കോഴിക്കോട്: മുക്കത്ത് പീഡനശ്രമം ചെറുക്കുന്നതിനിടെ കെട്ടിടത്തിൽ നിന്ന് ചാടിയ യുവതിക്ക് ഗുരുതരമായി പരുക്കേറ്റു. സംഭവത്തിൽ ഹോട്ടൽ ഉടമയും രണ്ട് ജീവനക്കാർക്കുമെതിരെയാണ് പൊലീസ് കേസെടുത്ത് അന്വേഷണം ആരംഭിച്ചിരിക്കുന്നത്.
29 -കാരിയായ യുവതി മൂന്നു മാസമായി സ്വകാര്യ ലോഡ്ജിൽ ജോലി ചെയ്യുകയായിരുന്നു. സംഭവദിവസം രാത്രി യുവതി ഫോണിൽ ഗെയിം കളിച്ചുകൊണ്ടിരിക്കെ ഹോട്ടൽ ഉടമയും രണ്ട് ജീവനക്കാരും അകത്തേക്ക് കടന്ന് പീഡിപ്പിക്കാൻ ശ്രമിച്ചുവെന്ന് പരാതിയിൽ പറയുന്നു. അക്രമികളെ തടയാൻ ശ്രമിച്ചെങ്കിലും രക്ഷപ്പെടാനായില്ല.
പ്രാണരക്ഷാർത്ഥം ഓടി കെട്ടിടത്തിൽ നിന്ന് ചാടിയതായാണ് യുവതി പൊലീസിന് നൽകിയ മൊഴി. ഗുരുതരമായി പരുക്കേറ്റ യുവതി ഇപ്പോൾ കോഴിക്കോട് മെഡിക്കൽ കോളേജ് തീവ്രപരിചരണ വിഭാഗത്തിൽ ചികിത്സയിലാണ്. തുടർന്ന് മുക്കം പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. നിലവിൽ യുവതിയുടെ ആരോഗ്യസ്ഥിതിയും കേസ് അന്വേഷണം മുന്നോട്ടു പോകുന്ന രീതിയും പൊലീസ് നിരീക്ഷിച്ച് വരികയാണ്. പ്രതികളെ ഉടൻ അറസ്റ്റ് ചെയ്യുമെന്ന് പൊലീസ് മാധ്യമങ്ങളോട് പറഞ്ഞു. CCTV ദൃശ്യങ്ങൾ അടക്കം എല്ലാ തെളിവുകളും ശേഖരിച്ച് അന്വേഷണം പുരോഗമിക്കുന്നതായി ഉദ്യോഗസ്ഥർ വ്യക്തമാക്കി.
