സിഡ്‌നി: കനത്ത മഴയെ തുടർന്ന് ന്യൂ സൗത്ത് വെയിൽസിൽ ഉണ്ടായ ശക്തമായ വെള്ളപ്പൊക്കത്തിൽ ഇതുവരെ നാലു മരണം. 50,000 -ത്തോളം പേർ വെള്ളപ്പൊക്കത്തിൽ ഒറ്റപ്പെട്ടു. സംസ്‌ഥാനത്തിന്റെ മിഡ് നോർത്ത് കോസ്റ്റ്, ഹണ്ടർ മേഖലകളെ വെള്ളപ്പൊക്കം സാരമായി ബാധിച്ചതായിട്ടാണ് റിപ്പോർട്ട്. തങ്ങളുടെ ജീവിതത്തിൽ ഇതുവരെ കണ്ടിട്ടില്ലാത്തത്ര വലിയ വെള്ളപ്പൊക്കമാണ് ആളുകൾ നേരിടുന്നത്. ന്യൂകാസിൽ മുതൽ കോഫ്സ് ഹാർബർ വരെയുള്ള നദികൾ കരകവിഞ്ഞൊഴുകുന്നതിനാൽ, ആളുകളോട് ഒഴിഞ്ഞുപോകാനോ, സുരക്ഷിതമായ ഉയർന്ന പ്രദേശങ്ങളിലേക്ക് മാറാനോ മുന്നറിയിപ്പു നൽകിയിട്ടുണ്ട്. കൂടാതെ അടിയന്തരമായി ഏകദേശം 9000 പേരെ ഒഴിപ്പിക്കാനുള്ള നിർദ്ദേശം നൽകിയിട്ടുണ്ട്.
ഇതുവരെ 50,000ത്തിലധികം ആളുകൾ വീടുകളിൽ നിന്ന് ഒഴിഞ്ഞുപോയി. 9,500 വീടുകൾക്ക് കേടുപാടുകൾ സംഭവിച്ചു. മെയിൻ, ഹാസ്റ്റ‌ിങ്സ്, മക്ലേ തുടങ്ങിയ നദികൾ കരകവിഞ്ഞൊഴുകുകയാണ്. 15 താൽക്കാലിക അഭയകേന്ദ്രങ്ങൾ പ്രവർത്തനം ആരംഭിച്ചിട്ടുണ്ട്. ന്യൂ സൗത്ത് വെയിൽസ് 100-ത്തിലധികം സ്‌കൂളുകൾ അടച്ചിട്ടു. ആയിരക്കണക്കിന് വീടുകൾക്ക് വൈദ്യുതി ബന്ധം നഷ്‌ടപ്പെട്ടു.
ശക്തമായ കാറ്റ് കാരണം സിഡ്‌നി വിമാനത്താവളത്തിന്റെ രണ്ട് റൺവേകൾ ഇന്ന് രാവിലെ അടച്ചു, ഒരൊറ്റ റൺവേയിൽ നിന്നാണ് വിമാനങ്ങളൾ സർവീസ് നടത്തിയത്. ഡബ്ബോ, ഓറഞ്ച്, ആർമിഡെയ്ൽ എന്നിവിടങ്ങളിൽ നിന്ന് ഇന്ന് രാവിലെ വിമാനത്താവളത്തിൽ എത്തേണ്ടിയിരുന്ന ക്വാണ്ടാസ് സർവീസുകൾ മോശം കാലാവസ്ഥയെത്തുടർന്ന് റദ്ദാക്കി. കൂടുതൽ വിവരങ്ങൾക്കായി എയർലൈനുകളുമായി ബന്ധപ്പെടാൻ വിമാനത്താവളം യാത്രക്കാരോട് അഭ്യർഥിച്ചു.
ബൗണ്ടറി സ്ട്രീറ്റിൽ വെള്ളപ്പൊക്കം ഉണ്ടായതിനെത്തുടർന്ന് ബുധനാഴ്ച ഉച്ചകഴിഞ്ഞ് മുതൽ പോർട്ട് മക്വാരി വിമാനത്താവളം അടച്ചിട്ടിരിക്കുകയാണ്. റദ്ദാക്കിയ വിമാനങ്ങളെക്കുറിച്ചുള്ള വിവരങ്ങൾക്ക് ന്യൂകാസിൽ വിമാനത്താവളത്തിലൂടെയുള്ള യാത്രക്കാർ അവരുടെ എയർലൈനുകളുമായി നേരിട്ട് ബന്ധപ്പെടണമെന്ന് നിർദ്ദേശിച്ചു.
സതേൺ ഹണ്ടർ, ബ്ലൂ മൗണ്ടൻസ്, സതേൺ ഹൈലാൻഡ്സ് എന്നിവിടങ്ങളിൽ ഇന്ന് കഠിനമായ മഴയുണ്ടാകുമെന്ന് കാലാവസ്ഥാ നിരീക്ഷകർ പറയുന്നു. കനത്ത മഴയെത്തുടർന്ന് ന്യൂകാസിലിലെയും സെൻട്രൽ കോസ്റ്റിലെയും താമസക്കാർ വീടിനുള്ളിൽ തന്നെ തുടരാൻ നിർദ്ദേശിച്ചിട്ടുണ്ട്.
ന്യൂകാസിലിനു പടിഞ്ഞാറുള്ള വോളോംബി ബ്രൂക്ക് നദിയിൽ വെള്ളപ്പൊക്ക മുന്നറിയിപ്പ് ബ്യൂറോ നൽകിയിട്ടുണ്ട്, നദിയുടെ ജലനിരപ്പ് നിലവിൽ 8.38 മീറ്റർ ആണ് വെള്ളിയാഴ്ച ഉച്ചയോടെ നദിയുടെ ജലനിരപ്പ് 9 മീറ്ററിലെത്തുമെന്ന് കാലാവസ്ഥാ ബ്യൂറോ അറിയിച്ചു. ബൾഗയിൽ വലിയ വെള്ളപ്പൊക്കത്തിനും സിംഗിൾട്ടണിനും മൈറ്റ്‌ലാൻഡിനും സമീപമുള്ള ലോവർ ഹണ്ടറിൽ മിതമായ വെള്ളപ്പൊക്കത്തിനും സാധ്യതയുണ്ടെന്നും മുന്നറിയിപ്പ് നൽകി.
