എറണാകുളം കലൂരിൽ രോഗിയുമായി പോയ ആംബുലൻസിന്റെ വഴിമുടക്കിയ സ്കൂട്ടർ യാത്രികയ്ക്കെതിരെ മോട്ടോർ വാഹന വകുപ്പ് ശക്തമായ നടപടികൾ സ്വീകരിച്ചു. കലൂർ മെട്രോ സ്റ്റേഷനുസമീപം ശനിയാഴ്ച സംഭവിച്ച ഈ സംഭവം സമൂഹമാധ്യമങ്ങളിൽ വലിയ ചർച്ചയായതിന് പിന്നാലെയാണ് നടപടി.
സൈറൺ മുഴക്കിയുള്ള ആംബുലൻസ് നിരന്തരമായി ഹോൺ മുഴക്കിയിട്ടും സ്കൂട്ടർ യാത്രിക വഴി വിട്ടുനൽകാൻ തയ്യാറായില്ല. സംഭവത്തിന്റെ ദൃശ്യങ്ങൾ സാമൂഹ്യമാധ്യമങ്ങളിൽ പ്രചരിച്ചതോടെ മോട്ടോർ വാഹന വകുപ്പ് സ്വമേധയാ കേസെടുക്കുകയായിരുന്നു. ആലുവയിലെ ഒരു സ്വകാര്യ ആശുപത്രിയിൽ നിന്നും കൈ അറ്റുപോയ അതിഥി തൊഴിലാളിയെ കൊച്ചിയിലെ മറ്റൊരു ആശുപത്രിയിലേക്ക് മാറ്റുന്നതിനിടെയാണ് സംഭവം. രോഗിയെ ആശുപത്രിയിൽ എത്തിച്ച ശേഷം, സംഭവത്തിന്റെ ദൃശ്യങ്ങളടക്കം ആംബുലൻസ് ഡ്രൈവർ ജിനീഷ് പാലാരിവട്ടം പോലീസ് സ്റ്റേഷനിൽ പരാതി നൽകി.
ദൃശ്യങ്ങളിൽ നിന്ന് സ്കൂട്ടറിന്റെ രജിസ്ട്രേഷൻ നമ്പർ കേന്ദ്രീകരിച്ച് നടത്തിയ അന്വേഷണത്തിൽ മഹാരാഷ്ട്ര സ്വദേശിനിയായ യുവതിയാണ് വാഹനം ഓടിച്ചിരുന്നതെന്ന് കണ്ടെത്തി. കസ്തൂരി എന്ന യുവതി മഹാരാഷ്ട്ര രജിസ്ട്രേഷനുള്ള സ്കൂട്ടർ ഉപയോഗിക്കുകയായിരുന്നു. ജിനീഷ് നൽകിയ പരാതിക്ക് പിന്നാലെ കസ്തൂരിയും പോലീസിനെ സമീപിച്ച് പരാതിയുമായി എത്തി. തന്റെ ദൃശ്യങ്ങൾ അനുമതിയില്ലാതെ പകർത്തുകയും സമൂഹമാധ്യമങ്ങളിൽ പ്രചരിപ്പിക്കുകയും ചെയ്തതിനെതിരെ അവർ പരാതികൊടുത്തു.
പോലീസ് നടത്തിയ അന്വേഷണത്തിനൊടുവിൽ കസ്തൂരിയുടെ ലൈസൻസ് റദ്ദാക്കുകയും 5000 രൂപ പിഴ ചുമത്തുകയും ചെയ്തു.
