അമേരിക്കൻ പോഡ്കാസ്റ്റർ ലെക്സ് ഫ്രിഡ്മാനുമായുള്ള ഒരു അഭിമുഖത്തിനിടെ, പാക്കിസ്ഥാനുമായി സമാധാനം സ്ഥാപിക്കാനുള്ള ഇന്ത്യയുടെ ശ്രമങ്ങളെക്കുറിച്ച് പ്രധാനമന്ത്രി നരേന്ദ്ര മോദി നടത്തിയ പരാമർശത്തെ പാക്കിസ്ഥാൻ വിമർശിച്ചതിനെ ഇന്ത്യ ശക്തമായി പ്രതിരോധിച്ചു. പ്രധാനമന്ത്രി മോദിയുടെ “സമാധാനം നിലനിർത്താനുള്ള ഓരോ ശ്രമവും ശത്രുതയ്ക്കും വഞ്ചനയ്ക്കും വിധേയമായി” എന്ന പരാമർശം വഴിതെറ്റിക്കുന്നതും ഏകപക്ഷീയവുമാണെന്ന് പാക്കിസ്ഥാൻ ആരോപിച്ചതിന് പിന്നാലെയാണ് ന്യൂഡൽഹിയുടെ മറുപടി.
“സമാധാനത്തിനും സുരക്ഷയ്ക്കും ഏറ്റവും വലിയ ഭീഷണി പാക്കിസ്ഥാനാണ്,” വിദേശകാര്യ മന്ത്രാലയ വക്താവ് രൺധീർ ജയ്സ്വാൾ ഔദ്യോഗിക പ്രസ്താവനയിൽ വ്യക്തമാക്കി. ഇസ്ലാമാബാദ് ഉദ്ദേശപ്രേരിതമായ നുണകൾ പ്രചരിപ്പിക്കുന്നുവെന്നും അദ്ദേഹം കുറ്റപ്പെടുത്തി. “ഇന്ത്യൻ കേന്ദ്രഭരണ പ്രദേശമായ ജമ്മു കശ്മീരിനെക്കുറിച്ച് പാക്കിസ്ഥാൻ വീണ്ടും ചില പരാമർശങ്ങൾ നടത്തിയിട്ടുണ്ടെന്ന് ഞങ്ങൾ ശ്രദ്ധിക്കുന്നു. അതിർത്തി കടന്നുള്ള ഭീകരതയെ പാക്കിസ്ഥാൻ സജീവമായി പ്രോത്സാഹിപ്പിക്കുകയും സ്പോൺസർ ചെയ്യുകയും ചെയ്യുന്നതാണ് യഥാർത്ഥ പ്രശ്നമെന്ന് ലോകത്തിന് അറിയാം. വാസ്തവത്തിൽ, മേഖലയിലെ സമാധാനത്തിനും സുരക്ഷയ്ക്കും ഇത് ഏറ്റവും വലിയ തടസ്സമാണ്. നുണകൾ പ്രചരിപ്പിക്കുന്നതിനുപകരം, പാക്കിസ്ഥാൻ നിയമവിരുദ്ധവും നിർബന്ധിതവുമായ അധിനിവേശത്തിന് കീഴിലുള്ള ഇന്ത്യൻ പ്രദേശം ഒഴിയണം,” ജയ്സ്വാൾ പറഞ്ഞു.
ലെക്സ് ഫ്രിഡ്മാൻ നരേന്ദ്ര മോദി പോഡ്കാസ്റ്റ് ശ്രദ്ധയാകർഷിക്കുന്നു.
