തലശ്ശേരി: പൊലീസ് സ്റ്റേഷനിൽ തോക്ക് വൃത്തിയാക്കുന്നതിനിടെ പൊലീസ് ഉദ്യോഗസ്ഥന്റെ കയ്യിൽ നിന്ന് അബദ്ധത്തിൽ വെടിപൊട്ടി പൊലീസ് ഉദ്യോഗസ്ഥയ്ക്കു പരുക്കേറ്റു. സംഭവം തലശ്ശേരി പൊലീസ് സ്റ്റേഷനിലാണ് നടന്നത്. വൃത്തിയാക്കുന്നതിനിടെ നിലത്തുവീണ തോക്ക് തിരിച്ചെടുക്കുമ്പോൾ അബദ്ധത്തിൽ വെടിപൊട്ടി വെടിയുണ്ട തറയിൽ കൊള്ളുകയായിരുന്നു. തറയിലെ സിമന്റ് ചീള് തറച്ചാണ് പൊലീസ് ഉദ്യോഗസ്ഥയ്ക്ക് പരുക്കേറ്റതെന്ന് പൊലീസ് പറയുന്നു.
തോക്ക് അശ്രദ്ധയായി കൈകാര്യം ചെയ്ത സിപിഒ സുബിനെ സംഭവത്തോടനുബന്ധിച്ച് സസ്പെൻഡ് ചെയ്തു. പാറാവ് ഡ്യൂട്ടിയിൽ നിന്നു മാറുന്ന സമയത്തായിരുന്നു അപകടം സംഭവിച്ചത്. സുരക്ഷാ നടപടികളിൽ ഉണ്ടായ വീഴ്ചയെ തുടർന്ന് സിപിഒയ്‌ക്കെതിരായ നടപടി പൊലീസ് വകുപ്പ് സ്വീകരിച്ചതായി ഔദ്യോഗിക വൃത്തങ്ങൾ അറിയിച്ചു. പരുക്കേറ്റ പൊലീസ് ഉദ്യോഗസ്ഥ പെരുന്താറ്റിലെ ലിജിഷയ്ക്ക് ചാലയിലെ സ്വകാര്യ ആശുപത്രിയിൽ ചികിത്സ നൽകി.
