ന്യൂഡല്ഹി: മുഖ്യമന്ത്രി രേഖ ഗുപ്തയ്ക്ക് നേരെ ആക്രമണം. ഇന്ന് രാവിലെ മുഖ്യമന്ത്രിയുടെ സിവില് ലൈന്സിലെ വസതിയിലെ പൊതുജനങ്ങളുടെ പരാതികള് കേള്ക്കുന്ന പൊതു യോഗ (ജന് സന്വായി) -ത്തിനിടെയാണ് സംഭവം. യോഗത്തിനിടെ ഒരാള് രേഖ ഗുപ്തയുടെ മുഖത്തടിക്കുകയായിരുന്നു. അക്രമിയെ പൊലീസ് അറസ്റ്റ് ചെയ്തിട്ടുണ്ട്.
മുഖ്യമന്ത്രിയുടെ ഔദ്യോഗിക വസതിയോട് ചേര്ന്ന ഓഫീസില് വെച്ചാണ് ജനസമ്പര്ക്ക പരിപാടി നടന്നത്. എല്ലാ ബുധനാഴ്ചയും രേഖാ ഗുപ്ത തന്റെ ഔദ്യോഗിക വസതിയോട് ചേര്ന്ന ഓഫീസില് ജനസമ്പര്ക്ക പരിപാടി നടത്താറുണ്ട്. ഇതില് പങ്കെടുക്കാനെന്ന രീതിയില് ചില പേപ്പറുകളുമായി എത്തിയ യുവാവാണ് രേഖാ ഗുപ്തയെ ആക്രമിച്ചത്. സംഭവത്തിന് പിന്നാലെ മുഖ്യമന്ത്രിയുടെ സുരക്ഷാ ഉദ്യോഗസ്ഥര് ഇയാളെ അറസ്റ്റ് ചെയ്ത് നീക്കി. 35 വയസുള്ള ആളാണ് ആക്രമണം നടത്തിയത്. ഇയാളെ പോലീസ് സ്റ്റേഷനിലേക്ക് മാറ്റി, ചോദ്യം ചെയ്യുകയാണ്.
പോലീസിന്റെയും സുരക്ഷാ ഉദ്യോഗസ്ഥരുടെയും സാന്നിധ്യത്തിലാണ് ഈ സംഭവം നടന്നത്. ആക്രമണത്തെ അപലപിച്ച് മറ്റ് രാഷ്ട്രീയ കക്ഷികള് രംഗത്തുവന്നു. സംഭവത്തില് ഗുരുതരമായ സുരക്ഷാ വീഴ്ചയാണുണ്ടായതെന്ന് കോണ്ഗ്രസ് ചൂണ്ടിക്കാട്ടി.
