ജെറുസലേം: ഇറാനുമായുള്ള രണ്ടാഴ്ചത്തെ താൽക്കാലിക വെടിനിർത്തൽ ഇസ്രായേൽ അംഗീകരിച്ചു. ഇറാനുമായുള്ള ഈ വെടിനിർത്തൽ ലെബനനിലെ ഹിസ്ബുള്ളക്കെതിരായ നീക്കങ്ങൾക്ക് ബാധകമല്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കി. ഹൂതികൾക്കെതിരെയും ഹിസ്ബുള്ളക്കെതിരെയും ആക്രമണം തുടരുമെന്നാണ് ഇസ്രായേൽ നിലപാട്.
മധ്യസ്ഥനായ പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് വെടിനിർത്തൽ എല്ലാ മേഖലകളിലും (ലെബനൻ ഉൾപ്പെടെ) ബാധകമാണെന്ന് പറഞ്ഞിരുന്നുവെങ്കിലും ഇസ്രായേൽ ഇത് തള്ളി. ഇസ്രായേലിന്റെ വടക്കൻ അതിർത്തിയിലെ സുരക്ഷാ ഭീഷണിയായ ഹിസ്ബുള്ളയെ ഇല്ലാതാക്കുന്നത് വരെ അവിടെ ആക്രമണം തുടരുമെന്നാണ് ഇസ്രായേൽ വ്യക്തമാക്കുന്നത്.
ലെബനൻ അതിർത്തിയിൽ ഹിസ്ബുള്ളയുടെ സൈനിക കേന്ദ്രങ്ങൾ ലക്ഷ്യമിട്ട് ഇസ്രായേൽ വ്യോമാക്രമണങ്ങളും കരമാർഗ്ഗമുള്ള നീക്കങ്ങളും തുടരുകയാണ്. ഹിസ്ബുള്ളയുടെ ആയുധ സംഭരണശാലകളും കമാൻഡ് സെന്ററുകളുമാണ് പ്രധാനമായും ലക്ഷ്യം വയ്ക്കുന്നത്. യെമനിലെ ഹൂതി വിമതർ ഇസ്രായേലിന് നേരെ മിസൈൽ, ഡ്രോൺ ആക്രമണങ്ങൾ നടത്തുന്ന പശ്ചാത്തലത്തിൽ, യെമനിലെ ഹൂതി നിയന്ത്രണത്തിലുള്ള തുറമുഖങ്ങളിലും ഊർജ്ജ നിലയങ്ങളിലും ഇസ്രായേൽ തിരിച്ചടി നൽകുന്നുണ്ട്.
തങ്ങളുടെ പൗരന്മാരുടെ സുരക്ഷ ഉറപ്പാക്കുന്നത് വരെ ഈ പോരാട്ടം തുടരുമെന്നും, ഇറാൻ പിന്തുണയുള്ള ഈ ഗ്രൂപ്പുകളുടെ ഭീഷണി പൂർണ്ണമായും ഇല്ലാതാക്കുകയാണ് ലക്ഷ്യമെന്നും ഇസ്രായേൽ പ്രധാനമന്ത്രിയും സൈനിക വക്താക്കളും അറിയിച്ചു.
