ഉപേക്ഷിക്കപ്പെട്ട കാറിൽ 52 കിലോ സ്വർണ്ണവും 10 കോടി രൂപയും

ഭോപ്പാൽ, മധ്യപ്രദേശ്: ആളൊഴിഞ്ഞ സ്ഥലത്ത് കിടന്ന എസ് യു വി കാറിൽ 52 കിലോ സ്വർണ്ണവും 10 കോടി രൂപയും. കണ്ണുകൾ മഞ്ഞളിച്ചുപോകുന്ന ആ കാഴ്ച മധ്യപ്രദേശിലെ ഭോപ്പാലിലായിരുന്നു നടന്നത്. വ്യാഴാഴ്ച രാത്രിയായിരുന്നു അന്വേഷണ സംഘത്തിന് രഹസ്യ വിവരം ലഭിച്ചത്. കുഷാൽപുര റോഡിൽ ഒരു എസ് യു വി കിടപ്പുണ്ട്, അകത്ത് രണ്ട് ബാ​ഗുകളുമുണ്ട്, ചെന്ന് പരിശോധിക്കണമെന്നായിരുന്നു സന്ദേശം. ആദായനികുതി വകുപ്പും പൊലീസും ചേർന്ന് ഉപേക്ഷിക്കപ്പെട്ട കാർ കണ്ടെത്തുകയായിരുന്നു. 52 കിലോ തൂക്കം വരുന്ന സ്വർണ ബിസ്കറ്റുകളും 10 കോടി രൂപയുമായിരുന്നു ഉപേക്ഷിക്കപ്പെട്ട കാറിൽ രണ്ട് ബാ​ഗുകളിൽ ഉണ്ടായിരുന്നത്. സ്വർണ്ണത്തിനു മാത്രം നാൽപതു കോടിയോളം വില വരും എന്ന് ഡെപ്യൂട്ടി കമ്മീഷണർ പ്രിയങ്ക ശുക്ല പറഞ്ഞു. സംസ്ഥാന വ്യാപകമായി നടത്തുന്ന റെയ്ഡുകളെ ഭയന്ന് പ്രതികൾ ഓടിയൊളിച്ചതാകാമെന്നാണ് പൊലീസ് നി​ഗമനം. പണവും സ്വർണവും കടത്താൻ ശ്രമിച്ചവർക്കായി തെരച്ചിൽ ആരംഭിച്ചുവെന്നും ഡിസിപി അറിയിച്ചു. എന്നാലും ചോദ്യങ്ങളനവധിയാണ്? ഈ നിധി എവിടെ നിന്ന് വന്നു, റോഡിൽ ഉപേക്ഷിക്കപ്പെട്ടതെങ്ങനെ? പിന്നിൽ ആരാണ്? …