തിരുവാണിയൂർ ഗ്ലോബൽ പബ്ലിക് സ്കൂളിലെ ഒൻപതാം ക്ലാസ് വിദ്യാർഥി മിഹിർ അഹമ്മദിന്റെ ദുരൂഹ മരണവുമായി ബന്ധപ്പെട്ട പോലീസ് അന്വേഷണം തുടരുന്നു. സ്കൂൾ അധികൃതരുടേയും സഹപാഠികളുടേയും മൊഴികൾ രേഖപ്പെടുത്തി. ഇൻസ്റ്റഗ്രാമിലെ വിദ്യാർത്ഥികളുടെ ഗ്രൂപ്പിൽ നടന്ന ചാറ്റുകൾ അന്വേഷണത്തിന്റെ പ്രധാന ഭാഗമായിരിക്കുമെന്ന് പോലീസ് വ്യക്തമാക്കി.
മിഹിറിന്റെ മരണത്തിന് പിന്നാലെ ‘ജസ്റ്റിസ് ഫോർ മിഹിർ’ എന്ന പേരിൽ ഒരു ഇൻസ്റ്റഗ്രാം പേജ് പ്രത്യക്ഷപ്പെട്ടിരുന്നു. ഈ പേജ് മിഹിറിന്റെ ചില സുഹൃത്തുക്കളാണ് ആരംഭിച്ചതെന്നാണ് മാതാവിന്റെ പരാതി. ഈ പേജിലെ ചാറ്റുകളിൽ നിന്ന് മിഹിറിന്റെ മരണത്തിനു പിന്നിലെ കാരണങ്ങളെക്കുറിച്ച് സൂചന ലഭിച്ചതായി പോലീസ് പറയുന്നു. കുടുംബം നൽകിയ പരാതിയോടൊപ്പം ചില ചാറ്റുകളുടെ സ്ക്രീൻഷോട്ടുകളും സമർപ്പിച്ചിട്ടുണ്ടെന്ന് അറിയുന്നു. എന്നാൽ ഈ ഇൻസ്റ്റഗ്രാം പേജ് പിന്നീട് അപ്രത്യക്ഷമായി.
ഇപ്പോൾ, പോലീസ് ഈ പേജിലെ ചാറ്റുകൾ വീണ്ടെടുക്കുന്നതിനുള്ള ശ്രമത്തിലാണ്. ഇതിനായി ഇൻസ്റ്റഗ്രാമിന് ഔദ്യോഗികമായി കത്തയച്ചതായും വരും ദിവസങ്ങളിൽ കൂടുതൽ വിശദാംശങ്ങൾ ലഭ്യമാകുമെന്നും അധികൃതർ അറിയിച്ചു. ഈ ഗ്രൂപ്പ് തുടങ്ങിയത് ആരാണെന്നും അന്വേഷണം തുടരുകയാണ്.
സംഭവം ഗുരുതരമായതിനാൽ പൊതുവിദ്യാഭ്യാസ വകുപ്പും പ്രത്യേകമായി അന്വേഷണം പ്രഖ്യാപിച്ചു. മിഹിറിനെ ജനുവരി 15-ന് ഫ്ലാറ്റിൽ നിന്ന് വീണ നിലയിൽ കണ്ടെത്തിയിരുന്നു. കുട്ടിയുടെ മരണത്തിനിടയാക്കിയത് സഹപാഠികളുടെ ക്രൂര റാഗിങ് ആണ് എന്നാണ് രക്ഷിതാക്കളുടെ ആരോപണം.
സ്കൂൾ അധികൃതർ അന്വേഷണവുമായി പൂർണ്ണമായി സഹകരിക്കുമെന്ന് അറിയിച്ചിട്ടുണ്ട്. കൂടാതെ, സി.സി.ടി.വി. ദൃശ്യങ്ങളും രക്ഷിതാക്കൾ നൽകിയ പരാതിയുടെ വിശദാംശങ്ങളും പോലീസിന് കൈമാറിയിട്ടുണ്ടെന്ന് സ്കൂൾ അധികൃതർ വ്യക്തമാക്കി.
സാമൂഹിക മാധ്യമങ്ങളിലെ ഭീഷണികളും റാഗിങും പോലുള്ള പ്രശ്നങ്ങൾ ഗൗരവത്തിൽ എടുക്കേണ്ടതുണ്ടെന്നും കുട്ടികളുടെ മാനസികാരോഗ്യ സംരക്ഷണത്തിനായി കൂടുതൽ നടപടികൾ ആവശ്യമാണെന്നും ഈ സംഭവം മുന്നോട്ടുവയ്ക്കുന്നു.
