ജസ്റ്റിസ്ടി ആർ.രാമചന്ദ്രൻ നായരെ ഹൈക്കോടതി മധ്യസ്ഥനായി നിയമിച്ചു. ബസലിക്കയിലോ അനുബന്ധ കെട്ടിടങ്ങളിലോ വിശ്വാസികൾക്കായി വിശുദ്ധ കുർബാന അർപ്പിക്കാൻ പാടില്ലെങ്കിലും വൈദികർക്കായി മാത്രമുള്ള കുർബാന ബസലിക്കയോട് ചേർന്നുള്ള ചാപ്പലിൽ നടത്താം.
വിശ്വാസികൾക്കായി എല്ലാ ദിവസവും രാവിലെ 5:30 മുതൽ രാത്രി 8 മണി വരെ പള്ളി തുറന്നു നൽകണം. പ്രതിഷേധക്കാർ അഞ്ച് മണിക്ക് മുൻപ് പള്ളിയിൽ നിന്നും ഒഴിഞ്ഞു പോകണം. പള്ളിയിലേക്ക് ആരാധനയ്ക്ക് വരുന്ന ആരെയും തടയാൻ പാടില്ലെന്നും ജസ്റ്റിസ് ബെച്ചു കുര്യൻ തോമസ് നിർദേശിച്ചു.
