ജയ്പൂർ: പാക്കിസ്ഥാന്റെ അർദ്ധസൈനികൻ ഇന്ത്യൻ അതിർത്തിയിൽ പിടിയിൽ. രാജസ്ഥാനിലെ ഇന്ത്യ-പാക് അതിർത്തിക്ക് സമീപത്ത് നിന്നാണ് പാക് റേഞ്ചറെ പിടികൂടിയത്. അതിർത്തിയിൽ നടന്ന പരിശോധനയ്‌ക്കിടെയാണ് അതിർത്തി കടക്കാൻ ശ്രമിക്കുന്ന പാക് ജവാനെ കണ്ടെത്തിയത്. ഇയാളുടെ പേരോ മറ്റ് വിവരങ്ങളോ ബിഎസ്എഫ് പുറത്തുവിട്ടിട്ടില്ല. ശനിയാഴ്ചയാണ് ഇയാളെ ബിഎസ്എഫ് കസ്റ്റഡിയിൽ എടുത്തതെന്ന് ദേശീയമാധ്യമങ്ങൾ റിപ്പോർട്ട് ചെയ്യുന്നു. ഇയാളെ ചോദ്യം ചെയ്തുകൊണ്ടിരിക്കുകയാണ്.
26 പേർ കൊല്ലപ്പെട്ട പഹൽഗാം ഭീകരാക്രമണത്തിനു പിന്നാലെ ഇന്ത്യ-പാക് ബന്ധം വഷളായിരുന്നു. ഇതിനിടെ അബദ്ധത്തിൽ നിയന്ത്രണരേഖ മറികടന്ന അതിർത്തിരക്ഷാസേനയിലെ (ബിഎസ്എഫ്) ഒരു ജവാൻ പാക്കിസ്ഥാന്റെ കസ്റ്റഡിയിലാവുകയും ചെയ്തു. ഇന്ത്യയുടെ ഭാഗത്ത് നിന്ന് കടുത്ത പ്രതിഷേധം ഉയർന്നിട്ടും ഉദ്യോഗസ്ഥനെ പാക് സൈന്യം വിട്ടയച്ചിട്ടില്ല. വിഷയത്തിൽ നിരവധി ഫ്ലാഗ് മീറ്റിംഗുകളും നടന്നു. എന്നാൽ ജവാൻ എവിടെയാണെന്നതിനെ കുറിച്ചോ അദ്ദേഹത്തെ വിട്ടുനൽകുന്നതിനെ കുറിച്ചോ പ്രതികരിക്കാൻ പാക് സൈന്യം തയാറായില്ല. ഇതിനിടെയാണ് അതിർത്തിയിൽ പാക്കിസ്ഥാൻ ജവാൻ ബിഎസ്എഫിന്റെ പിടിയിലായത്.
ഇന്ത്യയും പാക്കിസ്ഥാനും തമ്മിലുള്ള സംഘർഷങ്ങളുടെ പശ്ചാത്തലത്തിൽ ജാഗ്രത പാലിക്കണമെന്ന് ബിഎസ്എഫ് ഉദ്യോഗസ്ഥർക്ക് കർശന മുന്നറിയിപ്പുണ്ട്. പട്രോളിംഗ് ഡ്യൂട്ടിക്കിടെ അബദ്ധത്തിൽ അതിർത്തി കടക്കുന്ന സംഭവങ്ങൾ ഒഴിവാക്കാനും കൂടുതൽ ജാഗ്രത പാലിക്കാനും ജവാൻമാരോട് ആവശ്യപ്പെട്ടു.
അതിനിടെ പഹൽഗാം ഭീകരാക്രമണത്തിന് ശേഷം ജമ്മു കാശ്മീരിലേക്ക് നുഴഞ്ഞുകയറാൻ ലക്ഷ്യമിട്ട് പാക് അധീന കശ്‌മീരിലെ താവളങ്ങളിൽ ഒളിച്ചിരുന്ന പാക്കിസ്ഥാനി ഭീകരർ ഉൾപ്രദേശങ്ങളിലേക്ക് പിൻവാങ്ങിയതായി റിപ്പോർട്ട്. ഏതു നിമിഷവും ഇന്ത്യയുടെ ഭാഗത്ത് നിന്ന് സർജിക്കൽ സ്ട്രൈക്ക് ഉണ്ടാകാമെന്ന ഭീതിയിലാണ് പിൻമാറ്റം. കത്വയോട് ചേർന്നുള്ള ഷക്കർഗഡ്, നൗഷേറയോട് ചേർന്നുള്ള സമാഹ്നി, ഹിരാനഗറിനോട് ചേർന്നുള്ള സുഖ്‌മൽ എന്നിവിടങ്ങളിലെ താവളങ്ങൾ ശൂന്യമാണെന്ന് ഇന്റലിജൻസ് റിപ്പോർട്ടുകളുള്ളതായി സുരക്ഷാ വൃത്തങ്ങളെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഭീകരരെ നുഴഞ്ഞുകയറ്റത്തിന് സഹായിക്കുന്നതിന് ഭീകര താവളങ്ങൾ കേന്ദ്രീകരിച്ച് പ്രവർത്തിച്ചിരുന്ന പാക് സൈന്യത്തിലുൾപ്പെട്ടവരും ഇവിടം ഉപേക്ഷിച്ച് സുരക്ഷിത സ്ഥാനങ്ങളിലേക്ക് നീങ്ങിയതായും റിപ്പോർട്ടുകളുണ്ട്.
കൂടുതൽ നടപടികളുമായി ഇന്ത്യ; പാക്കിസ്ഥാനിൽ നിന്നുള്ള ഇറക്കുമതി നിരോധിച്ചു
