കോയമ്പത്തൂർ: കേരള സംസ്ഥാനത്തിന് പുറത്തുള്ള മലങ്കര ഓർത്തഡോക്സ് സിറിയൻ സഭയുടെ ആദ്യത്തെ മിഷൻ കേന്ദ്രമായി 1936-ൽ കോയമ്പത്തൂരിലെ ക്രിസ്റ്റ ശിഷ്യ ആശ്രമം തടകം സ്ഥാപിതമായി. മലങ്കര ഓർത്തഡോക്സ് സിറിയൻ സഭയിലെ അംഗങ്ങളായ ഫാ. കെ.സി. വർഗീസ്, മിസ്റ്റർ ടി.ഒ. മാത്യു എന്നിവർ ചേർന്ന് ആംഗ്ലിക്കൻ ബിഷപ്പ് ഹെർബർട്ട് പാക്കൻഹാം വാൽഷ് ആണ് ഈ ആശ്രമം സ്ഥാപിച്ചത്. തമിഴ്നാട്ടിലെ കോയമ്പത്തൂർ ജില്ലയിലെ തടകം ഗ്രാമത്തെ അവർ തങ്ങളുടെ പ്രവർത്തന മേഖലയാക്കി. ഈ വർഷം 90-ാം വാർഷികം (നവതി) ആഘോഷിക്കാൻ ആശ്രമം ഒരുങ്ങുകയാണ്. ആശ്രമത്തിന്റെ ‘നവതി’ ആഘോഷത്തിന്റെ ഉദ്ഘാടനം 2026 ഫെബ്രുവരി 5 വ്യാഴാഴ്ച വൈകുന്നേരം 6 മണിക്ക് ആശ്രമ പരിസരത്ത് നടത്തപെടുകയാണ്.
കിഴക്കിന്റെ കാതോലിക്കായും മലങ്കര മെത്രാപ്പോലീത്തായുമായ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ ബാവ നവതി ആഘോഷങ്ങൾ ഉദ്ഘാടനം ചെയ്യും. അമേരിക്കൻ ഓർത്തഡോക്സ് സഭയുടെ ആർച്ച് ബിഷപ്പ് മോസ്റ്റ് റവ. മൈക്കൽ ദഹൂലിച്ച് മുഖ്യാതിഥിയായിരിക്കും. ആശ്രമത്തിന്റെ വിസിറ്റർ ബിഷപ്പ് എച്ച്.ജി. ഗീവർഗീസ് മാർ കൂറിലോസ്, സഭയിലെ മറ്റ് ബിഷപ്പുമാർ, സഹോദര സഭകളിലെ ബിഷപ്പുമാർ, വൈദികർ എന്നിവർ ചടങ്ങിൽ സംബന്ധിക്കും. കേരള നിയമസഭാംഗം ശ്രീ. ചാണ്ടി ഉമ്മൻ, സാമൂഹിക രാഷ്ട്രീയ നേതാക്കൾ എന്നിവരാണ് മറ്റ് വിശിഷ്ടാതിഥികൾ.
ന്യൂസ്: ബോബി ജോൺ
