ഇസ്ലാമബാദ്: പഹൽഗാമിലെ ഭീകരാക്രമണത്തിൻ്റെ പശ്ചാത്തലത്തിൽ ഇന്ത്യ കൈകൊണ്ട നടപടികൾക്ക് മറുപടിയുമായി പാക്കിസ്ഥാൻ. ഇന്ത്യൻ വിമാനങ്ങൾക്ക് പാക് വ്യോമപാത ഉപയോഗിക്കാൻ അനുമതിയില്ലെന്ന് പാക്കിസ്ഥാൻ പ്രഖ്യാപിച്ചു. വാഗ അതിർത്തി അടയ്ക്കും, ഇന്ത്യൻ പൗരന്മാർക്കുള്ള വിസ മരവിപ്പിച്ചു, ഇന്ത്യയുമായുള്ള എല്ലാ വ്യാപാര ബന്ധങ്ങളും നിർത്തലാക്കിയെന്നും പാക്കിസ്ഥാൻ അറിയിച്ചു. ഷിംല കരാർ ഉൾപ്പെടെ എല്ലാ ഉഭയകക്ഷി കരാറുകളും മരവിപ്പിക്കുമെന്നും പാക്കിസ്ഥാൻ മുന്നറിയിപ്പ് നൽകി. സിന്ധു നദീജല ഉടമ്പടി ഇന്ത്യ ഏകപക്ഷീയമായി മരവിപ്പിച്ചതിനെ പാക്കിസ്ഥാൻ ശക്തമായി അപലപിച്ചു. ജലം നിഷേധിക്കുന്നത് യുദ്ധസമാനമായി കണക്കാക്കുമെന്നും രാജ്യത്തെ സംരക്ഷിക്കാൻ സൈന്യം സജ്ജമാണെന്നും പാക്കിസ്ഥാൻ വ്യക്തമാക്കി.
അതേസമയം, പഹൽഗാം ആക്രമണത്തിലെ പാക്കിസ്‌ഥാന്റെ പങ്ക് ഇന്ത്യ യുഎസ്, യുകെ, റഷ്യ എന്നിവയുൾപ്പടെയുള്ള രാജ്യങ്ങളുടെ അംബാസഡർമാരെ വിളിച്ചു ബോധ്യപ്പെടുത്തി. വിവിധ നയതന്ത്രപ്രതിനിധികളെ വിളിച്ച് ഇന്ത്യ ഇക്കാര്യം വിശദീകരിക്കുകയായിരുന്നു.
ഭീകരാക്രമണത്തിന്‍റെ പശ്ചാത്തലത്തിൽ കേന്ദ്ര ആഭ്യന്തര മന്ത്രി അമിത് ഷാ രാഷ്ട്രപതിയുമായി കൂടിക്കാഴ്ച നടത്തി. വിദേശകാര്യ മന്ത്രി എസ്‍ ജയശങ്കറിനൊപ്പമാണ് അമിത് ഷാ രാഷ്ട്രപതി ദ്രൗപതി മുര്‍മുവുമായി കൂടിക്കാഴ്ച നടത്തിയത്. കശ്മീരിലെ സ്ഥിതിഗതികള്‍ സംബന്ധിച്ച് രാഷ്ട്രപതിയോട് വിശദീകരിച്ചു.
ഇന്ത്യൻ കരസേനാ മേധാവി നാളെ ശ്രീനഗർ സന്ദർശിക്കും. പഹൽഗാം ആക്രമണത്തെത്തുടർന്ന് സുരക്ഷാ സ്ഥിതിഗതികൾ അവലോകനം ചെയ്യുന്നതിനായാണ് ഇന്ത്യൻ കരസേനാ മേധാവി ജനറൽ ഉപേന്ദ്ര ദ്വിവേദി ശ്രീനഗർ സന്ദർശിക്കുന്നത്.
