തിരുവനന്തപുരം: കൊല്ലം തേവലക്കര ബോയ്സ് ഹൈസ്ക്കൂളിലെ എട്ടാം ക്ലാസ് വിദ്യാർഥി എം. മിഥുൻ ഷോക്കേറ്റു മരിച്ച സംഭവത്തിൽ സിപിഎം നിയന്ത്രണത്തിലുള്ള മാനേജ്മെൻ്റിനെതിരെ നടപടിയുമായി സർക്കാർ. സ്കൂൾ മാനേജ്മെൻ്റ് പിരിച്ചുവിട്ടതായി വിദ്യാഭ്യാസ മന്ത്രി വി. ശിവൻകുട്ടി പറഞ്ഞു. സ്കൂൾ മാനേജ്മെന്റിന് ഗുരുതര വീഴ്ചയുണ്ടായെന്നാണ് പൊതുവിദ്യാഭ്യാസ ഡയറക്ടറുടെ റിപ്പോർട്ട്. മാനേജറെ അയോഗ്യനാക്കിയ വിദ്യാഭ്യാസ വകുപ്പ് താല്ക്കാലിക മാനേജറായി കൊല്ലം ജില്ലാ വിദ്യാഭ്യാസ ഓഫീസര്ക്ക് ചുമതല നല്കി.
പ്രവര്ത്തന സമയത്തിന് മുന്പായി കുട്ടികള് സ്കൂളിലും സ്കൂള് പരിസരത്തും എത്തുന്ന സാഹചര്യത്തില് കുട്ടികളുടെ സുരക്ഷ ഉറപ്പുവരുത്തുന്നതില് മാനേജ്മെന്റിന്റേയും മാനേജറുടെയും അധ്യാപകരുടേയും ഭാഗത്ത് നിന്നും ഗുരുതരവീഴ്ചയാണ് ഉണ്ടായതെന്നാണ് വിദ്യാഭ്യാസ വകുപ്പ് കണ്ടെത്തല്.ഇത് നിര്ഭാഗ്യകരമാണ്. മാനേജറുടെ ഭാഗത്ത് നിന്നും കൃത്യവിലോപവും അലംഭാവും ഉണ്ടായെന്നും മന്ത്രി വി ശിവന്കുട്ടി പറഞ്ഞു. ആരോപണങ്ങള്ക്ക് കൃത്യമായ മറുപടി നല്കാന് മാനേജര്ക്ക് കഴിഞ്ഞില്ലെന്നും വിദ്യാഭ്യാസ മന്ത്രി പറഞ്ഞു.
മിഥുന് കേരളത്തിന്റെ മകനാണ്. ഭാവിയില് ഇത്തരം സംഭവങ്ങള് ആവര്ത്തിക്കാതിരിക്കാന് നടപടി സ്വീകരിക്കും. ഉദ്യോഗസ്ഥ സംഘം സ്കൂളുകള് സന്ദര്ശിച്ച് മൂന്നാഴ്ചയ്ക്കുള്ളില് റിപ്പോര്ട്ട് സമര്പ്പിക്കും. സംഭവത്തെ തുടര്ന്ന് മുഖ്യമന്ത്രി ജില്ലാ കളക്ടറുടെ യോഗം വിളിച്ചുചേര്ത്തിട്ടുണ്ടെന്നും മന്ത്രി പറഞ്ഞു. പൊതുവിദ്യാഭ്യാസ ഡയറക്ടറുടെ നേതൃത്വത്തില് സേഫ്റ്റി സെല് രൂപീകിരിച്ചതായും പൊതുജനങ്ങള്ക്കു പരാതിയുണ്ടെങ്കില് ഈ സെല്ലിനെ സമീപിക്കാമെന്നും മന്ത്രി അറിയിച്ചു.
