ന്യൂഡൽഹി: ഇന്ത്യ തദ്ദേശീയമായി വികസിപ്പിച്ച അസ്ത്ര മാര്‍ക്ക് 2 മിസൈൽ ഇന്ത്യന്‍ വ്യോമസേനയ്‌ക്ക് കൈമാറും. 200 കിലോമീറ്റര്‍ വരെ അകലെയുള്ള ലക്ഷ്യങ്ങള്‍ തകര്‍ക്കാൻ ശേഷിയുള്ള മിസൈലാണ് അസ്ത്ര മാര്‍ക്ക് 2 മിസൈല്‍. ആദ്യഘട്ടത്തിൽ 700 അസ്ത്ര മാര്‍ക്ക് 2 മിസൈലുകളാണ് വ്യോമസേനയ്‌ക്ക് കൈമാറുന്നത്. പ്രതിരോധ ഗവേഷണ സ്ഥാപനമായ ഡിആർഡിഒയാണ് മിസൈൽ വികസിപ്പിച്ചത്. ഹിന്ദുസ്ഥാൻ എയറോനോട്ടിക്സ് ലിമിറ്റഡ്, ഭാരത് ഡൈനാമിക്സ് ലിമിറ്റഡ് തുടങ്ങി നിരവധി പ്രതിരോധ കമ്പിനികൾ പ്രൊജക്റ്റുമായി സഹകരിച്ചിട്ടുണ്ട്.
അസ്ത്ര മാർക്ക് 1 ന്റെ വിപുലീകരിച്ച പതിപ്പാണ് അസ്ത്ര മാര്‍ക്ക് 2 മിസൈല്‍. 160 കിമി ആയിരുന്നു അസ്ത്ര മാർക്ക് 1-ന്റെ പരിധി. യുദ്ധ വിമാനങ്ങളില്‍ നിന്ന് തൊടുത്തുവിടാനും 200 കിലോമീറ്റര്‍ വരെ അകലത്തെ ലക്ഷ്യങ്ങള്‍ തകര്‍ക്കാനും ശേഷിയുള്ള മിസൈലാണ് അസ്ത്ര മാര്‍ക്ക് 2 മിസൈല്‍. ഇവ വ്യോസേനയുടെ സുഖോയ്, ലൈറ്റ് കോംബാറ്റ് എയർക്രാഫ്റ്റ്, ഫൈറ്റർ ജെറ്റ് ഫ്ലീറ്റുകളിൽ ഘടിപ്പിക്കുമെന്ന് പ്രതിരോധ ഉദ്യോഗസ്ഥർ പറയുന്നു. കാഴ്ച പരിധിക്കയ്‌പ്പുറം റേഞ്ചുള്ള ബിയോന്‍ഡ് വിഷ്വല്‍ റേഞ്ച് എയര്‍-ടു-എയര്‍ മിസൈലാണ് ഡിആര്‍ഡിഒ വികസിപ്പിച്ചത്.
പാക്കിസ്ഥാനെതിരെ ഓപ്പറേഷൻ സിന്ദൂറിൽ ഇന്ത്യ അസ്ത്ര മാർക്ക് 1 മിസൈലുകൾ ഉപയോഗിച്ചിരുന്നു. ആളില്ലാ വ്യോമ സംവിധാനങ്ങളെ അസ്ത്ര 1 വിജയകരമായി തകര്‍ത്തിട്ടുണ്ട്. ശത്രു ലക്ഷ്യങ്ങളെ കൃത്യമായി ട്രാക്ക് ചെയ്തു കണ്ടെത്തി തകര്‍ക്കാനാകും ഇതിന്. അത്യാധുനിക ഗതി നിര്‍ണയ സംവിധാനങ്ങളാണ് അസ്ത്രയ്‌ക്കുള്ളത്.
