ശ്രീനഗർ: പാക്കിസ്‌ഥാനെപ്പോലൊരു രാജ്യത്ത് ആണവായുധങ്ങൾ ഒട്ടും സുരക്ഷിതമല്ലെന്നും അവരുടെ ആണവായുധങ്ങൾ രാജ്യാന്തര ആണവോർജ ഏജൻസിയുടെ (ഐഎഇഎ) മേൽനോട്ടത്തിൽ കൊണ്ടുവരണമെന്നും പ്രതിരോധ മന്ത്രി രാജ്‌നാഥ് സിങ്. കശ്മീരിൽ സൈനികരെ അഭിസംബോധന ചെയ്യുകയായിരുന്നു അദ്ദേഹം. ഭീകരവാദത്തിനെതിരെയുള്ള പോരാട്ടത്തിൽ ജീവൻ നഷ്ടപ്പെട്ട സൈനികർക്ക് പ്രണാമം അർപ്പിക്കുന്നുവെന്നും പഹൽഗാമിൽ കൊല്ലപ്പെട്ട നിരപരാധികളായ ആളുകളെ ആദരിക്കുന്നുവെന്നും രാജ്‌നാഥ് സിങ് പറഞ്ഞു.
ഓപ്പറേഷൻ സിന്ദൂറിനു ശേഷം ആദ്യമായി കശ്മീർ സന്ദർശിച്ചപ്പോഴായിരുന്നു രാജ്‌നാഥ് സിങ്ങിൻ്റെ പ്രതികരണം. ബദാമി ബാഗ് കന്റോൺമെന്റിൽ സൈനികരുമായി ആശയവിനിമയം നടത്തിയ അദ്ദേഹം ഓപ്പറേഷൻ സിന്ദുറിൽ നടത്തിയ ധീരമായ ഇടപെടലുകൾക്ക് സൈനികരെ അഭിനന്ദിച്ചു. “പ്രധാനമന്ത്രി നരേന്ദ്രമോദിയുടെ കഴിവുറ്റ നേത‍ൃത്വത്തിലും മാർഗനിർദേശത്തിലും ഓപ്പറേഷൻ സിന്ദൂറിലൂടെ നിങ്ങൾ ചെയ്ത പ്രവർത്തനങ്ങളിൽ രാജ്യം മുഴുവൻ അഭിമാനിക്കുകയാണ്. പ്രതിരോധ മന്ത്രി ആകുന്നതിന് മുമ്പ് ഞാനൊരു ഇന്ത്യൻ പൗരനാണ്. പ്രതിരോധമന്ത്രി ആയിട്ടല്ല, ഒരു ഇന്ത്യൻ പൗരൻ എന്ന നിലയിൽ നിങ്ങളോട് നന്ദി പറയാനാണ് ഞാൻ ഇവിടെ എത്തിയത്. ഭീകരതയ്‌ക്കെതിരെ ഇന്ത്യ ഇതുവരെ നടത്തിയ ഏറ്റവും വലിയ ദൗത്യമാണ് ഓപ്പറേഷൻ സിന്ദൂർ. കഴിഞ്ഞ 40 വർഷമായി അതിർത്തിക്ക് അപ്പുറമുള്ള ഭീകരതയെ ഇന്ത്യ നേരിടുന്നു. ഭീകരതയ്‌ക്കെതിരെ ഏതറ്റംവരെയും പോകുമെന്ന് ഇന്ത്യ നേരത്തെ ലോകത്തിന് മുന്നിൽ വ്യക്തമാക്കിയിട്ടുണ്ട്” അവർ ഇന്ത്യയുടെ നെറ്റിയിൽ മുറിവേൽപ്പിച്ചു. എന്നാൽ ഞങ്ങൾ അവരുടെ നെഞ്ചിലാണ് കനത്ത പ്രഹരമേൽപ്പിച്ചത്. പാക്കിസ്‌ഥാനിൽ നിന്നും ഒളിച്ചോടിയ ഭീകരർ ലോകത്ത് എവിടെയും സുരക്ഷിതരല്ല എന്നും രാജ്‌നാഥ് സിങ് പറഞ്ഞു. ഭീകരപ്രവർത്തനം, പാക്ക് അധിനിവേശ കശ്മീർ വിഷയങ്ങളിൽ മാത്രമേ പാക്കിസ്ഥാനുമായി ചർച്ചയുള്ളൂവെന്നും സേനയുടെ സഹായത്തോടെ മേഖലയിൽ നിന്നു ഭീകരതയെ പൂർണമായി തുടച്ചുനീക്കുമെന്നും അദ്ദേഹം പറഞ്ഞു.
