തിരുവനന്തപുരം: പ്രശസ്തമായ ആറ്റുകാൽ പൊങ്കാല ഇന്ന്. ആറ്റുകാൽ ഭഗവതിക്ക് പൊങ്കാല സമർപ്പിച്ച് പ്രാർത്ഥന നടത്താൻ എത്തിച്ചേർന്നത് പതിനായിരത്തിലധികം ഭക്തജനങ്ങളാണ്. രാവിലെ 9:45-ന് നടക്കുന്ന ശുദ്ധപുണ്യാഹം മൂലം ചടങ്ങുകൾക്ക് ഔപചാരിക തുടക്കം കുറിക്കും. 10:15-ന് പൊങ്കാല അടുപ്പുകളിൽ തീ പകരും. ഉച്ചയ്ക്ക് 1:15-ന് നടക്കുന്ന ഉച്ചപൂജക്ക് ശേഷം പൊങ്കാല നിവേദ്യവും ദീപാരാധനയും നടക്കും. ഹരിത ചട്ടങ്ങൾ പാലിച്ചാണ് ഇത്തവണ പൊങ്കാല നടക്കുന്നത്.
ആറ്റുകാൽ പൊങ്കാലയെ തുടർന്ന് തിരുവനന്തപുരം ജില്ലയിലെ എല്ലാ വിദ്യാഭ്യാസ സ്ഥാപനങ്ങൾക്കും സർക്കാർ, അർധ സർക്കാർ സ്ഥാപനങ്ങൾക്കും അവധി പ്രഖ്യാപിച്ചിരിക്കുന്നു. കൂടാതെ, രാത്രി 8 മണിവരെ നഗരത്തിൽ കർശന ഗതാഗത നിയന്ത്രണവും ഉണ്ടാകും. 3811 പോലീസുകാർക്ക് പുറമേ, 847 സിസിടിവി ക്യാമറകളും ഡ്രോൺ നിരീക്ഷണവും തയ്യാറാക്കിയിട്ടുണ്ടെന്ന് അധികൃതർ അറിയിച്ചു. സുരക്ഷാ ക്രമീകരണങ്ങളുടെ ഭാഗമായി 24 മണിക്കൂർ പ്രവർത്തിക്കുന്ന പ്രത്യേക കൺട്രോൾ റൂം സജ്ജീകരിച്ചിട്ടുണ്ട്.
പൊലീസ് കൺട്രോൾ റൂം: 0471 2778942
അടിയന്തര സഹായം: 112
ഭക്തജനങ്ങൾക്ക് അടിയന്തര വൈദ്യസഹായം നൽകുന്നതിനായി ഹീറ്റ് ക്ലിനിക്കുകളും പ്രത്യേക മെഡിക്കൽ ടീമുകളേയും നഗരത്തിലും പ്രധാന ആശുപത്രികളിലും ഒരുക്കിയിട്ടുണ്ട്. ചൂട് മൂലം ബുദ്ധിമുട്ട് അനുഭവിക്കുന്നവർക്ക് വേണ്ട പ്രഥമ ശുശ്രൂഷയും ചികിത്സയും ലഭ്യമാക്കും.
ആരോഗ്യ കൺട്രോൾ റൂം: 0471 2778947
