ഏപ്രിൽ 9-നു നടക്കാനിരിക്കുന്ന നിയമസഭാ തിരഞ്ഞെടുപ്പിനായി കേരളം ഒരുങ്ങുകയാണ്. വീണ്ടും ഒരു തിരഞ്ഞെടുപ്പിലേക്ക് അടുക്കുമ്പോൾ “മാറ്റം” എന്നത് വെറുമൊരു രാഷ്ട്രീയ മുദ്രാവാക്യത്തിനപ്പുറം ജനങ്ങളുടെ ഒരാവശ്യമായി മാറിയിരിക്കുകയാണ്. കേരളത്തിന്റെ സാമൂഹിക നേട്ടങ്ങളെ നിലനിർത്തിക്കൊണ്ട് തന്നെ സാമ്പത്തികവും വ്യാവസായികവുമായ കുതിച്ചുചാട്ടത്തിന് വഴിമാറുന്ന ഒരു രാഷ്ട്രീയ മാറ്റത്തിനാണ് വോട്ടർമാർ ലക്ഷ്യമിടെണ്ടത്. സാമൂഹികമായി കേരളം ഏറെ മുന്നിലാണെങ്കിലും സാമ്പത്തിക ഭദ്രതയും പുതിയ തൊഴിലവസരങ്ങളും സൃഷ്ടിക്കുന്ന കാര്യത്തിൽ കേരളം വർഷങ്ങളായി പിന്നോക്കം പോകുകയാണ് എന്നതാണ് യാഥാർഥ്യം. അതുകൊണ്ടു കേരളത്തിൽ വലിയ മാറ്റങ്ങൾ ആവശ്യമാണെന്നാണ് പൊതുവായ വിലയിരുത്തൽ.
സംസ്ഥാനം നേരിടുന്ന കടുത്ത സാമ്പത്തിക പ്രതിസന്ധി, തൊഴിലില്ലായ്മ കാരണം യുവാക്കൾ വിദേശത്തേക്ക് കുടിയേറുന്നത് (Brain Drain), വ്യവസായ സംരംഭങ്ങൾ തുടങ്ങുന്നതിലെ തടസ്സങ്ങൾ എന്നിവ ചൂണ്ടിക്കാട്ടിയാണ് മാറ്റം ആവശ്യപ്പെടുന്നത്. നിലവിലെ രീതി തുടർന്നാൽ കേരളം സാമ്പത്തികമായി കൂടുതൽ തകരും. കേരളത്തിന്റെ പൊതു കടം 3.10 ലക്ഷം കോടി രൂപ കടന്നിരിക്കുകയാണ്. വരുമാനത്തിന്റെ വലിയൊരു ഭാഗം പലിശ അടയ്ക്കാനായി മാറ്റിവെക്കേണ്ടി വരുന്നു. ശമ്പളം, പെൻഷൻ തുടങ്ങിയ നിത്യനിദാന ചെലവുകൾക്ക് പോലും വായ്പയെ ആശ്രയിക്കേണ്ടി വരുന്നത് സാമ്പത്തിക അച്ചടക്കമില്ലായ്മയുടെ ലക്ഷണമായി വിമർശകർ ചൂണ്ടിക്കാട്ടുന്നു. കാലങ്ങളായി ഭരണത്തിലുള്ള രണ്ട് മുന്നണികളുടെയും ഭരണകാലത്ത് സംസ്ഥാനത്തിന്റെ കടബാധ്യത വൻതോതിൽ വർധിച്ചിട്ടുണ്ട്. കൃത്യമായ പ്ലാനിംഗിലൂടെ ഉൽപ്പാദന മേഖലയിലും തൊഴിൽ രംഗത്തും മാറ്റങ്ങൾ വരുത്തിയാൽ മാത്രമേ ഈ തകർച്ചാ ഭീഷണി മറികടക്കാൻ സാധിക്കൂ.
കേരളം ഒരു ഉപഭോക്തൃ സംസ്ഥാനം എന്ന നിലയിൽ നിന്ന് ഉൽപ്പാദന സംസ്ഥാനം എന്ന നിലയിലേയ്ക്ക് മാറേണ്ട കാലം അതിക്രമിച്ചില്ലേ? യുവജനങ്ങൾ നാടുവിടുന്നത് പ്രധാനമായും മികച്ച തൊഴിലിനും ജീവിതനിലവാരത്തിനുമാണ്. കേരളത്തിലെ തൊഴിൽ മേഖലകളിൽ അന്താരാഷ്ട്ര നിലവാരത്തിലുള്ള വേതനവും ജോലി സുരക്ഷയും ഉറപ്പാക്കിയാൽ കുടിയേറ്റം കുറയ്ക്കാൻ സാധിക്കും. വിദ്യാഭ്യാസത്തെ വ്യവസായ ആവശ്യങ്ങളുമായി ബന്ധിപ്പിക്കണം. ബിരുദം കഴിഞ്ഞിറങ്ങുന്നവർക്ക് തൊഴിൽ വിപണിയിൽ ആവശ്യമായ പ്രായോഗിക പരിജ്ഞാനം ഉറപ്പാക്കണം. സ്വന്തമായി സംരംഭങ്ങൾ തുടങ്ങാൻ ആഗ്രഹിക്കുന്ന യുവാക്കൾക്ക് കുറഞ്ഞ പലിശ നിരക്കിൽ വായ്പയും സാങ്കേതിക സഹായവും നൽകണം.
ചുവപ്പുനാടകളും അനാവശ്യമായ യൂണിയൻ ഇടപെടലുകളും ഒഴിവാക്കി സംരംഭകർക്ക് ആത്മവിശ്വാസം നൽകുന്ന രീതിയിലേക്ക് നിയമങ്ങൾ മാറണം. ഐ.ടി, ബയോ ടെക്നോളജി, പുനരുപയോഗ ഊർജ്ജം തുടങ്ങിയ മേഖലകളിൽ കൂടുതൽ നിക്ഷേപം കൊണ്ടുവരണം. കൃഷി ഒരു ലാഭകരമായ തൊഴിലായി മാറ്റാൻ മൂല്യവർദ്ധിത ഉൽപ്പന്നങ്ങളുടെ (Value-added products) നിർമ്മാണത്തിന് പ്രാധാന്യം നൽകണം.
കേരളത്തിന്റെ സാമ്പത്തിക ഭദ്രതയ്ക്കും യുവാക്കളെ നാട്ടിൽ നിലനിർത്തുന്നതിനും ടൂറിസം മേഖലയ്ക്ക് വലിയ പങ്കുവഹിക്കാനുണ്ട്. 2026-ലെ ഏറ്റവും പുതിയ കണക്കുകൾ പ്രകാരം, കേരളം വിനോദസഞ്ചാര രംഗത്ത് വലിയ കുതിച്ചുചാട്ടമാണ് നടത്തുന്നത്. എങ്കിലും ഈ മേഖലയിൽ അടിസ്ഥാന സൗകര്യങ്ങൾ വർധിപ്പിക്കേണ്ടതുണ്ട്. കൂടുതൽ പുതിയ വിനോദസഞ്ചാര കേന്ദ്രങ്ങൾ വികസിപ്പിക്കാനും നിലവിലുള്ളവയുടെ നിലവാരം ഉയർത്താനും കൂടുതൽ നിക്ഷേപം ആവശ്യമാണ്. ടൂറിസം മേഖലയിലെ പുതിയ തൊഴിലവസരങ്ങൾ യുവാക്കളുടെ വിദേശത്തേക്കുള്ള കുടിയേറ്റം കുറയ്ക്കാൻ സഹായിക്കുമെന്ന് വിദഗ്ദ്ധർ ചൂണ്ടിക്കാട്ടുന്നു.
ആധുനികതയിലേക്കുള്ള മാറ്റത്തിനിടയിൽ വേരുകൾ നഷ്ടപ്പെടാതെ നോക്കേണ്ടതും അനിവാര്യമാണ്. അതുകൊണ്ടുതന്നെ ഭാഷയും സംസ്കാരവും സംരക്ഷിക്കാനുള്ള മാർഗങ്ങളും അവലംബിക്കേണ്ടതാണ്. സാമ്പത്തികമായ വളർച്ചയും സാംസ്കാരികമായ സ്വത്വവും ഒരുപോലെ കൊണ്ടുപോകുന്ന ഒരു വികസന മാതൃകയാണ് കേരളത്തിന് ആവശ്യം. മലയാളം പഠിക്കുന്നത് മോശമാണെന്ന ചിന്താഗതി മാറണം. സ്കൂൾ തലം മുതൽ മലയാളം നിർബന്ധമാക്കുന്നതിനൊപ്പം, ഉന്നത വിദ്യാഭ്യാസ മേഖലയിലും മലയാളത്തിൽ പഠിക്കാനുള്ള സൗകര്യങ്ങൾ (ഉദാഹരണത്തിന് ശാസ്ത്ര സാങ്കേതിക വിഷയങ്ങൾ മലയാളത്തിൽ) വികസിപ്പിക്കണം. മലയാളം ടൈപ്പിംഗ്, സോഫ്റ്റ്വെയറുകൾ എന്നിവ കൂടുതൽ ലളിതമാക്കുകയും ഇന്റർനെറ്റിൽ മലയാളം ഉള്ളടക്കം വർദ്ധിപ്പിക്കുകയും വേണം.
കലയും സാഹിത്യവും വെറും വിനോദോപാധികളല്ല, മറിച്ച് നമ്മുടെ നിലനിൽപ്പിന്റെ അടയാളങ്ങളാണെന്ന് പുതിയ തലമുറയെ ബോധ്യപ്പെടുത്തണം. വിദ്യാലയങ്ങളിൽ പാഠ്യപദ്ധതിയുടെ ഭാഗമായി തന്നെ നമ്മുടെ ചരിത്രവും സംസ്കാരവും പഠിപ്പിക്കണം. നാടൻ കലാരൂപങ്ങളെ ടൂറിസവുമായി മാത്രം ബന്ധിപ്പിക്കാതെ, പുതുതലമുറയ്ക്ക് അത് പഠിക്കാനും തൊഴിലായി സ്വീകരിക്കാനുമുള്ള സാഹചര്യം ഒരുക്കണം. പാരമ്പര്യം മുറുകെ പിടിക്കുമ്പോൾ തന്നെ ലോകനിലവാരത്തിലുള്ള മാറ്റങ്ങളെ ഉൾക്കൊള്ളാൻ കേരളം തയ്യാറാകണം. എങ്കിൽ മാത്രമേ ആധുനിക ചിന്താഗതിയുള്ള യുവാക്കൾക്ക് ഇവിടെ തുടരാൻ താൽപ്പര്യം തോന്നൂ.
മാറ്റം ആവിശ്യമാണ്
കേരളത്തിന്റെ രാഷ്ട്രീയം മാറണം എന്നത് കേവലം ഭരണമാറ്റമല്ല, മറിച്ച് ദീർഘവീക്ഷണമുള്ള ഒരു പുതിയ പ്രവർത്തനശൈലിയിലേക്കുള്ള മാറ്റമാണ് വേണ്ടത്. വിവാദങ്ങൾക്കും ആരോപണങ്ങൾക്കും പകരം തൊഴിലവസരങ്ങൾ, സാമ്പത്തിക ഭദ്രത, അടിസ്ഥാന സൗകര്യ വികസനം എന്നിവയിലൂന്നിയ ചർച്ചകൾക്ക് രാഷ്ട്രീയ പാർട്ടികൾ മുൻഗണന നൽകണം. രാഷ്ട്രീയ ലാഭത്തിനായുള്ള സൗജന്യ പ്രഖ്യാപനങ്ങൾക്കപ്പുറം, സംസ്ഥാനത്തിന്റെ വർദ്ധിച്ചുവരുന്ന കടബാധ്യത കുറയ്ക്കാനും സുസ്ഥിരമായ വരുമാന മാർഗ്ഗങ്ങൾ കണ്ടെത്താനും രാഷ്ട്രീയ പാർട്ടികൾക്ക് കൃത്യമായ പ്ലാൻ ഉണ്ടാകണം.
പതിവ് മുന്നണി സമവാക്യങ്ങൾക്കപ്പുറം ജനകീയ വിഷയങ്ങളിൽ ഊന്നിനിന്നുള്ള പുതിയ കൂട്ടുകെട്ടുകളും നിലപാടുകളും അനിവാര്യമാണ്. പാർട്ടികളുടെ അന്ധമായ എതിർപ്പിന് പകരം നാടിന് ഗുണകരമായ കേന്ദ്ര-സംസ്ഥാന പദ്ധതികളെ പിന്തുണയ്ക്കുന്ന സംസ്കാരം വളരണം. യുവാക്കൾക്ക് രാഷ്ട്രീയത്തിൽ കൂടുതൽ തീരുമാനമെടുക്കാനുള്ള അധികാരവും പ്രാതിനിധ്യവും നൽകണം. തിരഞ്ഞെടുപ്പ് സമയത്ത് മാത്രം വോട്ടർമാരെ കാണുന്ന രീതിക്ക് പകരം വർഷം മുഴുവൻ നീളുന്ന ജനസമ്പർക്കം ഉണ്ടാകണം. ഐ.ടി, കൃഷി, വിദ്യാഭ്യാസം തുടങ്ങിയ മേഖലകളിൽ വിദഗ്ദ്ധരായ വ്യക്തികളെ ഭരണനിർവ്വഹണത്തിൽ കൊണ്ടുവരാൻ രാഷ്ട്രീയ പ്രസ്ഥാനങ്ങൾക്കാകണം. പതിവ് മുഖങ്ങളിൽ നിന്ന് വ്യത്യസ്ഥമായി യുവാക്കൾക്കും പ്രൊഫഷണലുകൾക്കും കൂടുതൽ പ്രാതിനിധ്യം നൽകുകയും, ആധുനികമായ വികസന കാഴ്ചപ്പാടുകൾ നടപ്പിലാക്കുകയും ചെയ്യുന്നത് വഴി സംസ്ഥാനത്തിന്റെ പുരോഗതി ഉറപ്പാക്കാൻ സാധിക്കും.
നമ്മൾ വീണ്ടും തിരഞ്ഞെടുപ്പിലേക്ക് അടുക്കുമ്പോൾ ജനങ്ങൾക്ക് വലിയ ഉത്തരവാദിത്തമുണ്ട്. ജനാധിപത്യത്തിൽ മാറ്റം വരണമെങ്കിൽ വോട്ടർമാരുടെ ചിന്താഗതിയിലാണ് ആദ്യം മാറ്റം വരേണ്ടത്. പാർട്ടി ചിഹ്നത്തിനപ്പുറം സ്ഥാനാർത്ഥിയുടെ വിദ്യാഭ്യാസം, പ്രവർത്തനപരിചയം, സദ്സ്വഭാവം എന്നിവ നോക്കി വോട്ട് ചെയ്യണം. ഓരോ മണ്ഡലത്തിലെയും പ്രശ്നങ്ങൾ നിയമസഭയിൽ കൃത്യമായി അവതരിപ്പിക്കാൻ കഴിവുള്ളവരെയാണ് നമുക്ക് ആവശ്യം. ജാതി, മതം, സമുദായം തുടങ്ങിയ വൈകാരിക വിഷയങ്ങൾക്കപ്പുറം വിദ്യാഭ്യാസം, ആരോഗ്യം, തൊഴിലവസരങ്ങൾ തുടങ്ങിയ വികസന കാര്യങ്ങളിൽ ആർക്കാണ് വ്യക്തമായ പ്ലാൻ ഉള്ളതെന്ന് ജനങ്ങൾ പരിശോധിക്കണം.
നിലവിലെ ജനപ്രതിനിധികൾ കഴിഞ്ഞ അഞ്ച് വർഷം എന്ത് ചെയ്തു എന്ന് വിലയിരുത്തണം. വാഗ്ദാനങ്ങൾ പാലിക്കാത്തവരെ തിരുത്താൻ വോട്ടർമാർ തയ്യാറാകണം. അന്ധമായ പാർട്ടി ഭക്തിക്ക് പകരം നാടിന്റെ നന്മയ്ക്ക് ആര് വരണമെന്ന് നിഷ്പക്ഷമായി ചിന്തിക്കുന്നത് രാഷ്ട്രീയ പാർട്ടികളെ കൂടുതൽ ഉത്തരവാദിത്തമുള്ളവരാക്കും. “നല്ല സ്ഥാനാർത്ഥി, നല്ല നാട്” എന്ന ബോധ്യം വോട്ടർമാരിൽ ഉണ്ടായാൽ മാത്രമേ കേരള രാഷ്ട്രീയത്തിൽ ഗുണപരമായ മാറ്റം സംഭവിക്കൂ.
ഈ തിരഞ്ഞെടുപ്പിൽ കേരള നിയമസഭയിൽ പുതിയ മുഖങ്ങൾ ധാരാളമായി എത്താനുള്ള സാധ്യത കൂടുതലാണ്. പ്രധാന രാഷ്ട്രീയ പാർട്ടികളെല്ലാം യുവനേതാക്കൾക്കും പ്രൊഫഷണലുകൾക്കും സീറ്റുകൾ നൽകിയിട്ടുണ്ട്. ഏപ്രിൽ 9-ന് നടക്കുന്ന തിരഞ്ഞെടുപ്പിലൂടെ ജനങ്ങൾ ആരെ സ്വീകരിക്കും എന്നത് കേരളത്തിന്റെ വരുംകാല രാഷ്ട്രീയത്തിൽ നിർണ്ണായകമാകും. യുവത്വവും പ്രൊഫഷണലിസവും കലർന്ന ഒരു പുതിയ നിരയെ തിരഞ്ഞെടുക്കാൻ ജനങ്ങൾ തയ്യാറായാൽ മാത്രമേ നമ്മുടെ നാടിനും മാറ്റങ്ങൾ ഉണ്ടാകൂ, പുരോഗതിയുണ്ടാകൂ, നമ്മുടെ കുഞ്ഞുങ്ങൾക്ക് സ്വന്തം വേരുകൾ മറക്കാതെ, അഭിമാനത്തോടെ ഇവിടെത്തന്നെ ജീവിക്കാൻ കഴിയുന്ന ഒരു സാഹചര്യം ഉണ്ടാവു. ഓരോ വോട്ടും കേരളത്തിന്റെ ഭാവി നിശ്ചയിക്കുന്ന നിർണ്ണായകമായ ഒരു തീരുമാനമാണ്. “പാർട്ടി നോക്കിയല്ല, നമ്മുടെ നാടിന്റെ പുരോഗതി നോക്കിയാവണം” ഓരോ വോട്ടും.
വറുഗീസ് എബ്രഹാം
