ന്യൂഡൽഹി: രാജ്യത്ത് അനധികൃത കുടിയേറ്റം നിയന്ത്രിക്കുന്നതിനായി കേന്ദ്ര സർക്കാർ അവതരിപ്പിച്ച ഇമിഗ്രേഷൻ ആൻഡ് ഫോറിനേഴ്‌സ് ബിൽ 2025 ന് ലോക്‌സഭയുടെ അംഗീകാരം. മതിയായ രേഖകളില്ലാതെ രാജ്യത്ത് തുടരുന്നവർക്ക് കർശന ശിക്ഷയും പിഴയും വ്യവസ്ഥ ചെയ്യുന്ന നിയമമാണിത്. അനധികൃത കുടിയേറ്റക്കാരെ തടയുന്ന പുതിയ ബിൽ രാജ്യത്തിൻ്റെ സുരക്ഷയെ ശക്തിപ്പെടുത്തുമെന്നും സമ്പത് വ്യവസ്ഥയേയും വ്യാപാരത്തേയും അഭിവൃദ്ധിപ്പെടുത്തുമെന്നും ബില്‍ അവതരണവേളയില്‍ കേന്ദ്ര ആഭ്യന്തരമന്ത്രി അമിത് ഷാ പറഞ്ഞു. കൂടാതെ ആരോഗ്യ, വിദ്യാഭ്യാസ മേഖലകൾക്ക് ഉത്തേജനം പകരുമെന്നും അമിത് ഷാ കൂട്ടിച്ചേർത്തു. ഇന്ത്യയിലെത്തുന്ന ഓരോ വിദേശപൗരൻ്റേയും കൃത്യമായ വ്യക്തി വിവരങ്ങൾ പുതിയ ബിൽ നടപ്പാകുന്നതോടെ ലഭ്യമാകുമെന്നും അദേഹം പറഞ്ഞു.
വിനോദ സഞ്ചാരിയായോ വിദ്യാർഥിയായോ ഇന്ത്യയിലെത്തുന്നവർക്ക് സ്വാഗതമരുളാൻ എല്ലായ്പോഴും ഇന്ത്യ ഒരുക്കമാണെന്നും അതേസമയം രാജ്യസുരക്ഷയ്ക്ക് ഭീഷണി ഉയർത്തുന്നവരെ ശക്തമായി തന്നെ കൈകാര്യം ചെയ്യുമെന്നും അമിത് ഷാ പറഞ്ഞു. ദുരുദ്ദേശ്യത്തോടെ ഇന്ത്യയിലെത്തുന്നവരെ മാത്രമെ കേന്ദ്ര സർക്കാർ തടയുകയുള്ളുവെന്നും ഇന്ത്യ ഒരു അഗതി മന്ദിരമല്ലെന്നും അമിത് ഷാ വ്യക്തമാക്കി. രാജ്യ പുരോഗതിക്ക് സംഭാവന നൽകുന്നതിനായി എത്തുന്നവരെ എപ്പോഴും സ്വാഗതം ചെയ്യുന്നതായും അദേഹം കൂട്ടിച്ചേർത്തു.
മ്യാൻമർ, ബംഗ്ലാദേശ് എന്നിവടങ്ങളിൽ നിന്ന് ഇന്ത്യയിലേക്കെത്തുന്ന റോഹിഗ്യൻ കുടിയേറ്റക്കാരെ കുറിച്ചും അമിത് ഷാ പരാമർശിച്ചു. വ്യക്തി ലാഭത്തിനായി ഇന്ത്യയിലേക്ക് കുടിയേറുന്നവരുടെ എണ്ണത്തിൽ വർധനവുണ്ടായതായും ഇത് രാജ്യസുരക്ഷയ്ക്ക് ഭീഷണിയുയർത്തുന്നുണ്ടെന്നും അദ്ദേഹം പറഞ്ഞു. ഇന്ത്യയിൽ സുരക്ഷാ പ്രശ്നങ്ങൾ സൃഷ്‌ടിക്കുന്ന കുടിയേറ്റക്കാർക്കെതിരെ കർശന നടപടി സ്വീകരിക്കും. ബിൽ ഇന്ത്യയുടെ സുരക്ഷ ശക്തമാക്കുകയും 2047 ഓടെ വികസിത രാജ്യമായി മാറുന്നതിന് ഇന്ത്യയെ സഹായിക്കുകയും ചെയ്യുമെന്നും അമിത് ഷാ വ്യക്തമാക്കി.
