ജനങ്ങൾക്ക് വീണ്ടും ഇരുട്ടടി നൽകികൊണ്ട് കേരളത്തിൽ വൈദ്യുതി നിരക്ക് വീണ്ടും വര്ധിപ്പിച്ചു. ഗാര്ഹിക ഉപയോക്താക്കള്ക്കു യൂണിറ്റിന് 16 പൈസയുടെ വര്ധനയാണ് ഉണ്ടായിരിക്കുന്നത്. വർധന ഇന്നലെ മുതൽ പ്രാബല്യത്തിൽ വന്നു. ബിപിഎല്ലുകാർക്കും നിരക്ക് വർധന ബാധകമാണ്. അടുത്ത സാമ്പത്തിക വർഷം ഏപ്രിൽ മുതൽ (2025-2026) യൂണിറ്റിന് 12 പൈസയും വർദ്ധിപ്പിക്കും. ഫിക്സഡ് ചാർജ്ജും കൂട്ടി. അനിവാര്യ ഘട്ടത്തിലാണ് നിരക്ക് വർധനവെന്നാണ് വൈദ്യുതി മന്ത്രി കെ കൃഷ്ണൻകുട്ടിയുടെ പ്രതികരണം. നിവർത്തിയില്ലാതെയാണ് നിരക്ക് വർധിപ്പിച്ചത്. ബോർഡിന് പിടിച്ചു നിൽക്കാനാവാത്ത അവസ്ഥയുണ്ട്. വൈദ്യുതി പുറത്ത് നിന്ന് വാങ്ങുന്നത് വലിയ പ്രതിസന്ധിയാണെന്നും മന്ത്രി കൂട്ടിച്ചേർത്തു.
2016ല് ഇടതു സര്ക്കാര് അധികാരമേറ്റതിനു ശേഷം അഞ്ചാം തവണയാണ് വൈദ്യുതി നിരക്ക് വര്ധിപ്പിക്കുന്നത്. 2017, 2019, 2022, 2023 എന്നീ വര്ഷളിലും താരിഫ് പരിഷ്കരണം നടത്തിയിരുന്നു.
