തിരുവനന്തപുരം: കേരള മുഖ്യമന്ത്രി പിണറായി വിജയന് ഇന്ന് 80–ാം പിറന്നാൾ. ഇന്നലെയാണ് രണ്ടാം പിണറായി സ‍‌‍ർക്കാരിന്റെ നാലാം വാ‍‌ർഷികാഘോഷ പരിപാടികൾ സമാപിച്ചത്. ഇന്ന് മുതൽ വീണ്ടും മുഖ്യമന്ത്രി ഓഫീസിലെത്തിത്തുടങ്ങും. സിപിഎം രാഷ്ട്രീയവും വലിയൊരു പരിധി വരെ സംസ്ഥാന രാഷ്ട്രീയവും 1998 -നു ശേഷം പിണറായി വിജയനിൽ കേന്ദ്രീകരിച്ചാണ്‌. ഔദ്യോഗിക രേഖകൾ പ്രകാരം 1945 മാർച്ച് 21-നാണ് പിണറായി വിജയന്‍റെ പിറന്നാൾ. എന്നാൽ യഥാർത്ഥ ജന്മദിനം 1945 മെയ് 24 എന്ന് പിണറായി വിജയൻ തന്നെയായിരുന്നു അറിയിച്ചത്. 2016-ൽ ഒന്നാം പിണറായി സർക്കാർ സത്യപ്രതിജ്ഞ ചെയ്യുന്നതിൻ്റെ തലേ ദിവസമായിരുന്നു പിറന്നാൾ ദിനത്തിലെ സസ്പെൻസ് മുഖ്യമന്ത്രി അവസാനിപ്പിച്ചത്. പിണറായി വിജയൻ മുഖ്യമന്ത്രിയായി അധികാരത്തിലെത്തിയിട്ട് നാളെ 9 വർഷം പൂർത്തിയാകുകയാണ്.
1945 മേയ് 24-നാണ് കണ്ണൂർ പിണറായി മുണ്ടയിൽ കോരൻ്റെയും കല്യാണിയുടെയും മകനായി പിണറായി വിജയൻ ജനിച്ചത്. ശാരദാ വിലാസം എൽപി സ്കൂളിലും പെരളശ്ശേരി ഗവ. ഹൈസ്‌കൂളിലും തലശ്ശേരി ബ്രണ്ണൻ കോളജിലുമായിരുന്നു വിദ്യാഭ്യാസം. ബ്രണ്ണൻ കോളജിൽ ബിഎ ഇക്കണോമിക്സിനു പഠിക്കുമ്പോൾ കേരള സ്റ്റു‌ഡൻസ് ഫെഡറേഷൻ കണ്ണൂർ ജില്ലാ സെക്രട്ടറിയായി. 1964 -ൽ കെഎസ്എഫ് സംസ്ഥാന കമ്മിറ്റിയംഗമായി.
1967 -ൽ സിപിഎമ്മിൻ്റെ തലശ്ശേരി മണ്ഡലം കമ്മിറ്റി സെക്രട്ടറിയായി. 1968-ൽ പാർട്ടി ജില്ലാ കമ്മിറ്റിയംഗമായി. 1972 ൽ ജില്ലാ സെക്രട്ടറിയേറ്റിലേക്കും 1978-ൽ സംസ്ഥാന കമ്മിറ്റിയിലേക്കും തിരഞ്ഞെടുക്കപ്പെട്ടു. 26-ആം വയസ്സില്‍, 1970-ലെ നിയമസഭാ തിരഞ്ഞെടുപ്പില്‍ കൂത്തുപറമ്പ് മണ്ഡലത്തില്‍ നിന്ന് വിജയിച്ച് ആദ്യമായി നിയമസഭയിലെത്തിയ പിണറായി വിജയന് 1977-ലും 1991 -ലും കൂത്തുപറമ്പില്‍ നിന്ന് വിജയം ആവര്‍ത്തിച്ചു. 1996-ല്‍ പയ്യന്നൂരില്‍ നിന്നും 2016-ലും 2021-ലും ധര്‍മ്മടത്ത് നിന്നും വിജയന് നിയമസഭാംഗമായി തിരഞ്ഞെടുക്കപ്പെട്ടു.
ചടയൻ ഗോവിന്ദന്റെ മരണത്തെ തുടർന്ന് മന്ത്രിപദം ഉപേക്ഷിച്ച് 1998 സെപ്‌റ്റംബർ 25-ന് പാർട്ടി സെക്രട്ടറിയായി. അതിനുശേഷം കണ്ണൂരിലും മലപ്പുറത്തും കോട്ടയത്തും നടന്ന സ്‌റ്റേറ്റ് കോൺഫറൻസിൽ സെക്രട്ടറിയായി വീണ്ടും തിരഞ്ഞെടുക്കപ്പെട്ടു. തുടർന്നു പൊളിറ്റ് ബ്യൂറോ അംഗവുമായി. 2016-ലാണ് ആദ്യ പിണറായി സർക്കാർ അധികാരമേൽക്കുന്നത്. 2016-ല്‍ നടന്ന നിയമസഭാ തിരഞ്ഞെടുപ്പില്‍ ഇടതുപക്ഷ ജനാധിപത്യ മുന്നണിയെ ചരിത്ര വിജയത്തിലേക്ക് നയിച്ച പിണറായി വിജയന് 2021-ല്‍ മുന്നണിയ്ക്ക് തുടര്‍ഭരണം ഉറപ്പാക്കുകയും ചെയ്തു.
മുഖ്യമന്ത്രി സ്ഥാനത്ത് 9 വർഷം പൂർത്തിയാക്കുന്നതിന്‍റെ തലേദിവസമാണ് പിണറായി വിജയന് 80 വയസായിരിക്കുന്നത്. അടുത്ത നിയമസഭാ തെരഞ്ഞെടുപ്പിലും വിജയനല്ലാതെ പാർട്ടിക്ക് മുന്നിൽ എൽഡിഎഫിനെ നയിക്കാൻ മറ്റു മുഖങ്ങൾ ഒന്നും തന്നെയില്ല. തുടർഭരണം വീണ്ടും കിട്ടിയാൽ 80 പിന്നിട്ട പിണറായിയെ ആശ്രയിക്കാനിടയില്ലെന്നു കരുതുന്നവരുടെ മുന്നിലേക്ക് പിണറായി പക്ഷക്കാർ ഹാജരാക്കുന്നത് വിഎസിന്റെ കാര്യമാകും: 82–ാം വയസ്സിലാണ് വി.എസ്.അച്യുതാനന്ദൻ മുഖ്യമന്ത്രിയായത്!
